YouVersion Logo
Search Icon

SALMOS 31

31
Mʌcʌl ti xajlel
1C Yum, tsa'ix cʌc'ʌ c bʌ ti a wenta.
Mach a wʌc'on ti quisin ti pejtelel ora.
Coltañon ti toj bʌ a pusic'al.
2Yom ma' p'ison ti a wenta, coltañon ti ora.
C Xajlelet ba' mic taj i xuc'tilel c pusic'al.
Mi cʌc' c bʌ ti a wenta che' bajche' mic mʌc c bʌ ti chan bʌ xajlel.
3Come jatet c Xajlelet ba' mic taj i xuc'tilel c pusic'al.
Lajalet bajche' ts'ajcʌbil bʌ cotot.
Pʌyʌyon majlel cha'an ma' wʌc' ti cʌjñel a c'aba'.
Pʌsbeñon jini bij ba' yom mic majlel.
4Chiliyon loq'uel ti uts'at ba' mi' yʌcoñob,
Come xuc'ul bʌ cototet.
5Mi cʌq'ueñet c ch'ujlel ti a c'ʌb.
Tsa'ix a mʌñʌyon, c Yum Dios, isujmetʌch.
6Ts'a' ma' q'uel jini mu' bʌ i ch'ujutesañob dioste'.
Joñon mic ñopet, c Yum.
7Mi caj c wen ubin tijicña cha'an a c'uxbiya,
Come tsa' q'ueleyon ti wocol.
Tsa' cʌmbeyon c pusic'al ti wocol.
8Ma'anic tsa' wʌc'ʌyon ti' c'ʌb j contra.
Tsa' wʌc'ʌyon ti libre.
9P'untañon c Yum, come añon ti wocol.
Woli' yajpel c wut ti uq'uel.
Woli ti c'un'an c pusic'al yic'ot j cuctal cha'an ch'ijiyem c pusic'al.
10Come woli' jisañon i ch'ijiyemlel c pusic'al.
Woliyon ti uq'uel ti pejtelel ora.
Woli' jilel c p'ʌtʌlel cha'an c mul. Laj jilemix c wersa.
11Ts'a'lebilon ti pejtelel j contrajob.
Ñumen mi' ts'a'leñoñob c pi'ʌlob ti chumtʌl.
Jini j cʌñʌyo' bʌ mi' bʌc'ñañoñob.
Jini mu' bʌ i q'ueloñob ti bij mi' puts'tañoñob.
12Mi' sʌtoñob ti' pusic'al che' bajche' winic tsa'ix bʌ chʌmi.
Lajalon bajche' i xejt'il p'ejt.
13Tsa'ix cubi c ts'a'lentel ti cabʌlob.
An bʌq'uen ti jujunwejl.
Che' mi' temob i t'an tij contra,
Yomob i tsʌnsañon.
14C Yum, wolic ñopet. Tsa cʌlʌ: C Dioset.
15Tilem ti a tojlel chuqui tac jach mi' tajon.
Loc'sañon ti' c'ʌb j contrajob, ti' tojlel jini mu' bʌ i tic'lañon.
16A winicon, yom tijicña ma' q'uelon.
Coltañon come c'ux ma' wubiñon.
17C Yum, mach a wʌc'on ti quisin come tsa'ix c pejcayet.
La' i yubiñob quisin jini jontolo' bʌ.
Mi caj i ñʌjch'elob ya' ti' yajñib chʌmeño' bʌ.
18La' ñʌjch'icob jini yujilo' bʌ lot,
Mu' bʌ i chañ'esañob i bʌ ti tsʌts bʌ t'an.
Mi' ts'a'leñob jini tojo' bʌ.
19Wen ñuc i yutslel a pusic'al mu' bʌ caj a pʌsben jini mu' bʌ i bʌc'ñañet.
Chajpʌbilet cha'an ma' pʌsben a wutslel jini mu' bʌ i ñopet ti' tojlel i pi'ʌlob.
20Ma' wotsañob ti xuc'ul ba' mach i tajayobic i contrajob.
Mi caj a cʌntañob ti a wotot ba' ma'anic mi' yubiñob a'leya.
21La' c ch'ujutesañet c Yum,
Come tsa' pʌsbeyon ñuc bʌ a wutslel ya' ba' woli' joy contrajiñoñob.
22Come tsa cʌlʌ che' añon ti wocol:
Chocbilonix ti a wut, cho'on.
Pero tsa' wubibeyon che' bʌ tsac pejcayet ti oración,
Che' bʌ tsac cha'le uq'uel ti a tojlel.
23C'uxbinla lac Yum pejtel i cha'añet bʌ la,
Come lac Yum mi' cʌntan jini mu' bʌ i ñopob.
Mi' yʌq'uen i toj i mul jini mu' bʌ i chañ'esan i bʌ.
24La' ñuc'ac la' pusic'al. Yom ch'ejletla.
Mi caj i p'ʌtesʌbeñetla la' pusic'al pejtel mu' bʌ la' pijtan lac Yum.

Currently Selected:

SALMOS 31: ctuBI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy