SALMOS 30
CTUBI
30
Tsa' coli ti c'amʌjel
1C Yum, mi caj c sub a ñuclel, come tsa'ix a ñuq'uesʌbeyon c pusic'al.
Tsa'ix a tiq'ui j contrajob. Ma'anic tsa' mʌjli i cha'añob.
2C Yum Dios, c'am tsac pejcayet. Tsa' c'oq'uesayon.
3C Yum, tsa' loc'sayon ti' yajñib chʌmeño' bʌ.
Tsa' cha' ch'ejlesayon cha'an ma'anic mic jubel ti mucoñibʌl.
4C Yum, la i c'ʌyiñob a ñuclel a cha'año' bʌ.
La' i subob wocolix i yʌlʌ che' mi' ña'tañob ch'ujul a c'aba'.
5Jumuc' jach mich'et, c Yum.
Ma'anic ma' cʌy a pʌsbeñon lojon a wutslel che' cuxulon to lojon.
Poj ch'ijiyemon lojon jump'ejl ac'ʌlel,
Tijicña c pusic'al lojon che' ti sʌc'ajel.
6Che' tijicñayon tsa cʌlʌ:
Chʌn xuc'ulon mi caj cajñel ti pejtelel ora, lon cho'on.
7C Yum, cha'an jach ti' yutslel a pusic'al poj xuc'ulon bajche' wits.
Che' bʌ tsa' mʌyʌ a wut, tsa' caji c mel c pusic'al.
8C Yum, c'am tsac pejcayet.
Tsaj c'ajtibeyet ti wocol t'an:
9Mi tsa' chʌmiyon, mi tsa' oc'mi c bʌc'tal, ¿chuqui to j c'ʌjñibal?
¿Mejl ba i sub a ñuclel jini ts'ubejn?
10Ubiñon c Yum, pʌsbeñon i yutslel a pusic'al.
C Yum, ochen ti caj cʌntaya.
11Tsa'ix a q'uextʌbeyon i ch'ijiyemlel c pusic'al.
Tsa'ix a wʌc'ʌyon ti son.
Tsa' jochbeyon loq'uel j coxtal i yejtal i ch'ijiyemlel c pusic'al.
Tsa' lʌpbeyon yilal tijicña bʌ c pusic'al.
12Jini cha'an mij c'ʌyin a ñuclel,
Ma'anic mic ñʌjch'el.
C Yum Dios, mi caj c subeñet wocolix a wʌlʌ ti pejtelel ora.

© Wycliffe Bible Translators, Inc. All rights reserved.

Learn More About I T’an Dios