SALMOS 25
25
Lac Yum mi' toj'esañonla majlel
1C Yum, mic ña'tañet ti chan.
2C Dios, tsa'ix c ñopoyet. Mach a wʌc'on ti quisin.
Mach a wʌc'on ti' p'ʌtʌlel j contrajob ame mʌjlic i cha'añob.
3Isujm, ma'anic mi' cajel ti quisin jini mu' bʌ i pijtañet.
Mi' cajelob ti quisin jini mu' bʌ i ñusañob a t'an.
4C Yum, pʌsbeñon bajche' a wom mic mel.
Wen cʌntesañon ti a bijlel.
5Pʌyʌyon majlel ti' sujmlel a t'an, cʌntesañon.
Come c Dioset, caj Coltayajet.
Mic pijtañet ti pejtelel q'uin.
6C Yum, ña'tañon, p'untañon ti' yutslel a pusic'al,
Che' bajche' tsa' p'unta winicob ti wajali.
Junlajal uts a pusic'al ti pejtelel ora.
7Mach a melon cha'an c mul tsa' bʌ c mele che' ch'itoñon to.
Mach a melon cha'an tsac ñusa a mandar.
Yom ma' ña'tañon ti a c'uxbiya, ti' yutslel a pusic'al.
8Uts'atax lac Yum. Toj ja'el.
Jini cha'an mi' pʌsbeñob toj bʌ bij jini xmulilob.
9Mi' pʌsben jini utso' bʌ i pusic'al bajche' yom mi' melob.
Mi' toj'esan majlel jini pec'o' bʌ ti' bijlel.
10An i c'uxbiya lac Yum, an i sujmlel.
Mi' yʌq'ueñob i cʌn mu' bʌ i jac'beñob i t'an.
11Cha'an ma' wʌc' ti cʌjñel a c'aba',
C Yum, ñusʌbeñon c mul come cabʌl.
12¿Majqui jini winic mu' bʌ i bʌc'ñan lac Yum?
Lac Yum mi caj i cʌntesan majlel ti wen bʌ bij.
13Wen chumul mi' caj ti ajñel, tijicña i pusic'al.
I p'olbal mi caj i yʌq'uentel i lumal ti' majtan.
14Jini mu' bʌ i bʌc'ñañob lac Yum mi caj i yajñel yic'ot.
Mux i pʌsbeñob jini xuc'ul bʌ i t'an.
15Ti pejtelel ora wolic pijtan c Yum,
Come mi caj i loc'sʌbeñon coc ti yac.
16Sutq'uin a bʌ ba' añon. Pʌsbeñon i yutslel a pusic'al,
Come añon tic bajñelil. Woli cubin wocol.
17Lajmesʌbeñon c tsic pusic'al.
Loc'sañon tic wocol.
18Q'uele c tic'lʌntel yic'ot c wocol.
Ñusʌbeñon pejtel c mul.
19Q'uele j contrajob, come cabʌlob.
Jontol jax mi' ts'a'leñoñob ti' mich'lel i pusic'al.
20Cʌntañon, coloyon. Mach a wʌc'on ti quisin,
Come tsa'ix c ñopoyet.
21Cʌntañon come tojon, uts'aton.
Mic chʌn pijtañet.
22Dios, yom ma' mʌn loq'uel israelob
Ti pejtelel i wocol.
Currently Selected:
SALMOS 25: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.