SALMOS 136
CTUBI
136
Ti' pejtelel ora an i yutslel lac Yum
1Subenla wocolix i yʌlʌ lac Yum, come uts'at i pusic'al.
Come ti pejtelel ora an i yutslel i pusic'al.
2Aq'uenla wocolix i yʌlʌ Dios, jini cojach bʌ Dios,
Come ti pejtelel ora an i yutslel i pusic'al.
3Aq'uenla wocolix i yʌlʌ i Yum jini yumʌlob,
Come ti pejtelel ora an i yutslel i pusic'al.
4Jini mu' bʌ i bajñel mel jini ñuc tac bʌ i melbal,
Come ti pejtelel ora an i yutslel i pusic'al.
5Jini tsa' bʌ i mele panchan cha'an cabʌl i ña'tʌbal,
Come ti pejtelel ora an i yutslel i pusic'al.
6Jini tsa' bʌ i yʌc'ʌ ti tsictiyel lum ya' ti ja',
Come ti pejtelel ora an i yutslel i pusic'al.
7Jini tsa' bʌ i mele q'uin yic'ot uw,
Come ti pejtelel ora an i yutslel i pusic'al.
8Jini q'uin cha'an mi' pʌs i c'ʌc'al ti q'uiñil,
Come ti pejtelel ora an i yutslel i pusic'al.
9Jini uw yic'ot ec' tac cha'an mi' pʌsob i c'ʌc'al ti ac'ʌlel,
Come ti pejtelel ora an i yutslel i pusic'al.
10Suben wocolix i yʌlʌ Dios tsa' bʌ i jisa jini ascuñʌlo' bʌ ti Egipto,
Come ti pejtelel ora an i yutslel i pusic'al.
11Tsi' pʌyʌ loq'uel israelob ya' ba' cʌchʌlob,
Come ti pejtelel ora an i yutslel i pusic'al.
12Tsi' loc'sayob ti' tojlel i contrajob ti p'ʌtʌl bʌ i c'ʌb.
Come ti pejtelel ora an i yutslel i pusic'al.
13Jiñʌch tsa' bʌ i cala ti ojlil jini Chʌchʌc bʌ Ñajb,
Come ti pejtelel ora an i yutslel i pusic'al.
14Tsi' pʌyʌ c'axel israelob ti yojlil,
Come ti pejtelel ora an i yutslel i pusic'al.
15Tsi' choco ochel Faraón yic'ot i soldadojob ya' ti ojlil Chʌchʌc bʌ Ñajb,
Come ti pejtelel ora an i yutslel i pusic'al.
16Tsi' c'axtesa i cha'año' bʌ ti jochol bʌ lum,
Come ti pejtelel ora an i yutslel i pusic'al.
17Tsi' jisa p'ʌtʌl bʌ yumʌlob,
Come ti pejtelel ora an i yutslel i pusic'al.
18Tsi' tsʌnsa ñuc bʌ yumʌlob,
Come ti pejtelel ora an i yutslel i pusic'al.
19Sehón i rey amorreojob,
Come ti pejtelel ora an i yutslel i pusic'al.
20Yic'ot Og jini rey am bʌ ti Basán,
Come ti pejtelel ora an i yutslel i pusic'al.
21Tsi' yʌq'ueyob i lum jini israelob cha'an mi' yochelob ti' yum,
Come ti pejtelel ora an i yutslel i pusic'al.
22Chejachi tsi' yʌq'ueyob i lum jini israelob come i winicob Dios,
Come ti pejtelel ora an i yutslel i pusic'al.
23Tsi' ña'tayonla che' ju'sʌbilix lac pusic'al,
Come ti pejtelel ora an i yutslel i pusic'al.
24Tsi' mʌñʌyonla loq'uel ti' p'ʌtʌlel laj contrajob,
Come ti pejtelel ora an i yutslel i pusic'al.
25Mi' yʌq'ueñob i bʌl i ñʌc' pejtel winicob x'ixicob,
Yic'ot pejtel cuxul tac bʌ,
Come ti pejtelel ora an i yutslel i pusic'al.
26Subenla wocolix i yʌlʌ Dios am bʌ ti panchan
Come ti pejtelel ora an i yutslel i pusic'al.

© Wycliffe Bible Translators, Inc. All rights reserved.

Learn More About I T’an Dios