SALMOS 119
119
Uts'atax i mandar Dios
1Tijicñayob jini tojo' bʌ mu' bʌ i cha'leñob xʌmbal che' bajche' ts'ijbubil ti' cʌntesʌbal lac Yum.
2Tijicñayob jini mu' bʌ i jac'ob a t'an, mu' bʌ i sʌclañet c Yum, ti pejtelel i pusic'al.
3Ma'anic mi' cha'leñob jontolil.
Mi' cha'leñob xʌmbal ti a bijlel c Yum.
4Tsa'ix a wʌc'ʌ a ley cha'an mic wen jac' lojon.
5La' xuc'lecon cha'an mic cha'len chuqui uts'at
Che' bajche' ts'ijbubil.
6Che' jini ma'anic mi caj cʌjq'uel ti quisin,
Come mic wen q'uel pejtelel a mandar.
7Mi caj c subeñet wocolix a wʌlʌ ti xuc'tilel c pusic'al
Che' mi cubin c toj'esʌntel.
8Mi caj c jac'.
Mach ma' junyajlel cʌyon.
9¿Bajche' mi mejlel i cʌntan i bʌ cha'an sʌc mi' yajñel jini ch'iton winic?
Mi' cʌntan i bʌ che' mi' jac' a t'an.
10Mic sʌclañet ti pejtelel c pusic'al.
Cʌntesañon a mandar ame mij cʌy a bijlel.
11Tsa'ix cotsa a t'an tic pusic'al
Cha'an ma'anic mic cha'len mulil ti a contra.
12Uts'atet c Yum, cʌntesañon ti a mandar.
13A cha'añʌch jini quej cha'an mic laj sub chubʌ tsa' wʌlʌ.
14Tijicñayon che' bajche' wen chumul bʌ
Che' mic jac' a t'an.
15Mi caj c p'is tic wenta chuqui tsa' tsictesa.
Mi caj j q'uel ti ñuc a melbal.
16Tijicñayon cha'an a ts'ijbujel.
Ma'anic mi' ñajʌyel a t'an tic pusic'al.
17A winicon. Aq'ueñon chuqui wen ti' yutslel a pusic'al,
Cha'an mic chʌn jac' a t'an.
18Cambeñon c wut cha'an mij q'uel jini ñuc tac bʌ a cʌntesʌbal.
19Xñumelon ti pañimil.
Mach ma' mʌcbeñon a mandar.
20Ti jujump'ejl q'uin wersa com cubin j cʌntesʌntel ti pejtelel c pusic'al.
21Tsa'ix a tiq'ui jini chan bʌ mi' melob i bʌ.
Chocbilob ti a tojlel cha'an tsi' cʌyʌyob a mandar.
22Mach ma' wʌc'on ti a'lentel yic'ot ts'a'lentel
Come wolic jac' a t'an.
23Anquese mi' tempañob i bʌ yumʌlob cha'an mi' temob i t'an tij contra,
Joñon mi caj c chʌn ña'tan c mel chuqui a wom, come a winicon.
24Isujm, tijicña c pusic'al cha'an a t'an,
Come mi' pʌsbeñon bajche' yom mic mel.
25Wen ch'ijiyemon, pʌcʌlon ti ts'ubejn yilal.
Cha' ch'ejl'esʌbeñon c pusic'al yic'ot a t'an.
26Tsa'ix c subeyet c sajtemal, tsa'ix a wubiyon.
Cʌntesañon ti a mandar.
27Aq'ueñon c ch'ʌmben i sujm.
Che' jini mi caj cotsan tic pusic'al jini ñuc tac bʌ a melbal.
28Mi' c'uñ'an c pusic'al cha'an wocol.
P'ʌtesañon ti a t'an.
29Cʌntañon ame mic ñopben i melbal jini payxo bʌ.
Cʌntesañon ti' yutslel a pusic'al.
30Tsa'ix c yajca jini isujm bʌ bij.
Mij q'uel ti ñuc pejtel chuqui tsa' wʌlʌ.
31Mi cʌc' c bʌ ti' jac'ol.
C Yum, mach ma' wʌc'on ti quisin.
32Mi caj c bʌc' jac'beñet a mandar che' cʌntesʌbilon
Cha'an mi cutsi ch'ʌmben isujm.
33C Yum, cʌntesanon ti' sujmlel jini ts'ijbubil bʌ a t'an cha'an mic chʌn jac' ti pejtelel ora.
34Aq'ueñon c ch'ʌmben isujm, cha'an mic jac'beñet a cʌntesa ti jump'ejl c pusic'al.
35Toj'esañon majlel ti a bijlel,
Come tijicña mi cubin a mandar.
36Yom ma' wʌc' c pusic'al ti jini tsa' bʌ a wʌlʌ,
Ame mi cʌc' c pusic'al ti' mulʌntel taq'uin.
37Mʌybeñon c wut ame mic chʌn q'uel jini lolom jach bʌ.
Ch'ejlesañon ti a bijlel.
38Xuc'chocoñon che' bajche' tsa' subeyon,
Cha'an mi' tajob i wenlel jini mu' bʌ i bʌc'ñañet.
39Mic bʌc'ñan c wajlentel che' mic mel chuqui uts'at
Che' bajche' tsa' cʌntesayon.
40Wersa com c ñop a t'an.
Cha' ch'ejlesañon come toj a pusic'al.
41C Yum, pʌsbeñon i yutslel a pusic'al.
Coltañon che' bajche' tsa' subu.
42Che' jini mi caj c toj'esan majlel jini mu' bʌ i wajleñoñob,
Come wolic ñop a t'an.
43Mach sajtic a t'an tic pusic'al, come isujmʌch.
Wolic pijtan i ts'ʌctesʌntel.
44Mi caj c jac'beñet a cʌntesa wʌle yic'ot ti pejtelel ora.
45Tijicña mi caj cajñel ti a bijlel come librejonix,
Come tsa'ix c wen ñopo a t'an.
46Mi caj c sub a ña'tʌbal ti' tojlel reyob.
Ma'anic majch mi caj i yʌc'on ti quisin.
47Tijicñayon cha'an a mandar,
Come c'ux mi cubin.
48Mic ch'ujutesan a mandar mu' bʌ j c'uxbin.
Mi caj c chʌn ña'tan tic pusic'al.
49Yom chʌn c'ajal a cha'an jini t'an tsa' bʌ a sube a winic,
Tsa' bʌ i techbeyon c pijtaya.
50Mi' ñuq'uesʌbeñon c pusic'al che' woliyon ti wocol.
Jini tsa' bʌ a wʌlʌ mi' ch'ejlesʌbeñon c pusic'al.
51Jini chan bʌ mi' melob i bʌ cabʌl mi' wajleñoñob.
Pero ma'anic mij cʌy c ñopet.
52Che' mij c'ajtesan a melbal ti wajali,
Mi' ñuc'an c pusic'al, c Yum.
53Cabʌl mic mich'len jini jontolo' bʌ mu' bʌ i ñusañob a t'an.
54Wolij c'ʌyin salmo tac che' poj wʌ' añon ti pañimil.
55C Yum mic ña'tan a c'aba' ti ac'ʌlel.
Mic jac'beñet a cʌntesa.
56Jiñʌch c wenlel mu' bʌ i ñuq'uesan c pusic'al.
Wolic jac'beñet a t'an.
57C Yum i wentajet c lum yic'ot c chubʌ'an.
Tsa cʌc'ʌ c bʌ ti' jac'ol a t'an.
58Ti pejtelel c pusic'al mij c'ajtibeñet,
Pʌsbeñon a wutslel che' bajche' tsa' wʌlʌ.
59Tsac ña'ta bajche' añon. Tsac sutq'ui c bʌ cha'an mic cha' tsajcan jini tsa' bʌ a wʌlʌ.
60Tsac se'ñu c bʌ cha'an mic jac'beñet a mandar.
61Anquese mi' chucoñob jini jontolo' bʌ che' bajche' ti yac,
Ma'anic mi' ñajʌyel tic pusic'al a cʌntesa.
62Ti yojlil ac'ʌlel mic ch'ojyel cha'an mic subeñet wocolix a wʌlʌ
Come toj bajche' ma' mel.
63I pi'ʌlon pejtel mu' bʌ i bʌc'ñañet.
I pi'ʌlon jini mu' bʌ i jac'ob a cʌntesa.
64C Yum, pam pujquem a wutslel ti pañimil.
Cʌntesañon ti a ts'ijbujel.
65Uts'at bajche' tsa' mele ti' tojlel a winic,
Che' bajche' tsa' wʌlʌ, c Yum.
66Aq'ueñon c ña'tʌbal cha'an mic ch'ʌmben isujm,
Come mi cʌc' ti ñuc a mandar.
67Che' maxto anic tsa cubi wocol tsac xoyo c bijlel.
Wʌle wolix c jac'beñet a t'an.
68Uts'atet, uts'at chuqui wola' mel.
Cʌntesañon ti a ts'ijbujel.
69Jini chan bʌ mi' melob i bʌ woli' jop'ob t'an tij contra.
Pero joñon wolic jac' a mandar ti pejtelel c pusic'al.
70Mach mejlicob i ch'ʌmbeñob isujm a t'an,
Pero joñon tijicñayon cha'an a mandar.
71Uts'at tsa' ju'sʌbeyon c pusic'al yic'ot wocol
Cha'an mic p'is tic wenta a ts'ijbujel.
72Ñumen uts'at mij q'uel a cʌntesa
Bajche' cabʌl oro yic'ot sʌsʌc taq'uin.
73I melbalon a c'ʌb.
Tsa' meleyon che' bajche' yom a pusic'al.
Aq'ueñon c ch'ʌmben isujm cha'an mic jac' a mandar.
74Jini mu' bʌ i bʌc'ñañet tijicña mi caj i q'uelon,
Come mic pijtan i ts'ʌctesʌntel.
75Cujil toj ma' cha'len meloñel, c Yum.
Tsa' wʌq'ueyon wocol ti' xuc'tilel a pusic'al cha'an ma' ju'sʌbeñon c pusic'al.
76Awocolic ñuq'uesʌbeñon c pusic'al ti a wutslel
Che' bajche' tsa' wʌn sube a winic.
77Yom ma' p'untañon cha'an cuxul mic chʌn ajñel,
Come tijicña mi cubin cha'an a cʌntesa.
78La' i yubinob quisin jini chan bʌ mi' melob i bʌ,
Come tsi' jop'oyob c mul.
Pero joñon mic chʌn ña'tan a t'an.
79Jini mu' bʌ i bʌc'ñañet la' tilic quic'ot.
Mi caj j cʌntesan ti a t'an.
80La' c mel ti jump'ejl c pusic'al bajche' ts'ijbubil.
Che' jini ma'anic mi caj cubin quisin.
81C'uñatax pañimil come jal wolic pijtañet jinto ma' coltañon,
Pero xuc'ul to c pusic'al ti a t'an mu' bʌ caj ti ts'ʌctiyel.
82Mij c'uñ'an cha'an jal mic pijtañet jinto ma' ts'ʌctesan a t'an.
¿Baqui ora mi caj a ñuq'uesan c pusic'al?
83Lajalon bajche' pʌchi woli bʌ ti woch'an ti' buts'il c'ajc.
Pero ma'anic mi' ñajiyel c cha'an chuqui ts'ijbubil.
84¿Jayp'ejl to q'uin mic jalijel ti pañimil?
A winicon. ¿Baqui ora mi caj a wʌc'ob ti toj mulil jini mu' bʌ i tic'lañoñob?
85Chan mi' melob i bʌ mu' bʌ i ñusañob a mandar. Yomob i chucon ti yac yilal.
86Xuc'ul pejtel a mandar.
Winicob mi' lon jop'ob c mul. Coltañon.
87Colel tsi' yʌlʌ i jisayoñob pero ma'anic tsaj cʌyʌ c jac' a t'an.
88Ch'ejlesʌbeñon c pusic'al, come c'ux wola' wubiñon.
Che' jini mi caj c chʌn jac'beñet a t'an.
89Ti pejtelel ora tsʌts xuc'ul a t'an ti panchan.
90C Yum, mi caj a pʌsbeñob i xuc'tilel a pusic'al calobilob ti lajm ti lajm.
A wa'chocobal jini pañimil c'ʌlʌl wʌle.
91Anto i ye'tel. Mi' jac' a t'an.
Pejtelel melbil tac bʌ mi' yumañet.
92Machic tsac taja c tijicñʌyel ti a t'an,
Tsa' jiliyon cha'an cabʌl c wocol.
93Ti pejtelel ora ma'anic mi caj i ñajʌyel tic pusic'al a t'an.
Chʌn cuxulon to come tsa' ch'ejlesayon ti a t'an.
94A cha'añonix, coltañon come tsa cʌc'ʌ c bʌ
Cha'an mic mel chuqui awom.
95Jini jontolo' bʌ woli' chijtañoñob cha'an yomob i jisañon,
Pero joñon wolic chʌn ac' tic wenta chuqui tsa' wʌlʌ.
96Tsa'ix j q'uele ba' jaxʌl i mojonlel pejtel chuqui tac an ti pañimil,
Pero ma'anic i p'isol a mandar.
97Cabʌl mij c'uxbin a t'an.
Mic chʌn ña'tan c'ʌlʌl mi' sʌc'an c'ʌlʌl mi' yic'an.
98Ñumen an c na'tʌbal bajche' j contrajob,
Come joñon mic chʌn ña'tan a mandar ti pejtelel ora.
99Ñumen cabʌl mic ch'ʌmben isujm bajche' pejtel mu' bʌ i cʌntesañoñob,
Come mi cotsan tic pusic'al jini tsa' bʌ a wʌlʌ.
100Ts'ita jach mi' ch'ʌmbeñob isujm jini ñoxobix bʌ,
Pero cabʌl mic ch'ʌmben isujm cha'an ti' jac'ol a t'an.
101Ma'anic tsac jac'ʌ c pʌyol ti mulil
Cha'an com c jac'beñet a t'an.
102Ma'anic tsaj cʌyʌ jini bij tsa bʌ a pʌsbeyon,
Come cʌntesʌbilon a cha'an.
103Tsajatax mi cubin a t'an.
Ñumen tsaj bajche' chab.
104Ya' tilem c ña'tʌbal cha'an jini tsa' bʌ a tsictesa.
Jini cha'an mic ts'a'len pejtel chuqui tac mach isujmic.
105Jini a t'an lajalʌch bajche' lámpara cha'an coc.
I sʌclelʌch c bijlel.
106Tsa'ix cʌc'ʌ c t'an.
Mi caj c jac'beñet, come toj ma' cha'len meloñel.
107C'ax cabʌl woli cubin wocol.
C Yum, cha' ch'ejlesʌbeñon c pusic'al yic'ot a t'an.
108Ch'ʌmʌ c t'an che' bajche' a majtan che' mic subeñet wocolix a wʌlʌ ti pejtelel c pusic'al, c Yum.
Cʌntesañon chuqui awom.
109Bele q'uin bʌbʌq'uen mic chʌmel,
Pero mach ñajʌyic tic pusic'al a t'an.
110Tsi' chajpayob yac jini jontolo' bʌ cha'an mi' chucoñob,
Pero xuc'ulon ti a t'an.
111Mach jilic tic pusic'al ti pejtelel ora jini tsa' bʌ a tsictesa.
I tijicñʌyelʌch c pusic'al.
112Tsa'ix cʌc'ʌ c pusic'al cha'an mic jac'beñet a mandar ti pejtelel ora, c'ʌlʌl mic chʌmel.
113Mic ts'a'len jini cha'p'ejax bʌ i pusic'al,
Pero c'ux mi cubin a t'an.
114C puts'ibet, c mʌctʌjibet.
Xuc'ul c pusic'al cha'an a t'an mu' bʌ caj i ts'ʌctiyel.
115Jatetla mu' bʌ la' mel jontolil, tʌts'ʌ la' bʌ ba' añon
Cha'an mi mejlel c jac'ben i mandar c Dios.
116C Yum, cʌntañon che' bajche' tsa' wʌlʌ cha'an cuxul mi cajñel.
Wolic pijtañet. Mach a wʌc'on ti quisin.
117P'ʌtesañon cha'an xuc'ul mic chʌn ajñel,
Cha'an mic jac' a mandar ti pejtelel ora.
118Ma' ts'a'len pejtel mu' bʌ i cʌyob a mandar.
Mi' wʌlʌc lotiñob i bʌ che' mi' cha'leñob lot.
119Chocbilob a cha'an pejtel jini jontolo' bʌ ti pañimil
Che' bajche' i sujl trigo.
Jini cha'an mij c'uxbin a t'an.
120Tsiltsilñayon come mic bʌc'ñañet.
Mic bʌc'ñañet che' ma' cha'len meloñel.
121Tsa'ix c mele chuqui tac toj chuqui tac wen.
Mach a wʌc'on ti' wenta jini mu' bʌ i tic'lañon.
122Yom ma' ch'ʌmon ti a wenta cha'an ma' wʌq'ueñon c wenlel.
Mach a wʌc'on ti' wenta mu' bʌ i chañ'esañob i bʌ.
123Wolic lujb'an c pijtan j coltʌntel.
Cujil mi caj i wersa ts'ʌctiyel a t'an.
124A winicon, pʌsbeñon i yutslel a pusic'al.
Cʌntesañon cha'an mic jac' a mandar che' bajche' ts'ijbubil.
125A winicon, aq'ueñon c ch'ʌmben isujm a t'an
Cha'an mic mel che' bajche' tsa' wʌlʌ.
126C Yum i yorajlelix ma' cha'len meloñel,
Come tsa'ix i ñusayob a ley.
127Jini cha'an ñumen c'ux mi cubin a mandar bajche' oro.
Isujm, ñumen c'ux mi cubin bajche' i t'ojol jax bʌ oro.
128Jini cha'an mic sub toj pejtel a t'an.
Mic ts'a'len pejtelel chuqui tac mach isujmic.
129Uts'atax a t'an.
Jini cha'an mic jac' ti pejtelel c pusic'al.
130Che' mi' tsictesʌntel a t'an ma' wʌq'ueñon lojon c ch'ʌmben isujm.
Ma' wʌq'uen i ña'tan pañimil jini uts bʌ i pusic'al.
131Wen cabʌl jax c wi'ñal
Cha'an com cubin a mandar ti pejtelel c pusic'al.
132Sutq'uin a bʌ ba' añon. Pʌsbeñon a wutslel,
Come i tilelʌch che'ʌch ma' melbeñob mu' bʌ i c'uxbiñob a c'aba'.
133Toj'esañon majlel cha'an a t'an.
Mach ma' wʌc'on ti yajlel ti mulil.
134Loc'sañon ti' p'ʌtʌlel jini mu' bʌ i tic'lañon,
Cha'an mic jac'beñet che' bajche' tsa' cʌntesayon.
135Yom tijicña a wut ma' q'uelon.
Cʌntesañon ti pejtelel a mandar.
136Woli ti wen loq'uel i ya'lel c wut cha'an i mul winicob x'ixicob
Come ma'anic mi' jac'ob a t'an.
137Tojet c Yum, toj ma' cha'len meloñel.
138Mach jelchojquic a t'an tsa' bʌ a wʌlʌ. Wen xuc'ul.
139Jisʌbilon cha'an c bʌxlel ti a we'tel,
Come tsa' ñajʌyi a t'an ti' pusic'al j contrajob.
140Tsa' wʌc'ʌ ti tsictiyel i sʌclel a t'an.
A winicon, mij c'uxbin a t'an.
141Wolij q'uejlel ti ch'o'ch'oc. Wolic ts'a'lentel.
Pero mach ñajʌyic tic pusic'al a t'an.
142Tojet ti pejtelel ora, isujm a cʌntesʌbal.
143Chuculonix ti wocol yic'ot tsic pusic'al,
Pero tijicña c pusic'al cha'an a mandar.
144Toj ti pejtelel ora jini tsa' bʌ a wʌlʌ.
Aq'ueñon c ch'ʌmben isujm cha'an cuxul mic chʌn ajñel.
145Ti wocol t'an mij c'ajtibeñet,
C Yum, jac'beñon. Mi caj c jac'beñet a mandar.
146C'am mic pejcañet.
Coltañon come mic jac'beñet a t'an.
147Ti wen seb to mic pejcañet.
Mic xuc'chocon c pusic'al ti a t'an mu' bʌ caj i ts'ʌctiyel.
148Cañal c wut ti ac'ʌlel
Cha'an mij c'ajtesan a t'an tic pusic'al.
149Jac'beñon c t'an ti' yutslel a pusic'al.
C Yum, cha' ch'ejlesʌbeñon c pusic'al yic'ot a t'an.
150Lʌc'ʌl añob jini jontolo' bʌ tic t'ejl cha'an mi' tic'lañon.
Ñajt añob ba' añet come ma'anic mi' jac'ob a mandar.
151Pero jatet c Yum, lʌc'ʌlet.
Pejtel a mandar puro isujm.
152C'ʌlʌl ti wajali ña'tʌbil c cha'an jini tsa' bʌ a wʌlʌ.
Cujil tsa' wʌc'ʌ a t'an cha'an mi' yajñel ti pejtelel ora.
153Q'uele c wocol, loc'sʌbeñon.
Come ma'anic mi' ñajʌyel tic pusic'al a t'an.
154Tsictesañon ti toj, coltañon.
Cha' ch'ejlesʌbeñon c pusic'al yic'ot a t'an.
155Mach i tajayobic i coltʌntel jini jontolo' bʌ,
Come mach yomobic i jac'ob a mandar.
156C Yum, wen awujil p'untaya.
Cha' ch'ejlesañon yic'ot a t'an.
157Cabʌlob j contrajob woli bʌ i tic'lañon.
Pero ma'anic tsac wis cʌyʌ jini tsa' bʌ a wʌlʌ.
158Mich' mij q'uel jini xñusa t'añob. Mic ts'a'leñob,
Come ma'anic mi' jac'ob a t'an.
159Q'ueleyon come c'ux mi cubin a t'an.
C Yum, cha' ch'ejlesañon yic'ot a wutslel.
160Junsujm jach a t'an ti pejtelel.
Toj ti pejtelel ora pejtel mu' bʌ a sub.
161Anquese ma'anic c mul mi' tic'lañoñob yumʌlob,
Pero mij q'uel ti ñuc a t'an.
162Wen tijicñayon cha'an a t'an,
Che' bajche' jini mu' bʌ i taj cabʌl chubʌ'añʌl.
163Mic ts'a'len lot,
Pero mij c'uxbin a t'an.
164Ti jujumuc' mic sub a ñuclel ti jujump'ejl q'uin,
Come toj chuqui ma' wʌl.
165Cabʌl i ñʌch'tilel i pusic'al jini mu' bʌ i c'uxbiñob a t'an.
Ma'anic mi' jats'ob i yoc che' mi' cha'leñob xʌmbal majlel.
166Wolic pijtan j coltʌntel ti a tojlel, c Yum.
Mic jac'beñet a mandar.
167Mic jac'beñet a ley ti jump'ejl c pusic'al,
Mic wen c'uxbin.
168Mic jac'beñet a t'an yic'ot a cʌntesa
Come wen q'uelbil a cha'an pejtel chuqui mic mel.
169C Yum, ubin chuqui wolij c'ajtibeñet ti wocol t'an.
Aq'ueñon c ch'ʌmben isujm chuqui a wom.
170La' c'otic ba' añet jini woli bʌ j c'ajtibeñet.
Loc'sañon ti wocol che' bajche' tsa' wʌlʌ.
171Mi caj c sub a ñuclel,
Come wola' cʌntesañon ti a ts'ijbujel.
172La' j c'ʌyibeñet a t'an,
Come toj pejtel a mandar.
173Yom lʌc'ʌl ma' wa'tʌl cha'an ma' coltañon
Come tsac ñopo c mel che' bajche' tsa' cʌntesayon.
174C Yum, ti pejtelel c pusic'al, com ma' coltañon.
Mic tijicñesan c pusic'al ti a t'an.
175La' to ajnicon ti pañimil cha'an mic sub a ñuclel.
La' c taj j coltʌntel ti a t'an.
176Tsa' sajtiyon bajche' tiñʌme' mu' bʌ i cʌy i yum.
Sajcan a winic come ma'anic tsa' ñajʌyi tic pusic'al a mandar.
Currently Selected:
SALMOS 119: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.