SALMOS 109
109
Mi' c'ajtin i coltʌntel come an i contra
1Dios, mic sub a nuclel. Mach yomic che jach ñʌch'ʌlet.
2Come woli' contrajiñoñob jontol bʌ winicob yic'ot i lot.
Mi' jop'ob t'an tij contra.
3Mi' joyoñob ti ts'a'leya. Mi' techob leto anquese ma'anic c mul.
4C'ux mi cubiñob.
Mic tajob ti oración, pero mi' p'ajoñob.
5Che' mic pʌsbeñob cutslel mi' cha' q'uextañob jontolil.
Anquese mij c'uxbiñob mi' ts'a'leñoñob.
6La' pʌjyic ti meloñel ti' wenta jontol bʌ juez.
La' ajnic ti' wenta xjop't'an.
7Che' mi' mel i bʌ ba'an juez la' i yʌq'uen i toj i mul.
La' q'uejlic ti mulil i yoración.
8La' chʌmic che' ma'anic cabʌl i jontolil.
La' wa'chocontic yambʌ cha'an mi' ch'ʌmben i ye'tel.
9La' cʌlecob ti meba' i yalobilob.
La' cʌlec ti meba' i yijñam.
10La' i cha'leñob pam xʌmbal ñumel i yalobilob.
La' i c'ajtiñob ñumel i waj che' chocbilob loq'uel ti' yotot.
11La' tilic x'ac taq'uin i chilben pejtelel i chubʌ'an cha'an i bet.
La' tilicob jini mach bʌ cʌmbilobic i cha'an i chilbeñob i c'ajbal.
12Mach mi' chʌn pʌsben i yutslel mi juntiquilic.
Mach mi' p'untʌntelob jini meba alʌlob i cha'an.
13La' jilicob i p'olbal.
La' ñajʌyic i c'aba' ti' pusic'al winicob x'ixicob che' woli' colelob i yalobilob i yalobilob.
14C Yum, ña'tʌben i jontolil i tat.
Mach yomic mi' ñajʌyel ti a pusic'al i mul i na'.
15Yom ma' chʌn ña'tan i mulob ti pejtelel ora.
La' jilic i na'tʌntel ili winic ti pañimil.
16Come ma'anic tsi' pʌsʌ i yutslel.
Tsi' chʌn tic'la jini pobrejob yic'ot jini p'ump'uño' bʌ,
Yic'ot ch'ijiyemo' bʌ i pusic'al jinto tsa' chʌmiyob.
17Cabʌl tsi' cha'le p'ajoñel, jini cha'an la' p'ajlec.
Ma'anic tsi' c'ajtibe i yutslel Dios.
Jini cha'an mach i tajayic i yutslel Dios ti pejtelel ora.
18Mi' cha'len p'ajoñel che' bajche' mi' xoj i bujc, che' bajche' mi' cha'len we'el uch'el.
19La' wʌlʌc sujtic ti' tojlel i p'ajoñel i wenta i mosil, i wenta i cajchiñʌc' mu' bʌ i cʌch ti jujump'ejl q'uin.
20Dios, yom ma' wʌq'ueñob i toj i mul jini mu' bʌ i jop'beñon c mul,
Yic'ot jini mu' bʌ i p'ajon cha'an mi cʌjq'uel ti chʌmel.
21Pero jatet, c Dios, c Yum, p'untañon cha'an ma' wʌc' ti ñuc a c'aba',
Coltañon loq'uel ti wocol ti a wutslel come wen awujil c'uxbiya.
22P'ump'uñon, cabʌl c wocol. Ch'ijiyem c pusic'al.
23Mi caj j cʌy pañimil che' bajche' mi' majlel axñal ti och'ajel q'uin.
Chocbilon che' bajche' mi lac ñijcan majlel jichitin.
24C'unix c pix cha'an wolic bi'len i bʌl c ñʌc'.
Jilemix c bʌc'tal, yajyajonix.
25Mi' wajleñoñob winicob.
Che' mi' q'ueloñob mi' yʌlob ma'anic c pijtaya.
26Aq'ueñon c p'ʌtʌlel, c Yum Dios.
Coltañon yic'ot a wutslel.
27Tsictesan a wutslel cha'an mi' laj ña'tañob
Jiñʌch a melbal, c Yum.
28Che' ma' pʌsbeñon i yutslel a t'an, ma'anic mic bʌc'ñan i p'ajoñel.
La' i yubiñob quisin jini j contrajob, pero la' ñuc'ac c pusic'al come a winicon.
29La' ts'a'lenticob j contrajob.
La' i cha'leñob quisin che' bajche' xojol bʌ i cha'an bibi' bʌ pisil, come tsi' yʌc'ʌyob i bʌ ti jontolil.
30Mi caj c suben wocolix i yʌlʌ lac Yum ti c'am bʌ t'an.
Mi caj c sub i ñuclel ti' tojlel jini tempʌbilo' bʌ.
31Come wʌ'an lac Yum ti' t'ejl jini p'ump'un bʌ
Cha'an mi' yʌc' ti colel ti' p'ʌtʌlel jini yomo' bʌ i jisan.
Currently Selected:
SALMOS 109: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.