SALMOS 103
103
Cabʌl i yutslel i pusic'al Dios
1La' c ch'ujutesan c Yum ti pejtelel c pusic'al.
La' c ch'ujutesan jini ch'ujul bʌ i c'aba' ti pejtelel c p'ʌtʌlel.
2La' c ch'ujutesan c Yum ti pejtelel c pusic'al.
Mach mi' wis ñajʌyel tic pusic'al chuqui mi' yʌq'ueñonla.
3Jiñʌch mu' bʌ i ñusʌbeñon pejtelel c mul.
Mi' lajmesʌbeñon pejtelel j c'amʌjel.
4Mi' mʌñon loq'uel ba' colel c chʌmel.
Mi' ch'ʌlon ti corona come c'ux mi' yubiñon.
5Mi' tijicñesañon yic'ot wen tac bʌ c majtan wʌ' ti pañimil cha'an mic cha' p'ʌtan che' bajche' xiye'.
6Lac Yum mi' mel ti toj jini tic'lʌbilo' bʌ.
Mi caj i q'uextʌbeñob i mul xjontolilob.
7Tsi' pʌsbe Moisés chuqui woli' ña'tan ti' pusic'al.
Tsi' pʌsbeyob israelob i melbal.
8Lac Yum mi' cha'len p'untaya, uts i pusic'al.
Jal mi' mich'an. Cabʌl mi' p'untañonla.
9Mach ti pejtelelic ora mi caj i tic'onla.
Ma'anic mi' cʌntan i mich'ajel ti pejtelel ora.
10Ma'anic tsi' yʌq'ueyonla wocol che' bajche' c'amel an lac mul.
Ma'anic tsi' q'uexta lac mul che' bajche' c'amel an.
11Come cabʌlʌch i yutslel i pusic'al che' bajche' i chanlel panchan
Ti' tojlel jini mu' bʌ i bʌc'ñañob.
12Che' bajche' i ñajtlel pañimil c'ʌlʌl ti' pasibal q'uin c'ʌlʌl ti' bʌjlibal q'uin,
Che'ʌch tsi' chocbeyonla lac mul.
13Che' bajche' winicob mi' c'uxbiñob i yalobilob,
Che' ja'el lac Yum mi' p'untan jini mu' bʌ i bʌc'ñañob.
14Come yujil c'uñonla, yujil melbilonla ti ts'ubejn.
15Poj jumuc' jach cuxulonla che' bajche' jam.
Jumuc' jach an lac wenlel che' bajche' i nich pimel.
16Che' mi' ñumel ic' mi' yajlel.
Mach chʌn tsiquilix.
17Pero i yutslel lac Yum ti pejtelel ora an.
Lac Yum mi' pʌsbeñob i yutslel yic'ot i tojel jini mu' bʌ i bʌc'ñañob yic'ot i p'olbalob ti lajm ti lajm
18Che' bajche' jaytiquil mi' jac'beñob jini xuc'ul bʌ t'an,
Mu' bʌ i ña'tañob i mel che' bajche' ts'ijbubil.
Mi' pʌsbeñob i yutslel lac Yum.
19Lac Yum tsa'ix i wa'choco i yumʌntel ya' ti panchan.
Mi' cha'len yumʌntel ti pejtelel pañimil.
20Ch'ujutesanla lac Yum, ángelob cabʌl bʌ la' p'ʌtʌlel,
Mu' bʌ la' jac'ben i t'an, mu' bʌ la' melben chuqui mi' yʌl.
21Ch'ujutesanla lac Yum pejtel i yángelob,
X'e'teletla mu' bʌ la' melben chuqui yom Dios.
22Ch'ujutesan lac Yum pejtelel i melbal,
Ti jujump'ejl tejclum ti pejtelel i yumʌntel.
La' c ch'ujutesan c Yum ti pejtelel c pusic'al.
Currently Selected:
SALMOS 103: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.