PROVERBIOS 31
31
I cʌntesʌntel jini rey
1Jiñʌch i t'an jini rey Lemuel tsa' bʌ i ñopo ti' tojlel i ña'. 2¿Chuqui wola' ña'tan calobil? ¿Chuqui a wom? Mero calobilet, tsa cʌc'ʌyet ti pañimil, tsaj c'ajtiyet ti Dios. 3Mach a taj a wixic ame a lon jisan a p'ʌtʌlel. Mach a xuc'chocon a pusic'al a wic'ot jini mu' bʌ i jisan reyob.
4Ubin Lemuel, i japol vino mach i cha'anic reyob. Jini lembal mach i cha'anic colem yumʌlob, 5ame ñajʌyic ti' pusic'al jini mandar che' woli' japob, ame mach tojic mi' cha'leñob meloñel che' mi' melob jini tic'lʌbilo' bʌ. 6La' i japob lembal jini woliyo' bʌ ti chʌmel. La' i japob vino jini wen ch'ijiyem bʌ i pusic'al. 7Che' jini mi caj i c'un ñajʌyel i wocolel i pusic'al cha'an mach chʌn c'ajalix i cha'an i wocolel.
8Mele ti uts'at jini mach bʌ mejlic i coltan i bʌ. Coltan jini p'ump'uño' bʌ woli bʌ i tic'lʌntelob. 9Cha'len toj bʌ meloñel. Meleyob ti uts'at jini mach bʌ añobic i chubʌ'an yic'ot jini p'ump'uño' bʌ.
I melbal xuc'ul bʌ x'ixic
10Wocol ti tajol wen bʌ x'ixic. Yom ñumen mi' c'uxbintel bajche' perla xajlel letsem bʌ i tojol. 11Jini i noxi'al contento mi' yʌq'uen i chubʌ'an ti' wenta come mux i p'ojlesan. 12Jini x'ixic uts'at mi' coltan i ñoxi'al ti pejtelel i jabilel. Ma'anic mi' yʌc' ti p'ump'un. 13Mi' sajcan tsuts yic'ot lino. Bʌx i c'ʌb ti e'tel ti pejtelel chuqui tac yom i pusic'al. 14Che'ʌch mi' mel jini x'ixic bajche' colem barco i cha'an xchoñoñel. Mi' q'uex ch'ʌn tilel i bʌl i ñʌc' ñajt bʌ mi' colel. 15Mi' ch'ojyel che' ac'ʌlel to. Mi' yʌq'uen i bʌl i ñʌc' pejtel año' bʌ ti' yotot yic'ot i mozojob. Mi' t'oxbeñob tac i chubʌ'an ja'el. 16Mi' q'uel jump'ej lum. Mi' mʌn ti' bajñel taq'uin, i ganar cha'an i ye'tel. Mi' pʌc' ts'usub. 17Mi' ch'ejl'an ti' ye'tel. Ma'anic mi' lujb'an i c'ʌb ti cabʌl e'tel. 18Wen yujil choñoñel yic'ot mʌñoñel. Ma'anic mi' yilol yajpel i lámpara ti ac'ʌlel.
19Mi' ñijcan i c'ʌb ti jalbal. Bʌx i c'ʌb ti ñoq'uijel. Chucul i cha'an ñoc'ʌjib. 20Mi' cha'len wersa i coltan jini pobrejob. Mi' p'ewben i chubʌ'an jini mach bʌ añobic i cha'an. 21I yalobilob ma'anic mi' bʌc'ñañob i ña'al tsʌñal, come xojolob i cha'an pim bʌ i pislel ti pejtelelob. 22Mi' yʌc' ti melol wen bʌ i pislel. Melbil i bujc ti wen i t'ojol bʌ pisil yic'ot xchʌcchab puy. 23Cʌñʌl i ñoxi'al ti meloñibʌl ba' mi' buchtʌl yic'ot jini ñoxobix bʌ ti' lumal. 24Jini x'ixic mi' jale' pisil. Mi' choñe'. Mi' mel cajchiñʌc'ʌl. Mi' yʌq'uen i chon xchoñoñel.
25Añʌch i p'ʌtʌlel yic'ot i c'uxbintel i wenta i ch'ʌjlil. Tijicña i pusic'al. Ma'anic chuqui mi' bʌc'ñan. 26Tsiquil an cabʌl i pusic'al che' mu' ti t'an. Tsiquil i yutslel i pusic'al che' mi' cha'len cʌntesa. 27Mi' chʌcʌ q'uel bajche' mi' melob jini año' bʌ ti' yotot. Ma'anic i ts'u'lel. Mach to'ol we'elic jach woli. 28Che' winicobix i yalobilob uts'atax mi' q'uelob i ña'. I ñoxi'al ja'el uts'atax mi' q'uel i yijñam. 29Mi' yʌlob: Uts'at tsi' meleyob cabʌl x'ixicob pero jatet ñumen uts'at tsa' mele, che'ob.
30Anquese i t'ojol jax x'ixic lolom jach i t'ojlʌwel. Mach ti pejtelelic ora an. Jini x'ixic mu' bʌ i bʌc'ñan lac Yum mi caj i taj i c'uxbintel ti isujm. 31La' melbentic che' bajche' tsi' melbeyob i pi'ʌlob. La' c'uxbintic cha'an i melbal ti' tojlel winicob x'ixicob.
Currently Selected:
PROVERBIOS 31: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.