PROVERBIOS 27
27
1Mach a lon ña'tan chuqui mi caj a mel ijc'ʌl, come mach a wujilic chuqui mi' caj ti ujtel ijc'ʌl. 2La' i sub a ñuclel yambʌ. Mach a wʌlʌc sub a ñuclel jatet. La' i sub yambʌ. Mach yomic ma' sub ti a bajñelil. 3Alatax xajlel, wen al jini ji', pero ñumen wocol ti cuchol i mich'ajel jini tonto bʌ. 4Jontol jax jini woli bʌ ti mich'ajel. Bʌbʌq'uen ja'el. Pero ñumen wocol ti cuchol jini tsʌytsʌña jax bʌ i pusic'al. 5Jini mu' bʌ i tsictesʌbeñonla lac mul ñumen an i c'ʌjñibal lac cha'an bajche' jini mu' bʌ i c'uxbiñonla ti mucul. 6Mi' c'uxbiñonla jini mu' bʌ i jec'onla ti isujm bʌ t'an. Mi' contrajiñonla jini xlotiya mu' bʌ i ts'ujts'ubeñonla lac wut. 7Jini ñajix bʌ mach yomic i q'uel chab, pero jini am bʌ i wi'ñal tsaj mi' yubin pejtel i bʌl i ñʌc' yic'ot ja'el jini ch'aj bʌ. 8Che' bajche' te'lemut mu' bʌ i ñajt cʌy i c'u', che'ʌch jini winic ñajt bʌ mi' cʌy i yotot. 9Jini aceite yic'ot perfume mi' ñuq'uesʌbeñonla lac pusic'al. Che'ʌch ja'el laj cʌñʌ bʌ mu' bʌ i toj'esañonla ti uts bʌ t'an. 10Mach a cʌy a c'uxbin a cʌñʌ bʌ yic'ot jini c'uxbibil bʌ ti a tat. Mach majliquet ti' yotot a wʌscun ñajt bʌ chumul che' an a wocol. Ñumen mi mejlel i coltañet a cʌñʌ bʌ lʌc'ʌl bʌ i chumlib bajche' a wʌscun ñajt bʌ chumul. 11Yom p'ip' a pusic'al calobil. Ñuq'uesʌbeñon c pusic'al. Che' jini uts'at mi caj i q'uelon jini tsa' bʌ i p'ajayon. 12Jini cʌntesʌbil bʌ mi' ña'tan chuqui bʌbʌq'uen mi' yujtel. Mi' chajpan i bʌ. Jini tonto bʌ ma'anic mi' yotsan ti' pusic'al. Muq'uix i toj. 13Chilben i bujc mu' bʌ i yotsan i bʌ i tojben i bet xbeta taq'uin. Ñup'u mi ma'anic tsi' tojbe i bet jini mach bʌ i cʌñʌyic. 14Jini mu' bʌ i pejcan i cʌñʌ bʌ ti c'am bʌ t'an che' ac'ʌlel to, lajal i t'an yubil che' bajche' p'ajoñel. 15Jini x'ixic woli bʌ ti a'leya lajalʌch bajche' chʌc'chʌc'ña bʌ ja' che' woli ja'al. 16Lajalʌch jini x'ixic bajche' ic'. Mi tsa' lac tiq'ui mach i jac'ʌyic i tic'ol. Lajalʌch bajche' aceite lʌmʌl bʌ ti ñoj bʌ laj c'ʌb. Mach mejlic ti mujquel. 17Che' bajche' mi laj c'ʌn rima cha'an mi lac jay'esan machit, che' ja'el mi lac sajcan lac pi'ʌlob cha'an mi' ñuc'an lac pusic'al. 18Jini mu' bʌ i cʌntan higuerate' mi caj i c'uxben i wut. Jini mu' bʌ i wen cʌntʌben i chubʌ'an i yum mi caj i c'uxbintel. 19Che' bajche' mi laj q'uel lac wut ti ja', che' ja'el mi lac cha' q'uel lac bʌ ti lac pi'ʌlob, come junsujm jach lac pusic'al. 20An cha'chajp mach bʌ yujilic jastiyel: I yajñib chʌmeño' bʌ yic'ot i pusic'al winicob x'ixicob. Pejtel ora anto yom i cha'añob. 21Jini c'ajc mi' tsictesan plata yic'ot oro. Che' ja'el lac pi'ʌlob mi' tsictesʌbeñonla lac pusic'al. 22Mach loq'uic i p'ajomal jini tonto bʌ mi ti molino mi tsa' tem juch'u yic'ot trigo. 23Yom bʌxet a q'uel a wʌlac'. Cha'len wersa cha'an ma' cʌntan a wacax. 24Come mach ti pejtelelic ora mi' jalijel lac chubʌ'an. Che' ja'el i p'olbal rey laj bʌ i c'aba' ma'anic mi' jalijel ti' buchlib rey ti pejtelel ora. 25Mi' tiquin jam. Mi' cha' colel i yal. Mi lac tsep. Mi lac tempan ochel ti mal. 26Jini tiñʌme' mi' yʌq'ueñonla i tsutsel cha'an lac pislel. Jini tat chivo mi' yʌq'ueñonla i tojol jamil. 27Jini ña' chivo mi' yʌq'ueñonla lech cha'an mi lac jap yic'ot lac pi'ʌlob año' bʌ ti la cotot yic'ot x'e'telob lac cha'an.
Currently Selected:
PROVERBIOS 27: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.