YouVersion Logo
Search Icon

PROVERBIOS 18

18
1Jini mu' bʌ i tʌts' loq'uel i bʌ ba'an i pi'ʌlob woli' ña'tan i mel chuqui yom i bajñel pusic'al. I contrajʌch weño' bʌ i pusic'al. 2Jini tonto bʌ mach i t'ojolic mi' q'uel jini am bʌ i ña'tʌbal. I t'ojol jax mi' lon q'uel chuqui mi' loq'uel ti' bajñel pusic'al. 3Ya' ba'an sajtem bʌ an ts'a'leya. Ya' ba'an xp'ajoñel an a'leya. 4I t'an jini am bʌ i ña'tʌbal lajalʌch bajche' tam bʌ ja'. Lajal an i c'ʌjñibal lac t'an bajche' ja' mu' bʌ i wʌjlel loq'uel ti' loq'uib cha'an mi' lajmesʌbeñonla lac tiquin ti'. Lajalʌch bajche' colem pa' mu' bʌ i bujt'el. 5Mach yomic mi la cʌc' ti colel jini am bʌ i mul anquese uts'at i pusic'al yilal. Mach yomic mi lac tic'lan jini toj bʌ che' mi' mel i bʌ. 6Jini tonto bʌ mi' c'ʌn i yej cha'an mi' tech cabʌl a'leya. La' bajbentic ti asiyal cha'an i mul. 7Cha'an ti' mul i yej mi' yʌlol jisan i bʌ jini tonto bʌ. Lajalʌch i t'an bajche' yac mu' bʌ caj i chuc. 8Lajalʌch i t'an xjopt'an bajche' sumuc bʌ i bʌl lac ñʌc'. Mi' laj xaxañonla. 9Jini ts'u' bʌ ti e'tel i pi'ʌlʌch jini mu' bʌ i yʌc' ti jilel i chubʌ'an. 10I c'aba' lac Yum i wentajʌch p'ʌtʌl bʌ otot ts'ajquibil bʌ. Muq'uix i ñochtan ti ajñel jini toj bʌ. Muq'uix i yochel i taj i coltʌntel. 11Jini wen chumul bʌ lajal mi' lon q'uel i chubʌ'an bajche' p'ʌtʌl bʌ tejclum ba' mi' lon ña'tan i coltan i bʌ. Mi' lon al ti' pusic'al lajalʌch i chubʌ'an bajche' chan bʌ ts'ajc mu' bʌ i mʌctan wocol. 12Ñuc mi' lon q'uel i bʌ jini mu' bʌ caj i yʌjq'uel ti quisin. Utsʌch i pusic'al jini mu' bʌ caj i wa'chocontel. 13Jini mu' bʌ i jac' t'an che' maxto ubibilic i cha'an mi' caj ti quisin cha'an i tontojlel. 14Jini xuc'ul bʌ i pusic'al ti Dios mi' cuch i wocol, pero mach chʌn cujchix i cha'an che' mi' jilel i xuc'tʌlel. 15Jini mu' bʌ i ch'ʌmben isujm mi' yutsi taj i ña'tʌbal. Jini wen bʌ i pusic'al mi' wen jac' i cʌntesʌntel. 16Jini mu' bʌ i yʌq'uen i majtan am bʌ i ye'tel woli' chajpan majlel i bijlel cha'an mi' pʌjyel ochel ti' tojlel jini ñuco' bʌ. 17Toj mi' lon q'uejlel jini ñaxan to bʌ mi' sub i bʌ ti' tojlel am bʌ i ye'tel. Ti wi'il tal i contra i tsictesan. 18Anquese p'ʌtʌlob mu' bʌ i cha'leñob leto, mi' lajmel leto ba' ora mi' cha'leñob yajcaya ti jun. Che' jini mi' yʌc'ob i bʌ ti' wenta Dios cha'an mi' pʌsbeñob bajche' yom mi' melob. 19Che' an mu' bʌ i mich'len i yeran, ñumen tsʌtsʌch bajche' p'ʌtʌl bʌ tejclum. Lajalʌch bajche' i yoyel colem otot. 20Jini uts bʌ i t'an mi caj i taj i tijicñʌyel i pusic'al. Jini mach bʌ wenic i t'an muc'ʌch i toj. 21An cha'chajp lac p'ʌtʌlel ti t'an. Cha'an ti lac t'an mi la cʌc' ti chʌmel. Cha'an ti lac t'an mi la cʌc' ti colel. An lac chobejtʌbal ti chajp ti chajp bajche' jach mi laj c'ʌn la cac'. 22Jini mu' bʌ i pʌy i yijñam mi' taj i tijicñʌyel. Mi' tajben i yutslel lac Yum. 23Jini mach bʌ anic i chubʌ'an mi' c'ajtin ti wocol t'an, pero wocol mi' jac' jini wen chumul bʌ. 24An mu' bʌ i lon c'uxbiñonla che' an chuqui yomob i taj ti lac tojlel, pero an mu' bʌ i c'uxbiñonla ti isujm ñumen bajche' lac pi'ʌlob.

Currently Selected:

PROVERBIOS 18: ctuBI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy