NUMEROS 25
25
Jini israelob tsa' majliyob ba'an Baalpeor
1Che' ya' to chumulob israelob ti Sitim, jini winicob tsa' caji i melob i ts'i'lel yic'ot x'ixicob año' bʌ ti Moab. 2Come jini año' bʌ ti Moab tsi' pʌyʌyob winicob israelo' bʌ cha'an mi' melob q'uin che' bʌ tsi' pulbeyob i majtan i dioste' tac. 3Jini israelob tsa' caji i ch'ujutesañob Baalpeor. Jini cha'an lac Yum tsi' mich'le israelob. Tsa' cajiyob ti chʌmel.
4Lac Yum tsi' sube Moisés: Tempan pejtelel winicob ñuc taco' bʌ i ye'tel cha'an ma' jich'ob tic tojlel che' ti q'uiñil. Che' jini mi' caj ti lajmel c mich'ajel ti' tojlel israelob, che'en lac Yum. 5Jini cha'an Moisés tsi' subeyob jini juezob ti Israel: Yom mi la' tsʌnsan pejtelel jini winicob tsa' bʌ i ch'ujutesayob Baalpeor, che'en. 6Juntiquil winic israel bʌ tsi' pʌyʌ tilel x'ixic ch'oyol bʌ ti Madián, che' woli' q'uelob Moisés yic'ot pejtelel israelob che' woliyob ti uq'uel ya' ti' ti' Tabernáculo. 7Che' bʌ tsi' q'uele Finees (i yalobil Eleazar, i yalobil jini motomaj Aarón), tsa' majli i tajob ti ora, chucul i cha'an lanza ti' c'ʌb. 8Tsi' tsʌcle majlel jini winic c'ʌlʌl ti' mal i yotot. Tsi' laj jisayob ti lanza. Tsa' ochi jini lanza ti' pat jini winic. Tsa' c'ʌlʌ ñumi ti' ñʌc' ja'el jini x'ixic. Che' jini tsa' lajmi i mich'ajel Dios. Tsa' tijq'ui ti chʌmel jini israelob. 9Pero tsa' chʌmiyob che' bajche' uxpijc (24,000) winicob.
10-11Che' jini lac Yum tsi' sube Moisés: Jini Finees i yalobil Eleazar i yalobil jini motomaj Aarón, tsa'ix i yʌc'ʌ ti lajmel c mich'ajel ti' tojlel israelob, come tsi' ts'a'le jini winic che' bajche' joñon. Tsi' jisa jini tsa' bʌ i ñusʌbeyon c t'an. Jini cha'an ma'anix tsac chʌn jisayob jini israelob tic mich'ajel. 12-13Jini cha'an suben: Wolic cha' aq'uen c t'an Finees cha'an mi caj cotsan ti motomaj yic'ot i yalobilob c'ʌlʌl ti pejtelel ora, come tsi' pʌsʌ i bʌxlel cha'añon Dioson bʌ. Tsi' yʌc'ʌ ti tojtʌl i mul israelob, che'en. 14I c'aba' jini winic tsa' bʌ tsʌnsʌnti yic'ot jini xch'oc bʌ madián jiñʌch Zimri i yalobil Salu, am bʌ i ye'tel ti junmojt i p'olbal Simeón. 15I c'aba' jini xch'oc loq'uem bʌ ti Madián jiñʌch Cozbi, xch'oc bʌ i yalobil Zur, am bʌ i ye'tel ti Madián.
16-18Lac Yum tsi' sube Moisés: Yom ma' tech guerra ti' tojlel jini madiañob cha'an ma' jisañob, come mi' soquetla ti mulil. Sojquemobix cabʌl israelob cha'an tsi' ch'ujutesayob Baalpeor. Asibilob cha'an Cozbi, xch'oc bʌ i yalobil jini am bʌ i ye'tel ti Madián. Jiñʌch tsa' bʌ tsʌnsʌnti ya' ti Peor che' bʌ tsa' ñumi jini bʌbʌq'uen bʌ chʌmel, che'en lac Yum.
Currently Selected:
NUMEROS 25: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.