NUMEROS 23
23
1Che' jini Balaam tsi' sube jini rey: Melbeñon wucp'ejl pulʌntib ilayi. Yom ja'el ma' chajpʌbeñon wuccojt alʌ tat wacax, yic'ot wuccojt tat tiñʌme'. 2Balac tsa' caji i mel che' bajche' tsi' sube Balaam. Temel tsi' yʌc'ʌyob jujuncojt alʌ tat wacax yic'ot jujuncojt tat tiñʌme' ti jujump'ejl pulʌntib. 3Balaam tsa' caji i suben: Wa'i to ti' t'ejl jini majtañʌl woli bʌ a wʌq'uen lac Yum jinto mic cha' tilel, come an ba' mic majlel. Tic'ʌl mux i tilel i tajon lac Yum. Che' jini mic cha' tsictesʌbeñet chuqui mi' subeñon, che'en. Tsa' majli Balaam. 4Lac Yum tsa' tili i taj. Balaam tsi' sube lac Yum: Wucp'ejl pulʌntib tsac tsol wa'chocobeyet. Ti jujump'ejl pulʌntib tsac pulu alʌ tat wacax yic'ot tat tiñʌme', che'en. 5Lac Yum tsi' sube: Cha' cucux ba'an jini rey Balac. Yom ma' suben ili t'an mu' bʌ c subeñet, che'en. 6Balaam tsa' cha' majli ba'an Balac, ba' añob jini ñuc taco' bʌ i ye'tel ti Moab. Wa'alob ti' t'ejl pulʌntib ba' tsi' puluyob majtañʌl. 7Tsa' caji ti t'an Balaam:
C'ʌlʌl ti Aram tsi' choco majlel winicob Balac cha'an mi' pʌyon tilel. Jiñʌch rey ti Moab, chumul bʌ ti wits ti' tojel i pasibal q'uin. Tsi' subeyon: Yom ma' tilel cha'an ma' p'aj i p'olbalob Jacob cha'an ma' p'aj jini israelob, che'en. 8¿Bajche' mi caj c lon mich'len jini winicob che' mach mich'ic Dios? ¿Bajche' mi caj c lon a'leñob winicob che' ma'anic woli' yʌ'leñob lac Yum? 9Come ya' ti' pam jini chan bʌ xajlel tsac ñajti q'ueleyob. Wʌ' ti chan bʌ wits wen tsiquilob. Ili winicob i bajñel chumulob. Ma'anic mi' xʌbob i bʌ yic'ot yan tac bʌ winicob. 10¿Majqui mi mejlel i tsicben i p'olbal Jacob? Lajalob bajche' i ts'ubeñal lum mach bʌ mejlic ti tsicol. Che' bajche' mi' chʌmelob jini tojo' bʌ, la' chʌmicon. Tijicñayon che' muq'uic c jilel che' bajche'ob.
Che' tsi' yʌlʌ Balaam.
11Che' jini Balac tsi' sube: ¿Chuqui jini tsa' bʌ ujti a mel tic tojlel? Come tsac pʌyʌyet tilel cha'an ma' wʌ'len j contrajob, pero tsa'ix a wʌq'ueyob i yutslel a t'an, che'en. 12Balaam tsi' jac'ʌ: Tic'bilon ti isujm. Jini jach mi cʌl jini t'an mu' bʌ i subeñon lac Yum, che'en.
13Balac tsi' sube: Conla ti yambʌ ajñibʌl ba' mi caj a q'uel lamital jini israelob, ba' mach laj tsiquilobic. Awocolic, aq'ueñob wocol jini lʌc'ʌl bʌ jomolob ti a tojlel, che'en. 14Che' jini Balac tsi' pʌyʌ majlel Balaam ya' ti' jamil xq'uelojelob. Tsa' letsiyob ya' ti chan bʌ wits i c'aba' Pisga. Ya' ti' pam wits Balac tsi' yʌc'ʌ ti melol wucp'ejl pulʌntib. Tsi' yʌc'ʌ jujuncojt alʌ tat wacax yic'ot tat tiñʌme' ti jujump'ejl jini pulʌntib. 15Che' jini Balaam tsi' sube Balac: Wa'i to ti' tojel ili pulʌntib ba' wola' wʌc' majtañʌl, come mu' to c majlel cubin chuqui mi' yʌl lac Yum, che'en. 16Lac Yum tsa' tili i taj Balaam. Tsi' sube chuqui yom mi' yʌl. Tsi sube: Cha' cucux ba'an Balac cha'an ma' suben chuqui mic subeñet, che'en. 17Balaam tsa' c'oti i taj Balac yic'ot jini año' bʌ i ye'tel ti Moab. Ya'to wa'alob ba' p'ulul jini majtañʌl. Balac tsi' c'ajtibe: ¿Chuqui tsi' yʌlʌ lac Yum? che'en. 18Che' jini Balaam tsa' caji ti t'an:
Tejchen ti ora, Balac, i yalobilet bʌ Zipor cha'an ma' ñich'tʌbeñon c t'an. 19mach lajalic Dios bajche' winicob yujilo' bʌ lot. Mach lajalic bajche' jini cha'chajp jax bʌ i pusic'al mu' bʌ i q'uextan i t'an. Che' mi' yʌc' i t'an, ¿mach ba anic mi' ts'ʌctesan? Che' tsa'ix i subu chuqui mi caj i cha'len, ¿mach ba anic mi' mel? 20Awilan tsi' yʌq'ueyon tic wenta cha'an mi cʌq'ueñob i yutslel c t'an jini israelob. Come lac Yum tsa'ix i yʌq'ueyon i yutslel i t'an. Mach mejlic j q'uextan. 21Come ma'anic mi' tajbeñob i mul i p'olbalob Jacob ti' tojlel lac Yum. Ma'anic mi' q'uelbeñob i jontolil jini israelob. Come ya' añob yic'otob lac Yum Dios cha'an mi' yumañob. 22Dios tsi' pʌyʌyob loq'uel ti Egipto. Jini cha'an p'ʌtʌlob che' bajche' bajlum. 23Ma'anic xwujtob mu' bʌ mejlel i contrajiñob Jacob. Ma'anic jini payxo x'alt'añob mu' bʌ mejlel i p'ajob. Mux caj i tsictiyel, Dios mi' contrajin xjontolilob ti ñuc bʌ i p'ʌtʌlel. 24Melel jini israelob mi caj i tejchelob che' bajche' i ña' bajlum mach bʌ anic mi' c'aj i yo jinto mi' c'ux i we'el, jinto mi' japben i ch'ich'el jini tsʌnsʌbil bʌ.
Che' tsi' yʌlʌ Balaam.
25Balac tsi' jac'ʌ: Mi ma'anic mi caj a p'ajob, yom ma' ñʌjch'el. Mach a wʌq'ueñob i yutslel a t'an, che'en. 26Balaam tsi' sube: ¿Mach ba anic tsac subeyet wersa mi caj c sub jini t'an mu' bʌ i subeñon c Yum? che'en. 27Balac tsi' sube ti wocol t'an: Conla ti yambʌ ajñibʌl mu' bʌ caj c pʌsbeñet. Tic'ʌl mi ya'i Dios mi caj i jac' chuqui com cha'an mi' yʌq'ueñet a p'ʌtʌlel ti p'ajoñel, che'en. 28Jini cha'an Balac tsi' pʌyʌ majlel Balaam ti' pam chan bʌ wits i c'aba' Peor, am bʌ ti' tojel jini colem bʌ i tiquiñal pañimil. 29Balaam tsi' cha' sube: Yom ma' mel yambʌ wucp'ejl pulʌntib. Chajpan ja'el wuccojt alʌ tat wacax, yic'ot wuccojt tat tiñʌme', che'en. 30Jini cha'an Balac tsi' mele che' bajche' tsi' sube Balaam. Tsi' yʌc'ʌ juncojt alʌ tat wacax yic'ot juncojt tat tiñʌme' ti jujump'ejl pulʌntib.
Currently Selected:
NUMEROS 23: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.