NUMEROS 2
2
Jini yumʌlob ti jujunmojt israelob
1-2Lac Yum tsi' pejca Moisés yic'ot Aarón: Pejtelel jini israelob la' chumlecob ti mojt ti mojt ti' t'ejl i bandera. Yom mi' wa'chocoñob pisil bʌ i yotot ti' tojel Tabernáculo ti' joytʌlel. 3-31Tsa' ajniyob ti mojt ti mojt che' bajche' iliyi:
I p'olbal Judá tsa' ajniyob ti' tojel Tabernáculo ba' mi' pasel q'uin. I yum jiñʌch Naasón (i yalobil Aminadab). Ti pejtelel añob 74,600. I p'olbal Isacar tsa' ajniyob ti' t'ejl Judá. I yum jiñʌch Natanael (i yalobil Zuar). Ti pejtelel añob 54,400. I p'olbal Zabulón tsa' ajniyob ti' t'ejl Isacar. I yum jiñʌch Eliab (i yalobil Helón). Ti pejtelel añob 57,400.
Ti pejtelel año' bʌ ti' tojlelob Judá jiñobʌch 186,400. Ñaxan tsa' majliyob jini uxmojt che' bʌ tsa' cajiyob ti xʌmbal majlel jini israelob.
I p'olbal Rubén tsa' ajniyob ti' tojel Tabernáculo ti sur. I yum jiñʌch Elisur (i yalobil Sedeur). Ti pejtelel añob 46,500. I p'olbal Simeón tsa' ajniyob ti' t'ejl Rubén. I yum jiñʌch Selumiel (i yalobil Zurisadai). Ti pejtelel añob 59,300. I p'olbal Gad tsa' ajniyob ti' t'ejl Simeón. I yum jiñʌch Eliasaf (i yalobil Reuel). Ti pejtelel añob 46,650.
Ti pejtelel año' bʌ yic'ot Rubén jiñobʌch 151,450. Ti wi'il tsa' majliyob ili uxmojt bʌ baqui ora tsi' techeyob xʌmbal Judá yic'ot jini año' bʌ ti' t'ejl. Wi'ilix mi' cajel ti xʌmbal jini levíjob woli bʌ i ch'ʌmob majlel jini Tabernáculo. Che' bʌ mi' cha'leñob xʌmbal, temel mi' majlelob ti mojt ti mojt che' bajche' añob ba' mi' jijlelob. Ti jujunmojt añob i bandera.
I p'olbal Efraín tsa' ajniyob ti' tojel Tabernáculo ba' mi' bʌjlel q'uin. I yum jiñʌch Elisama (i yalobil Amiud). Ti pejtelel añob 40,500. I p'olbal Manasés tsa' ajniyob ti' t'ejl Efraín. I yum jiñʌch Gamaliel (i yalobil Pedasur). Ti pejtelel añob 32,200. I p'olbal Benjamín tsa' ajniyob ti' t'ejl Manasés. I yum jiñʌch Abidán (i yalobil Gedeoni). Ti pejtelel añob 35,400. Ti pejtelel año' bʌ yic'ot Efraín jiñobʌch 108,100. Wi'ilix tsi' cha'leyob xʌmbal che' ti' pat Rubén.
I p'olbal Dan tsa' ajniyob ti' tojel Tabernáculo ti norte. I yum jiñʌch Ahiezer (i yalobil Amisadai). Ti pejtelel añob 62,700. I p'olbal Aser tsa' ajniyob ti' t'ejl Dan. I yum jiñʌch Pagiel (i yalobil Ocrán). Ti pejtelel añob 41,500. I p'olbal Neftalí tsa' ajniyob ti' t'ejl Aser. I yum jiñʌch Ahira (i yalobil Enán). Ti pejtelel añob 53,400.
Ti pejtelelob año' bʌ ti norte jiñobʌch 157,600. Ti wi'il pat tsa' majliyob che' bʌ tsi' cha'leyob xʌmbal majlel jini israelob. 32Tsa' tsijquiyob ti mojt ti mojt. Lajchʌnmojt i yalobilob Israel. Ti pejtelelob añob 603,550. 33Pero jini levíjob ma'anic tsa' ch'ʌjmiyob ti tsic yic'ot jini israelob che' bajche' lac Yum tsi' wʌn sube Moisés. 34Che'ʌch tsi' laj chajpayob xchumtʌl tac jini israelob jujump'ejl xchumtʌl ti' t'ejl i bandera. Che'ʌch ja'el tsi' cha'leyob xʌmbal majlel jujuntiquil yic'ot i pi'ʌlob ti mojt ti mojt che' bajche' tsi sube Moisés lac Yum.
Currently Selected:
NUMEROS 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.