NUMEROS 19
19
I sʌq'uesʌntel jini bibi'o' bʌ
1-3Lac Yum tsi' sube Moisés yic'ot Aarón: Jiñʌch c mandar mu' bʌ c sub. Subeñob israelob: Yom mi la' pʌy tilel juncojt chʌchʌc bʌ xch'oc wacax, mach bʌ wis anic i c'amʌjel yic'ot i lojwemal, maxto bʌ anic c'ʌmbil ti e'tel. Yom mi la' wʌq'uen jini motomaj Eleazar cha'an mi' pʌy majlel ti' ti' jini tejclum, cha'an ya'i mi' tsʌnsañob che' woli' q'uel. 4Jini motomaj yom mi' ts'aj i c'ʌb ya' ti' ch'ich'el wacax cha'an wucyajl mi' c'ʌn i tsijcan ti' tojel jini Tabernáculo. 5Yom mi' pulel jini wacax, yic'ot i pʌchʌlel, yic'ot i bʌc'tal, yic'ot i ch'ich'el, yic'ot i ta'. Yom mi' laj pule' che' woli to i q'uel jini Eleazar. 6Jini motomaj muq'uix i ch'ʌm jini ch'ujte' yic'ot hisopo, yic'ot jini chʌchʌc bʌ chij cha'an mi' yotsan ya' ti' mal jini c'ajc ba' woli ti pulel jini wacax.
7Che' jini mi caj i wuts' i pislel. Mi caj i cha'len ts'ʌmel. Che' mi' sujtel ti tejclum bibi' to mi' cʌytʌl tic wut c'ʌlʌl mi' bʌjlel q'uin. 8Jini tsa' bʌ i pulu wacax mi caj i wuts' i pislel. Mi caj i cha'len ts'ʌmel. Bibi' to mi' cʌytʌl tic wut c'ʌlʌl mi' bʌjlel q'uin. 9Che' jini mux i tilel juntiquil winic mach bʌ bibi'ic tic wut cha'an mi' tempʌben i tʌñʌl jini wacax, cha'an mi' majlel i much'chocon ya' ti' junwejlel tejclum baqui sʌc pañimil. Ya' yom mi' lojtel cha'an mi' c'ʌjñel che' mi' sʌq'uesañob i bʌ israelob. Jini wacax jiñʌch majtañʌl cha'an i ñusʌntel mulil. 10Wersa yom mi' wuts' i pislel ja'el jini mu' bʌ i tempʌben i tʌñʌl jini wacax. Bibi' to mi' cʌytʌl tic wut c'ʌlʌl mi' bʌjlel q'uin. Jiñʌch c mandar ti' tojlel israelob ti pejtelel ora yic'ot ti' tojlelob jini ñajt bʌ ch'oyolob tsa' bʌ tili ti chumtʌl ti la' lum.
11-12Majqui jach mi' tʌlben i bʌc'tal chʌmen bʌ, bibi' mi' cʌytʌl tic wut wucp'ejl q'uin. La' i sʌq'uesan i bʌ ti ja' che' ti yuxp'ejlel q'uin yic'ot ti wucp'ejlel q'uin. Che' jini mi' cha' sʌc'an, pero mi ma'anic tsi' sʌq'uesa i bʌ che' ti yuxp'ejlel q'uin yic'ot ti wucp'ejlel q'uin, bibi' to mi' cʌytʌl. 13Jujuntiquil winic mu' bʌ i tʌlben i bʌc'tal ch'ujlelʌl wersa mi' sʌq'uesan i bʌ. Mi ma'anic tsi' sʌq'uesa i bʌ, tsa'ix i bibesa ja'el c Tabernáculo. Mi caj i chojquel loq'uel ti Israel. Come ma'anic tsi' c'ʌñʌ ja' mu' bʌ i sʌq'uesan. Bibi' mi' cʌytʌl. I bajñel an ti' wenta i mul.
14Che' an majqui mi' chʌmel ti pisil bʌ otot, bibi'ob tic wut jini ya' bʌ añob ti otot yic'ot jini mu' bʌ i yochelob ba'an xchʌmel. Wucp'ejl q'uin an i bibi'lel tic wut. 15Mi' bib'an ja'el jini basija tac mach bʌ mʌcbilic, o mi ts'ita' bexel an i majc che' mach wen mʌcbilic. 16Majqui jach mi' tʌl winic tsʌnsʌbil bʌ ti bij yic'ot jini yan tac bʌ xchʌmel, mi i bʌquel xchʌmel, mi mucoñibʌl, wucp'ejl q'uin bibi' mi' cʌytʌl tic wut. 17Jini bibi'o' bʌ la' i ch'ʌmob i tʌñʌl wacax tsa' bʌ puli cha'an i tojol mulil. La' i yotsan yic'ot cuxul bʌ ja' ti jump'ejl basija. 18La' tilic juntiquil sʌc bʌ winic yic'ot hisopo cha'an mi' ts'aj ya' ti ja' am bʌ ti basija. Che' jini mi caj i tsijcan jini otot, yic'ot pejtelel jini p'ejt an tac bʌ ti' mal jini otot, yic'ot pejtelel jini bibi'o' bʌ año' bʌ ti' mal jini otot, yic'ot xjula'o' bʌ, yic'ot jini tsa' bʌ i tʌlbe i bʌquel ch'ujlelʌl, mi tsʌnsʌbil ti bij o mi che' jach tsa' chʌmi, yic'ot jini tsa' bʌ i tʌlʌ mucoñibʌl. 19Jini mach bʌ anic i bibi'lel tic wut, la' i tsijcan ti ja' jini bibi' bʌ che' ti yuxp'ejlel q'uin yic'ot che' ti wucp'ejlel q'uin. Che' ujtemix wucp'ejl q'uin i sʌq'uesʌntel mi caj i wuts' i pislel. Mi' caj ti ts'ʌmel. Che' jini cha' sʌquix che' mi' bʌjlel q'uin.
20Che' an juntiquil bibi' bʌ mach bʌ anic tsi' sʌq'uesa i bʌ, isujm mic subeñetla mi' caj ti chojquel loq'uel ti Israel, come muq'uix i bib'esan jini cotot, cha'an ti' caj ma'anic tsa' tsijcʌnti ti jini ja' xʌbʌl bʌ ti' tʌñʌl wacax mu' bʌ i yʌc' ti ñusʌntel mulil. Jini cha'an bibi' mi' yajñel. 21Jini cha'an yom mi' jajq'uel ili mandar ti pejtelel ora. Che' an majqui mi' tsijcan ti ja' yambʌ winic, wersa yom mi' wuts' i pislel ja'el. Che' an majqui mi' tʌl jini ja' mu' bʌ ti sʌq'uesaya, bibi' mi' cʌytʌl c'ʌlʌl mi' bʌjlel q'uin. 22Che' bibi' juntiquil winic, chuqui tac jach mi' tʌl, bibi' mi' yajñel ja'el. Mi tsi' tʌlʌ yambʌ, bibi' mi' cʌytʌl ja'el c'ʌlʌl mi' bʌjlel q'uin. Che' tsi' yʌlʌ lac Yum.
Currently Selected:
NUMEROS 19: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.