NUMEROS 14
14
Jini israelob tsi' contrajiyob lac Yum
1Che' jini tsa' cajiyob ti c'am bʌ t'an yic'ot uq'uel. Jump'ejl ac'ʌlel c'ʌlʌl tsa' sʌc'a ma'anic tsa' ñʌjch'iyob ti uq'uel. 2Ti jump'ejlob i pusic'al tsa' caji i contrajiñob Moisés yic'ot Aarón pejtelel jini israelob. Tsi' yʌlʌyob ti c'am bʌ t'an: Uts'at tsa'ic chʌmiyon lojon ti' lumal Egipto yic'ot wʌ' ti tiquiñal pañimil ba' añonla. 3¿Chucoch woli' pʌyon lojon majlel lac Yum ti jini lum ba' tsajniyob lac pi'ʌlob? Mux i jisañonla ti espada. Mux i pʌybeñon lojon quijñam, yic'ot calobil lojon cha'an mi' yotsañob ti mozo e'tel. ¿Mach ba yomic mij coltan lojon c bʌ? La' sujticon lojon ti Egipto, che'ob. 4Ti jujump'ejl otot tsa' caji i pejcañob i bʌ: La' lac yajcan juntiquil lac yum cha'an mi lac cha' sujtel ti Egipto, che'ob.
5Tsi' yubiyob Moisés yic'ot Aarón. Tsi' pʌcchocoyob i bʌ ti' tojlel pejtelel israelob ya' ba' much'ulob. 6Che' jini Josué i yalobil Nun, yic'ot Caleb i yalobil Jefone, jini tsajniyo' bʌ i q'uelob jini lum, tsi' tsiliyob i pislel cha'an i ch'ijiyemlel i pusic'al. 7Tsa' caji i subeñob pejtelel israelob: Uts'atax jini lum ba' tsajni j q'uel lojon. Cabʌl mi' yʌc' i wut pʌc'ʌbʌl. 8C'ux mi' yubiñonla lac Yum. Mi caj i yʌq'ueñonla jini lum ba' yujil colel pejtelel pʌc'ʌbʌl. Jiñʌch wen bʌ lum ba'an cabʌl leche yic'ot chab. 9La' wocolic mach mi la' chañ'esan la' bʌ ti' tojlel lac Yum. Mach mi la' bʌc'ñan jini winicob ya' bʌ añob ti jini lum. Lajalob jax yilal bajche' waj mu' bʌ laj c'ux, come lac Yum woli' cʌntañonla. Lac Yum tsa'ix i cʌyʌ jini año' bʌ ti Canaán. Mach mi la' bʌc'ñañob, che' jini. Che' tsi' xiq'uiyob Caleb. 10Pero mich'ob jini winicob. Awilan yomobix julbʌl ti xajlel. Ti jim bʌ ora tsa' tsictiyi i ñuclel lac Yum ya' ti' pam jini Tabernáculo ba' tsi' laj q'ueleyob.
11Lac Yum tsi' sube Moisés: ¿Jayp'ejl to ora mi caj i mich'leñoñob ili winicob? ¿Jayp'ejl to ora ma'anic mi caj i p'isob ti wenta jini ñuc tac bʌ c p'ʌtʌlel tsa' bʌ c pʌsbeyob? 12Jini cha'an mi caj c jisañob ti c'amʌjel tac. Mi caj c chilbeñob i lum. Pero mi caj c wa'chocoñet ti' tojlel yaño' bʌ utso' bʌ i pusic'al. Mi caj c p'ojlesañet cha'an mi' tilel yambʌ tejclum ñumen cabʌl bʌ che' bajche' iliyi, che'en lac Yum.
13Pero Moisés tsi' sube lac Yum: Mach che'iqui c Yum, come mi caj i yubiñob jini egiptojob. ¿Chuqui mi caj i yʌlob che' jini? Come yujilob tsa' loc'sayob tilel ti ñuc bʌ a p'ʌtʌlel. 14Tsa'ix i subeyob jini chumulo' bʌ ti Canaán wʌ'añet tic tojlel lojon. Laj yujilobix añet tic tojlel lojon. Ma' pejcan israelob che' bajche' mi' pejcañob i bʌ winicob che' mi' q'uelob i bʌ. Mic chumtʌl lojon ti yebal a Tocal. Ma' majlel ti ñaxan baqui jach ma' pʌyon lojon majlel. Ma' toj'esañon lojon majlel ti a Tocal che' ti q'uiñil yic'ot ti c'ajc che' ti ac'ʌlel. 15A wujil chuqui mi caj i yʌlob winicob ti yan tac bʌ lum mi tsa' jisa a winicob. Come ubibilix i cha'añob bajche' tsa' wen coltayob ti yambʌ ora. Che' jini mi caj i yʌlob: 16“Wersa tsi' tsʌnsayob i Yum, come ma'anic tsa' mejli i cʌntañob ti tiquiñal bʌ pañimil. Ma'anic tsa' mejli i yotsañob ti jini wen bʌ lum, anquese tsi' yʌq'ueyob i t'an cha'an mi caj i yotsañob ya'i”. Che' mi caj i lon alob.
17Jini cha'an c Yum, mij c'ajtibeñet ti wocol t'an, la' tsictiyic a p'ʌtʌlel. Coltañon lojon che' bajche' tsa' wʌlʌ. 18Uts'at a pusic'al c Yum. Jal ma' cuchbeñon lojon c mul. Wen a wujil p'untaya. Ma' ñusʌbeñon lojon c mul yic'ot c jontolil lojon. Tojet ja'el. Wersa mi caj a wʌq'ueñob i tojol i mul jini xmulilob, yic'ot i yalobilob, yic'ot i butsob, yic'ot i p'olbalob i buts. Mi caj i tojbeñob i mul ti chʌnlajmlel. 19Jini cha'an, c Yum, a wocolic pʌsbeñob i yutslel a pusic'al ili winicob. Ñusʌbeñob i mul, che' lajal bajche' tsa' ñusʌbeyob i mul che' bʌ tsa' loq'uiyon lojon ti Egipto c'ʌlʌl wʌle. Che' tsi' yʌlʌ Moisés.
Tsa' aq'uentiyob wocol israelob
(Dt. 1.34-40)
20Che' jini lac Yum tsi' yʌlʌ: Tsa'ix c ñusʌbeyob i mul cha'an tsa' c'ajtibeyon ti wocol t'an. 21A wujil cuxulon. But'ul pañimil tic ñuclel. Isujm jini c t'an. 22Mi caj c mel pejtelel ili winicob, come tsi' q'ueleyob c ñuclel yic'ot ñuc tac bʌ i yejtal c p'ʌtʌlel tsa' bʌ c pʌsbeyob ti Egipto yic'ot ya' ti jochol bʌ lum. Lujunyajlix tsi' yilʌbeyoñob c pusic'al. Ma'anic tsi' p'isiyoñob ti wenta. 23Anquese tsa cʌq'ueyob c t'an i ñojte'elob cha'an mi caj cʌq'ueñob i lum i p'olbal, ma'anic mi caj i wis q'uelob jini lum mi juntiquilic tsa' bʌ i ts'a'leyoñob. 24Pero mi caj i q'uel jini lum jini c winic Caleb cha'an tsi' ñopoyon ti pejtelel i pusic'al. Xuc'ul i pusic'al quic'ot. Jini cha'an mi caj c pʌy ochel ti jini lum ya' ba' tsajni i q'uel. Ya' mi' cajelob ti chumtʌl i p'olbalob ti pejtelel ora. 25Awilan jini israelob woli' bʌc'ñañob jini amalecob yic'ot jini cananeojob chumulo' bʌ ti joctʌl. Jini cha'an yom mi la' sutq'uin la' bʌ. Cucula ti colem bʌ i tiquiñal pañimil ya' ba' tilemetla ti' bijlel jini colem bʌ ja' i c'aba' Chʌchʌc bʌ Ja'. Che' tsi' yʌlʌ lac Yum.
26-27Lac Yum tsi' pejca ja'el Moisés yic'ot Aarón: ¿Jayp'ejl to ora mi caj cuchbeñob i mul ili winicob woliyo' bʌ ti wulwul t'an cha'an mach yomobic i jac'beñon c t'an? 28Subeñob: “Cha'lenla bʌq'uen come cuxulon, che'en lac Yum. Che' lajal bajche' tsa' la' wʌc'ʌ la' t'an cha'an mi la' contrajiñon, che'ʌch mi caj contrajiñetla. 29Mi' caj ti yajlel la' bʌc'tal ilayi ti' tiquiñal pañimil ti la' pejtelel tsa' bʌ la' chañ'esa la' bʌ tic tojlel. Che' bajche' jaytiquiletla tsa'ix bʌ la' taja junc'al la' jabilel, ma'anic mi caj la' wochel ti Canaán. 30Pero Caleb, i yalobil Jefone, yic'ot Josué i yalobil Nun, mi' cajelob ti ochel ti jini lum cha'an mi' ts'ʌctiyel c t'an. 31Tsa' la' lon alʌ mi' cajelob ti ochel la' walobilob ti majtan e'tel ti' tojlel i yumob jini lum, pero joñon mi caj c pʌyob ochel ti jini lum. Mi caj cotsañob ti' yum jini lum ba' tsa' la' ts'a'le. 32Jixcu jatetla, wʌ' jach mi caj ti yajlel la' bʌc'tal ila ti' tiquiñal pañimil. 33Jini la' walobilob mi caj i to'ol cha'leñob xʌmbal ñumel ti colem bʌ i tiquiñal pañimil cha'an ti' caj la' mul. Cha'c'al jab mi caj i cha'leñob xʌmbal ñumel jinto mi la' laj chʌmel jatet bʌ la. 34Che' lajal bajche' tsajniyetla la' tsajin jini lum cha'c'al q'uin che' ja'el cha'c'al jab mi caj la' wubin cabʌl wocol cha'an la' mul, jujump'ejl jab cha'an jujump'ejl q'uin. Che' jini mux caj cʌntesañetla. Wocol jax mi caj la' toj la' mul cha'an tsa'ix la' ts'a'leyon. 35Joñon la' Yumon. Tsa'ix c cha'le t'an. Mi caj c mel ili winicob tsa' bʌ i contrajiyoñob che' bajche' tsac subeyetla. Mi caj i laj c'un'añob ila ti' tiquiñal pañimil. Mi' cajelob ti chʌmel”. Che' yom ma' subeñob, che'en lac Yum Dios.
Jini lujuntiquil stsajiya pañimil tsa' chʌmiyob
36-37Jini winicob tsa' bʌ i chocoyob majlel Moisés cha'an mi' tsajiñob lum tsa' chʌmiyob ti' tojlel lac Yum. Come tsi' techeyob jontol bʌ t'an ti' contra lac Yum che' bʌ tsa' cha' c'otiyob ya' ba'an israelob. Come tsi' bʌc'tesayob israelob. Jini cha'an tsa' bʌc' tili c'amʌjel cha'an mi' jisañob. 38Jini jach Josué i yalobil Nun, yic'ot Caleb i yalobil Jefone, cuxul tsa' cʌleyob che' bʌ tsa' chʌmiyob jini lujuntiquil i pi'ʌlob tsajni bʌ i q'uelob jini lum.
Tsi' jisayob jini año' bʌ ti Horma
(Dt. 1.41-46)
39Moisés tsi' cha' subeyob israelob pejtelel ili t'an. Che' jini wen ch'ijiyem tsa' cʌleyob ti' pejtelelob. 40Che' ti yijc'ʌlal wen sebto tsa' ch'ojyiyob. Tsa' cajiyob ti letsel majlel ya' ti chan bʌ wits. Tsi' yʌlʌyob: Wolix c ña'tan lojon an lojon c mul cha'an ma'anic tsac jac'ʌ lojon c pʌyol, pero chajpʌbilonix lojon cha'an mic majlel lojon ti jini lum tsa' bʌ i ña'ta i yʌq'ueñonla lac Yum Dios, che'ob. 41Moisés tsi' yʌlʌ: Tsa'ix ñumi i yorajlel. Wolix la' ñusʌben i mandar lac Yum, come tsi' subeyetla cha'an mi la' sujtel ya' ti' tiquiñal pañimil. Isujm mic subeñetla mach uts'atic mi caj la' loq'uel mi che'ʌch mi la' mel che' bajche' woli la' lon ña'tan. 42Lolom jax mi la' letsel majlel, come ma'anic mi' majlel lac Yum la' wic'ot. Mach chʌn majliquetla, ame jisʌntiquetla ti' tojlel la' contrajob. 43Mi caj i jisañetla ti espada jini amalecob yic'ot cananeojob ya' ba' woli la' lon ña'tan majlel, cha'an tsa' la' cʌyʌ la' ñop lac Yum. Jini cha'an lac Yum tsa'ix i cʌyʌyetla. Che' tsi' yʌlʌ Moisés. 44Pero tsi' wersa ña'tayob letsel ya' ti wits, anquese ma'anic tsa' majli Moisés. Ma'anic tsa' majli ja'el jini Arca i cha'an bʌ lac Yum. 45Tsa' jubiyob tilel jini amalecob yic'ot jini cananeojob chumulo' bʌ ti wits. Tsi' contrajiyob. Tsi' yajñesayob c'ʌlʌl ti Horma.
Currently Selected:
NUMEROS 14: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.