NEHEMIAS 10
10
1-8Nehemías jini gobernador tsi' yʌc'ʌ i firma. Jini yaño' bʌ tsa' bʌ i yʌc'ʌyob i firma jiñobʌch:
Seraías, Azarías, Jeremías, Pasur, Amarías, Malquías, Hatús, Sebanías, Maluc, Harim, Meremot, Obadías, Daniel, Ginetón, Baruc, Mesulam, Abías, Mijamín, Maazías, Bilgai, Semaías. Jiñobʌch motomajob.
9-13Jiñobʌch levíjob tsa' bʌ i yʌc'ʌyob i firma: Jesúa (i yalobil Azanías), Binúi (i yalobil Henadad), Cadmiel, Sebanías, Hodías, Kelita, Pelaías, Hanán, Micaías, Rehob, Hasabías, Zacur, Serebías, Sebanías, Hodías, Bani, Beninu.
14-27Yumʌlob tsa' bʌ i yʌc'ʌyob i firma jiñobʌch: Paros, Pahat Moab, Elam, Zatu, Bani, Buni, Azgad, Bebai, Adonías, Bigvai, Adín, Ater, Esequías, Azur, Hodías, Hasum, Bezai, Harif, Anatot, Nebai, Magpías, Mesulam, Hezir, Mesezabeel, Sadoc, Jadúa, Pelatías, Hanán, Anaías, Oseas, Hananías, Hasub, Halohes, Pilha, Sobec, Rehum, Hasabna, Maasías, Ahías, Hanán, Anán, Maluc, Harim, Baana.
28Woli' tem ac'ob i t'an pejtel i pi'ʌlob ti Israel, yic'ot motomajob, yic'ot levíjob, yic'ot mu' bʌ i cʌntʌbeñob i ti' tac, yic'ot xc'ayob, yic'ot x'e'telob ti Templo, yic'ot pejtel jini tsa' bʌ i cʌyʌyob i pi'len jini mach bʌ i pi'ʌlobic ti jini lum, cha'an mi' tem ch'ujbiñob i mandar Dios yic'ot i yijñamob yic'ot ch'iton bʌ i yalobilob yic'ot xch'oc bʌ i yalobilob, ti pejtelelob año' bʌ i ña'tʌbal año' bʌ i pusic'al. 29Pejtelel israelob yic'ot jini ñuco' bʌ i ye'tel woli' temob i t'an cha'an mi' jac'beñob i mandar Dios tsa' bʌ aq'uenti Moisés, i winic Dios. Woli' subob i bʌ cha'an mi caj i ch'ujbiñob pejtel i mandar lac Yum. Mi caj i melob che' bajche' cʌntesʌbilob ti ts'ijbujel. Machic mi' melob mi caj i tojob i mul. 30Mach muq'uix lac sijibeñob xch'oc bʌ la calobilob jini mach bʌ lac pi'ʌlobic ti jini lum. Mach muq'uix laj c'ajtibeñob i yijñam la calobilob ti' tojlel jini mach bʌ lac pi'ʌlobic ti jini lum. 31Che' ti' yorajlel c'aj o, mi talob yaño' bʌ winicob x'ixicob año' bʌ ti jini lum cha'an mi' choñob i chubʌ'an mi i bʌl ñʌc'ʌl, ma'anix mi lac mʌn. Mach muq'uix lac cha'len mʌñoñel che' ti ch'ujul bʌ q'uin tac ja'el. Ti' wucp'ejlel jab mach muq'uix lac cha'len pac'. Mux lac junyajlel yʌpben i bet lac pi'ʌlob.
32Mux lac bajñel ch'ʌm ti lac wenta cha'an mi lac toj jump'ejl sʌsʌc taq'uin ti jujuntiquilonla ti jab ti jab cha'an ma'anic mi' cʌytʌl ti melol jini e'tel ti' yotot lac Dios: 33Cha'an mi' yʌq'uentel Dios jini waj, yic'ot i majtan melbil bʌ ti harina ti jujump'ejl q'uin, yic'ot jini pulbil bʌ i majtan ti jujump'ejl q'uin, yic'ot i culto che' ti' q'uiñilel c'aj o, yic'ot che' mi' pasel uw, yic'ot che' mi lac cha'len q'uiñijel che' bajche' ts'ijbubil. Cha'an mi' yʌq'uentel Dios chuqui tac ch'ujul yic'ot jini tsʌnsʌbil tac bʌ i majtan cha'an i tojol i mul israelob, yic'ot pejtel anto bʌ yom cha'an jini e'tel ti' yotot Dios. 34Tsa' lac cha'le yajcaya ti alas ti mojt ti mojt, jini motomajob, yic'ot levíjob, yic'ot i pi'ʌlob ti Israel, cha'an mi lac ch'ʌm majlel si' ti' yotot lac Dios cha'an tsʌnsʌbil bʌ i majtan. Ti jujump'ejl otot mux lac ch'ʌm majlel jini si' che' lac wentajix ti jab ti jab cha'an mi' pulel ti pam i pulʌntib i majtan lac Yum Dios che' bajche' ts'ijbubil ti mandar. 35Tsa' lac ch'ʌmʌ ti lac wenta ja'el cha'an mi lac ch'ʌm majlel ti' yotot lac Yum jini ñaxan bʌ i wut pʌc'ʌbʌl yic'ot ñaxan bʌ i wut pejtel te' ti jujump'ejl jab.
36Mux lac pʌy majlel ti Templo lac yʌx alʌlob ja'el yic'ot ñaxan bʌ i yal alʌc'ʌl: jini ñaxan bʌ i yal wacax yic'ot jini ñaxan bʌ i yal tiñʌme' che' bajche' ts'ijbubil ti ley. Mux lac pʌybeñob majlel motomajob año' bʌ i ye'tel ti' yotot lac Dios. 37Mux lac ch'ʌmbeñob majlel motomajob ya' ti' mal i yotot lac Dios: jini uts'at bʌ lac trigo yic'ot cebada yic'ot ofrenda mu' bʌ la cʌq'uen Dios, i wut jujump'ejl te' yic'ot jini tsiji' bʌ vino yic'ot aceite. Mux la cʌq'ueñob levíjob i diezmojlel i wut pʌc'ʌbʌl. Come an ti' wenta levíjob cha'an mi' ch'ʌmob jini diezmo tac ti pejtelel tejclum ba' chumulonla. 38Jini motomaj, i yalobil bʌ Aarón, mi caj i q'uel levíjob che' bʌ mi' ch'ʌmob jini diezmo tac. Jini levíjob mi caj i cha' loc'sañob jini diezmo tac cha'an mi' yʌq'ueñob Dios. Mi caj i ch'ʌmob letsel ti' yotot lac Dios cha'an mi' yotsañob ti' yotlel ba' lotol i majtan. 39Come pejtel israelob yic'ot levíjob ja'el mi caj i ch'ʌmbeñob majlel i majtan tac motomajob: trigo yic'ot vino yic'ot aceite. Mi caj i cʌyob ya' ba' lotol i bʌl jini ch'ujul bʌ ajñibʌl ba' añob motomajob woliyo' bʌ ti e'tel ti Templo, yic'ot mu' bʌ i cʌntʌbeñob i ti' tac, yic'ot xc'ayob. Ma'anic mi caj laj cʌy lac majlel ti' yotot lac Dios. Ma'anic mi caj laj cʌy la cʌq'uen i majtan Dios. Che'ʌch tsa' la cʌc'ʌ lac t'an.
Currently Selected:
NEHEMIAS 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.