JOB 8
8
Bildad tsi' subu toj Dios
1Tsa' caji ti t'an Bildad ch'oyol bʌ ti Suha. 2¿Jala to mi caj a chʌn cha'len t'an che' bajche' jini? Lajal a t'an bajche' ic'. 3¿Mu' ba caj i ts'ot i bijlel Dios? ¿Mach ba tojic mi' cha'len meloñel ti pejtelel ora? 4Che' bʌ tsi' cha'leyob mulil la' walobilob ti' tojlel Dios, tsi' yʌq'ueyob i toj i mul. 5Jini cha'an yom ma' bʌx'an cha'an ma' sʌclan Dios. C'ajtiben i yutslel i pusic'al jini Mach bʌ Anic I P'isol I P'ʌtʌlel. 6Che' jini che' sʌquet, che' tojet ja'el, mux i tilel i tajet. Mux i cha' aq'ueñet i tijicñʌyel a pusic'al ti a wotot. 7Anquese ts'ita' jach a chubʌ'an che' ti ñaxan, Dios mi caj i p'ojlesʌbeñet che' ti wi'il.
8C'ajtesan i cʌntesʌbal a tatob año' bʌ ti oñiyi. Cabʌl i ña'tʌbal ajñel. Ti' tojlel lac tat maxto anic lac pusic'al. 9Poj ac'bi yilal tsa' laj q'uele pañimil. Lajalonla bajche' axñal mu' bʌ i puts'el. Che'ʌch mi lac ñumel ti pañimil. 10An cabʌl i pusic'al lac ñojte'el. Wen yujilob cʌntesa.
11¿Yujil ba colel jam ti tiquin lum? ¿Mach ba anic mi' colel ba' ach' jini lum? 12Ya' ba' woli' colel mi' bʌc' tiquin i yopol che' ma'anic mi' taj ja'. 13Lajal jini winic mu' bʌ i cʌy Dios. Mach i tajayic chuqui mi' pijtan. 14Mach p'ʌtʌlic come ma'anic i xuc'tilel i pusic'al. Lajal i c'unlel bajche' i jalbal am. 15Jini winic mu' bʌ i cʌy Dios mi' lon ña'tan xuc'ul i yotot, pero mi' caj ti yajlel. Che' mi' ñʌctan pajc', mi' caj ti jejmel. 16Lajalʌch winic bajche' ac' mu' bʌ i pam colel ti corral. 17Chucul i wi' ti' jajp ts'ʌlʌl bʌ xajlel. 18Che' mi' bojquel ya' ba' chucul, mach chʌn tsiquilix i yajñib ba' tsa' coli. 19Ya' ba' tsa' poj coli mux i pasel pimel.
20Ña'tan che' jini Dios ma'anic mi' choc loq'uel jini toj bʌ. Ma'anic mi' cʌy i mʌctan jini jontolo' bʌ. 21Mu' to caj i yʌq'uet ti tse'ñal yic'ot tijicña bʌ. Mi caj a cha'len t'an ti' tijicñʌyel a pusic'al. 22Mux i yubiñob quisin jini mu' bʌ i ts'a'leñetob. Mi' caj ti jilel i yotot jini xjontolil. Che' tsi' yʌlʌ Bildad. Tsa' ujti ti t'an.
Currently Selected:
JOB 8: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.