JOB 36
36
Eliú tsi' subu i ñuclel Dios
1-2Eliú tsi' yʌlʌ ja'el: Anto yom ma' wubiñon. Mi caj j cʌntesañet. Come cabʌlto yom mic subeñet ti' wenta Dios. 3Tsajniyon ti ñajtʌl cha'an mic taj tilel c ña'tibal. Mi caj c pʌsbeñet tojch Dios. Tojʌch tsa' bʌ i meleyon. 4Isujmʌch c t'an. Mach c lotic. Cujil chuqui mic subeñet. Cabʌl c ña'tibal.
5P'ʌtʌlʌch Dios, wen cabʌl i ña'tibal, pero ma'anic mi' ts'a'len winicob mi juntiquilic. Mi' laj ch'ʌm ti' wenta. 6Ma'anic mi' jaltesʌben i jabilel jini xjontolil. Dios mi caj i mel ti uts'at jini tic'lʌbil bʌ. 7Ma'anic mi' wis cʌy i q'uel jini tojo' bʌ. Mi' wa'chocoñob yic'ot reyob am bʌ i yumʌntel. Che' jini mi' tajob i ñuclel. 8Mi tsa' cʌjchiyob ti ñujp'ibʌl, mi tsi' yubiyob cabʌl wocol, 9Dios mi' yʌq'ueñob i ña'tan i mul. Mi' pʌsbeñob i chanlel i pusic'al. 10Mi' jambeñob i chiquin cha'an mi' yubiñob i tic'ol. Mi' subeñob cha'an mi' cʌyob i mul. 11Mi tsi' yubibeyob i t'an, mi tsi' jac'beyob, che' jini mi caj i ñajt'an i jabilel ti pañimil c'ʌlʌl che' ñoxobix, tijicñayob i pusic'al. 12Pero mi ma'anic tsi' ch'ujbibeyob i t'an, tsiquil che' jini ma'anic i ña'tibal. Mi' cajelob ti chʌmel ti espada.
13Pero jini mu' bʌ i lon pʌsob i bʌ ti toj che' mach tojobic muq'uix i tajob i mich'lel Dios. Ma'anic mi' sutq'uiñob i bʌ che' mi' tic'ob. 14Mi' chʌmelob che' ch'itoñob to. Mi' lon jisañob i bʌ ti' ts'i'lel. 15Pero Dios mi caj i p'untan jini tic'lʌbilo' bʌ woliyo' bʌ ti wocol. Mi' jambeñob i chiquin cha'an mi' ñich'tañob che' woliyob ti wocol.
16Yom to Dios i pʌyet loq'uel ti wocol cha'an ma' taj ñuc bʌ a wajñib ba' tijicñayet. Yom i chapʌbeñet a mesa yic'ot pejtel chuqui tac wen. 17Pero wersa tsi' yʌq'ueyet wocol cha'an a melbal, come junlajalet yic'ot xjontolilob. Wolix i melet cha'an a mul. Jini cha'an woliyet ti wocol. 18Tsajaletme ame cajiquet ti a'leya che' wola' wubiben i mich'ajel. Mach a mich'len Dios cha'an sajtem a chubʌ'an. 19Anic to a chubʌ'an, ¿chuqui i ye'tel? Mach mejlic i coltañet. Mach mejlic i lajmesʌbeñet a wocol cha'an ma' cha' c'oc'an. 20Mach a lon pijtan ac'ʌlel, come mi' p'ojlel wocol che' mach yʌxʌlic la co. 21Tsajaletme ame a ñop jontolil, come cha'añʌch a jontolil tsa' tili ili wocol i yilʌbeñet a pusic'al. 22Awilan, wen chan Dios, cabʌl i p'ʌtʌlel. ¿Majqui yujil cʌntesa che' bajche' Dios? 23¿Mejl ba lac pʌsben bajche' yom i mel? ¿Yom ba mi lac p'ajben i ye'tel? Mach yomic.
24Yom ma' ñuq'uesan cha'an ñuc tac bʌ i melbal. Cʌñʌl i melbal ti pejtelel pañimil. 25Q'uelel lac cha'an ti pejtelonla, anquese winicon jach la mu' bʌ caj lac chʌmel. Pero mi lac yʌxña q'uelben i melbal Dios. 26Awilan, wen ñuc Dios. Mach lac lu' cʌmbeyic i pusic'al. Mach tsicbilic i jabilel. 27Mi' yʌc' ti letsel i yowix ja'. Mi' sujtel ti ja'al ti chʌjc' ti chʌjc'. 28I yowix colem ñajb mi' cha' ch'ujyel letsel ti tocal. Jini tocal mi yʌc' ja'al ti lum. Mi' yʌch'esañonla. 29Ma'anic majqui mi' ch'ʌmben isujm bajche' mi' pam puc i bʌ tocal mi bajche' mi' cajel ti t'an chajc loq'uem bʌ ti' pam tocal ba' buchul Dios. 30Awilan, mi' pʌs i c'ʌc'al chajc am bʌ ti' joytilel. Mi' tsictesan i jol wits. 31Dios mi' pʌsbeñonla i p'ʌtʌlel ti pañimil che' mi' melonla yic'ot che' mi' yʌq'ueñonla i bʌl lac ñʌc'. 32Mi' chuc jini chajc ti cha'ts'ijt i c'ʌb. Toj jach mi' choc tilel ba' mi' mel i ye'tel ti pañimil. 33I t'an chajc mi' subeñonla lʌc'ʌl Dios. Jini bʌte'el mi' p'is ti wenta che' tal ja'al.
Currently Selected:
JOB 36: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.