JOB 31
31
Job tsi' cha' alʌ tojʌch i pusic'al
1Tsa'ix c mele trato yic'ot c wut cha'an mi caj j cʌntan c wut ti' tojlel xch'oc. 2Machic tsac tiq'ui c bʌ, ¿chuqui c chobejtʌbal ti Dios? ¿Bajche' mic toj c mul ti' tojlel jini P'ʌtʌl bʌ Mach bʌ Anic i P'isol i P'ʌtʌlel? 3¿Mach ba muq'uic i taj cabʌl wocol jini xmulil? ¿Mach ba muq'uic i jilel jini xjontolil? 4Dios ¿mach ba wolic i q'uel mi toj c bijlel? Mi' p'is ti' wenta jujunxʌn coc.
5Tsaj cʌnta c bʌ. Mach cujilic lot. Ma'anic tsac pi'le majlel jini yujilo' bʌ lotiya. 6La' i p'ison Dios ti balanza che' mi' melon. Mux i ña'tan ma'anic c mul. 7Xuc'ul tsac ñopbe i bijlel. Tsa'ic j cʌyʌ i bijlel c Yum, tsa'ic c jac'ʌ i pʌyol c wut, tsa'ic c mula jini mach bʌ c cha'anic, 8la' i c'uxob yaño' bʌ jini tsa' bʌ c pʌc'ʌ joñon. La' bojquic c pʌc'ʌb woli bʌ i yʌc' i wut.
9Tsa'ic c pejca x'ixic, tsa'ic c chijta c pi'ʌlob ti xchumtʌl, 10la' cajic ti juch'bal quijñam ti' wenta yambʌ. La' i tic'lañob winicob. 11Pero tic'bil ti ley jini jontolil. Wersa mi' tojtʌl ti melobʌjʌl. 12Tsa'ic c cha'le jontolil, i wentajʌch c'ajc mu' bʌ caj i jisan pejtel c chubʌ'an. Mach yajpic jinto mi' laj pulel.
13Mi tsac chilbeyob i coltʌntel x'e'telob c cha'an che' woli' c'ajtiñob, 14¿chuqui mic mel ti' tojlel Dios che' mi' tilel i melon? ¿Bajche' mi caj c jac'? 15Jini c Yum tsa' bʌ i meleyon ti' ñʌc' c ña' tsi' meleyob ja'el. Junlajal jach tsi' meleyonla. Tsi' yʌc'ʌyonla ti cʌntʌntel ti' tojlel lac ña'.
16Mi tsac chʌclibe jini pobre chuqui tac tsi' c'ajti ti wocol t'an, mi tsac techbe i wocol jini meba' x'ixic, 17mi tsac ña'ta mic bajñel ñaj'an, mi tsac chʌclibe i bʌl i ñʌc' meba' alʌl che' jasʌlon, la' c taj c wocol. 18Pero mach che'ic tsac mele. Tsa cosa meba' alʌl che' bajche' calobil c'ʌlʌ che' bʌ tsi' q'uele pañimil. 19Che' bʌ tsac ña'ta pits'il jini pobre mach bʌ anic i yotot mi i bʌl i ñʌc', 20anquese mach c pi'ʌlic, tsa cʌq'ue i lʌp i tsutsel c tiñʌme'. 21Mi tsac letsa j c'ʌb ti meloñel ti contra jini meba' cha'an mic tajben i yutslel winicob, 22mi che'ʌch tsac mele, la' chojquic loq'uel i bʌquel quejlab cha'an c mul. La' ts'ojquic j c'ʌb ya' ba' chucul. 23Pero tsac bʌc'ña Dios mu' bʌ caj i melon. Wen ñuc i yumʌntel. Jini cha'an ma'anic tsac mele jini jontolil.
24Mi tsa cʌc'ʌ ti ñuc jini oro che' wen chumulon, 25mi tijicñayon cha'an cabʌl c chubʌ'an, mi tsa jach c ña'ta c p'ojlesan cha'an mic chan'esan c bʌ, 26-27mi tsac ch'ujutesa jini q'uin cha'an i t'ojol jax ya' ti panchan, yic'ot jini uw mu' bʌ i xʌntan panchan ti' ñuclel, mi tsac pejca ti oración, 28mulil jini. Tsa'ic c mele jini, wersa mic mel c bʌ ti' tojlel juez. Che'ic jini, mach xuc'ulonic ti Dios am bʌ ti panchan.
29Mi tijicñayon ba' ora tsi' taja wocol jini mu' bʌ i ts'a'leñon, mi tijicñayon cha'an ch'ijiyem i pusic'al jini woli bʌ i contrajiñon, 30mulil tsa'. Pero mach che'ic tsac mele. Ma'anic tsac p'aja j contra. Ma'anic tsaj c'ajtibe Dios cha'an mi' yʌc' ti chʌmel. 31Jini chumulo' bʌ quic'ot tsi' q'ueleyob. Tsac wen aq'ueyob we'elʌl c winicob. 32Ma'anic tsaj cʌyʌ ti bij jini ñajt bʌ ch'oyolob. Tsac jambeyob i ti' cotot. Tsac pʌyʌyob ochel. 33Mi tsac mucu c mul che' bajche' i yalobil Adán, mi tsac ñopo c muc tic pusic'al cha'an bʌq'uen 34ame a'lenticon ti' tojlel winicob, ame ts'a'lenticon cha'an c pi'ʌlob ti mojt ti mojt, mi cha'an c mul tsac ñup'u c bʌ ti cotot, 35la' i melon Dios, jini P'ʌtʌl Bʌ. Umba'añon. La' tilic i melon ti uts'at ti' tojlel jini tsa' bʌ i jop'beyoñob c mul ti jun. 36Che' jini tijicñayon mic jac' che' mi' pʌyon tij c'aba'. Mux c lʌc' c bʌ che' bajche' juntiquil lʌpʌl bʌ i cha'an corona. 37Che'ic jini mach muc'onic ti quisin. Muc'ʌch c ñochtan Dios che' bajche' i yalobil rey. Muc'ʌch c lu' suben chuqui tsac mele.
38Mi an c mul ti' tojlel c lum, mi p'ump'un i tsolom cha'an ma'anic tsa cʌq'ue i c'aj i yo, 39mi tsaj c'uxu i wut c pʌc'ʌb che' mach tojbilic x'e'telob, mi tsac chilbeyob i lum yaño' bʌ, 40mi tsac mele bajche' jini, la' colic ch'ixol ti' yajñib trigo. La' pam colic ch'ix ti' yajñib cebada che'en Job.
Currently Selected:
JOB 31: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.