JOB 21
21
Poj uts'at mi' yajñelob jontolo' bʌ
1-2Tsa' caji i yʌl Job: Ñich'tʌbeñon c t'an. Ubin jach, mi a wom a ñuq'uesʌbeñon c pusic'al. 3Pʌsbeñon i yutslel a pusic'al che' woliyon ti t'an. Jinto che' mi cujtel, wajleñon mi a wom. 4Cujil jinʌch Dios mu' bʌ i yʌc'on ti wocol. Jini cha'an ch'ijiyemon. 5Q'uelela bajche' añon. Cha'lenla bʌq'uen. La'to sajtic la' pusic'al. 6Che' mic ña'tan bajche' añon, mic cha'len bʌq'uen. Tesuñayon cha'an uq'uel.
7¿Chucoch tijicña i pusic'al mi' jal'añob ti pañimil jini jontolo' bʌ? C'ʌlʌl c'oc'ob to che' ñoxobix. Añʌch i ñuclel yic'ot i p'ʌtʌlel. 8Tijicña mi' q'uelob i yalobilob. Wen chumulob che' ñucobix. Tijicñayob i pi'ʌlob yic'ot i p'olbalob. 9Añobʌch i yotot yic'ot i lum. Mach yujilobic bʌq'uen. Dios ma'anic mi' ju'sʌbeñob i pusic'al. Ma'anic mi' melob. 10C'oc'ʌch i yʌlac'. Jini tat wacax mi' p'ojlel. Jini ña' wacax ma'anic mi' to'ol ñusan i yal. 11I yalobilob mi' loq'uelob ti alas che' bajche' tiñʌme'. Jini bic'talob mi' cha'leñob tijp'el, mi' cha'leñob son. 12Ñucob i pusic'al cha'an tsinlaw bʌ taq'uin yic'ot arpa. Tse'tse'ña jax mi' yubiñob jini flauta. 13Wen chumulob che' cuxulob to. Ñʌch'ʌl i pusic'al mi' chʌmelob, mi' mujquelob. Mi' subeñob Dios: “La' to bajña ajnicon lojon. 14Mach comic c ñop lojon a bijlel. 15¿Majqui jini P'ʌtʌl bʌ Mach bʌ Anic I P'isol I P'ʌtʌlel? ¿Chucoch yom mic ch'ujutesan lojon? ¿Chuqui mi caj lac taj ti Dios?” che'ob. 16Pero tilem ti Dios pejtel chuqui mi' taj ti pañimil jini xjontolil. Leco bajche' mi' bajñel ña'tan. Mach che'ic mic ña'tan joñon.
17Casʌ mi' bʌc' yajpel i c'ʌc'al. Casʌ mi' bʌc' tilel wocol ti' tojlelob. ¿Bacan tsiquil mi woli' yubiñob wocol cha'an i mich'lel Dios? 18¿Mu' ba i chojquel jini winic che' bajche' jam ti ic', che' bajche' misʌjelʌl ti sutujt ic'? 19Mux caj la' jac': “Isujm ma'anic woli' toj jini winic, pero mux caj i tojbeñob i bet i yalobilob”, che'etla. Pero mach che'ic yom. La' i toj ti ts'ʌcʌl jini am bʌ i mul. La' i bajñel taj wocol cha'an i mul. 20La' i bajñel ubin jini wocol mu' bʌ i tilel i jisan. La' i yubin ti ts'ʌcʌl i mich'ajel Dios Mach bʌ Anic i P'isol i P'ʌtʌlel. 21Che' yujilix lʌc'ʌl i yorajlel chʌmel, mach chʌn tijicñayix i pusic'al. 22¿Mejl ba laj cʌntesan Dios? Diosʌch mu' bʌ i melonla. Dios mi' mel ja'el año' bʌ ti panchan. 23An winic mu' bʌ i chʌmel che' cabʌl i ñuclel yic'ot cabʌl i chubʌ'an, che' wen chumul, che' ma'anic bʌq'uen, 24che' c'oc' to i bʌc'tal, bʌjñel to i p'ʌtʌlel. 25Yambʌ mi' chʌmel che' wen woli ti wocol. Mach tijicñayic i bʌc'tal ti pejtelel ora. 26Temel mi' mujquelob ti mucoñibʌl. Jini motso' mi' pam ñumel ba' ts'ʌl ñololob.
27Cujil chuqui woli la' lon ña'tan. Woli la' tem la' t'an tij contra. 28Cujil mi caj la' c'ajtibeñon: “¿Baqui an wʌle i yotot jini winic am bʌ i ñuclel ti oñiyi? ¿Chuqui tsa' tumbenti i yotot jini xjontolil?” che'etla. 29¿Mach ba anic tsa' la' pejca jini ñajt bʌ ch'oyolob? ¿Mach ba anic tsi' pʌsbeyonla? 30Che' mi' tilel wocol mach jilicob jini jontolo' bʌ. Mi' pʌjyelob majlel ba' tijicñayob. Mach i tajayic i mich'ajel Dios. 31Ma'anic majqui mi' tsictesʌben i mul. Ma'anic majqui mi' yʌq'uen i toj. 32-33Che' mi' chʌmel, mi' q'uechob majlel ti mucoñibʌl. Pejtel winicob x'ixicob mi' joy cʌntañob majlel. Uts'at jini lum ba' mi' mucob. Cabʌlob mi' cha'leñob q'ueloñel ti' mujquibʌl. 34Jini cha'an mi la' lon pejcañon. Ma'anic mi la' ñʌch'chocobeñon c pusic'al. Mach isujmic chuqui woli la' wʌl, che'en Job.
Currently Selected:
JOB 21: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.