JOB 18
18
Jini jontolo' bʌ mi caj i tojob i mul
1-2Tsa' caji ti t'an Bildad ch'oyol bʌ ti Suha: ¿Jayp'ejl to ora ma' lon ña'tan a yʌcon lojon ti a t'an? ¿Maxto ba anic a pusic'al? Subu a bʌ mi a wom mic jac'. 3¿Lajal ba ma' q'uelon lojon bajche' wacax mach bʌ anic i pusic'al? 4Wola' tic'lan a bʌ cha'an mich'et. ¿A wom ba mi' laj chʌmelob winicob ti' caj a mul? ¿A wom ba mi' c'ajlel tac xajlel ti' yajñib cha'an ma' q'uejlel ti toj?
5Mi' caj ti jilel i wenlel jini jontolo' bʌ. Mi' caj ti junyajlel yajpel i c'ʌc'al ba' mi' q'uixñesañob i bʌ. 6Mi' caj ti jilel i yotot tac jini jontolo' bʌ ti ic'ch'ipan bʌ. 7Jini xjontolil mi' caj ti xʌmbal che' bajche' xyʌc'ajel. Mi' caj ti yajlel cha'an tsi' ñusa t'an. I mul mi' yʌc' ti yajlel. 8Bʌjʌch i bʌ mi caj i yochel ti yac. Ti ajñel mi' choc i bʌ ti' ch'eñal lum. 9Mi' ñejt'el i tun'oc ti yac. Chucul cʌlem ba' mach mejlic ti loq'uel. 10Mucbil ti lum an lazo mu' bʌ caj i jich'. Mucbil ti' bijlel an yac mu' bʌ caj i ñup'. 11Ya' ti' pat yic'ot ti' tojel i wut yic'ot ti' t'ejl an bʌbʌq'uen bʌ. Ti ajñel mi' majlel ame chujquic i yoc.
12Jini wocol woli' pijtan. Muq'uix i jisan ti ora che' mi' yochel i yoc. 13Anix i chʌmel i pʌchilel. Mi' wʌlʌc ac' ti jilel i c'ʌb i yoc. P'ump'unix mi' chʌmel. 14Mi caj i wersa pʌjyel loq'uel ti' yotot ba' yom cʌytʌl. Ya' ba' bʌbʌq'uen jax mi' chʌmel mi caj i wersa pʌjyel majlel. 15Ma'anic mi' wis cʌytʌl i chubʌ'an ti' yotot mi ts'ita'ic. Mi' pulel i yotot che' bajche' mujlʌbil ti azufre. 16Lajal che' bajche' te' mi' chʌmel. Tiquinix i wi' ti yebal. Tiquinix i yopol ti pam.
17Ma'anix majqui mi' chʌn c'ajtesan ti pañimil. Ma'anix mi' pejcʌntel i c'aba ti bij. 18Mi' chojquel loq'uel ti' sʌclel pañimil. Mi' yochel ti ic'ch'ipan bʌ. Ti ajñel mi' chojquel loq'uel ti' tojlel winicob ti pañimil. 19Ma'anic i yalobil mi i buts. Jochol mi' cʌytʌl i yotot. 20Mi' toj sajtel i pusic'al jini ñoxobix bʌ che' mi' q'uelob. Mi' cajelob ti bʌq'uen jini ch'itoñob. 21Lajal mi caj i yujtel i chumlib pejtel winicob mach bʌ anic mi' bʌc'ñañob Dios. Junlajal mi' cajelob ti jilel. Tsa' ujti ti t'an Bildad.
Currently Selected:
JOB 18: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.