JEREMIAS 4
4
1Mi wola' sujtel ba' añon ti pejtel a pusic'al, Israel, yomix ma' junyajlel choc jini diosob ts'alebilo' bʌ c cha'an. Yom xuc'ul ma' tsajcañon. Mach yomix ma' chʌn sajtel ti yambʌ bij. 2Wa'chocon a t'an tic tojlel ti' c'aba' jini cuxul bʌ a Yum. Subu chuqui isujm. Cha'len toj bʌ meloñel. Ñopox chuqui uts'at tic wut. Che' jini pejtel winicob ti yan tac bʌ lum mi caj i cʌñoñob cha'an a Yumon. Mi caj i q'ueloñob ti ñuc, che'en lac Yum. 3Lac Yum tsi' subeyob i winicob ti Jerusalén yic'ot i winicob ti Judá: Top'ox jini petel bʌ lum la' cha'an. Mach la' chʌn cha'len pac' ti ch'ixol. 4Sʌq'uesan la' pusic'al, mach jinic jach la' bʌc'tal. Ñopox la' Yum ti jump'ejl la' pusic'al, winicob ti Judá yic'ot ti Jerusalén, ame cajic c choc tilel c'ajc mach bʌ yujilic yajpel cha'an ti' caj la' jontolil, che'en.
Mi caj i tilel i contra Judá
5Subeñob jini año' bʌ ti Judá yic'ot ti Jerusalén: “Wusula jini trompeta ti pejtelel la' lumal. Cha'lenla c'am bʌ t'an. Tempan la' bʌ ti la' pejtelel. Conla ti ochel ti ts'ajquibil bʌ tejclum tac”. Che' yom ma' subeñob. 6Letsan la' bandera ti' bijlel Sion. Yom mi la' puts'el ya'i. Mach yomic mi la' jalijel come tal cabʌl wocol, come wolic pʌy tilel jini yujilo' bʌ jisaya ch'oyolo' bʌ ti norte. 7P'ʌtʌlʌch che' bajche' bajlum jini tal bʌ i jisan cabʌl tejclum. Wolix ti jijlel ti pisil bʌ otot jinto mi' laj jochtesan la' lum. Jochol mi' cajelob ti cʌytʌl la' tejclum tac. Laj majlemob i yum otot. 8Jini cha'an yom mi la' lʌp coxtal. Cha'lenla uq'uel, come mach lajmix i mich'ajel lac Yum. Cʌlʌx jax mi' mich'leñonla. Ma'anic chuqui mi' mʌctan. 9Ti jim bʌ ora mi' caj ti quisin jini rey yic'ot i yalobilob yic'ot motomajob yic'ot x'alt'añob, che'en lac Yum. Mi caj i toj sajtelob i pusic'al. 10Mi' cajelob ti a'leya: “C Yum Dios, tsa' lotiyon lojon. Tsa' subeyon lojon tal i ñʌch'tʌlel lojon c pusic'al, pero tal espada cha'an mi' jec'beñon lojon c pusic'al”. Che' mi caj i yʌlob, che'en lac Yum.
11Mi caj a suben c cha'año' bʌ yic'ot jini c tejclum Jerusalén: “Tal chʌcwech'an bʌ ic' loq'uem bʌ ti tiquin lum. Mi caj i jats'et, xch'oc bʌ calobil. Mach talic cha'an mi' coltañet. Mach talic cha'an mi' wejlan majlel i sujl ixim cha'an mi' sʌq'uesan. 12Tal p'ʌtʌl bʌ ic' chocbil bʌ tilel c cha'an. I yorajlelix mi caj c mel c winicob x'ixicob”. Che'ʌch yom ma' subeñob, che'en lac Yum. 13Q'uelela tocal. Ix tilel lac Yum ti tocal. Ajñel woli ti xʌmbal tilel ti carreta ti p'ʌtʌl bʌ ic'. Ñumen ajñel i c'ʌchlib bajche' xiye'. Bʌbʌq'uen jax lac wocol mu' bʌ caj i tajonla. Obol jax lac bʌ come sajtemonla. 14Sʌq'uesan a pusic'al, Jerusalén. Cʌyʌ a mul cha'an ma' coltʌntel. ¿Jala to ba mi caj a chʌn ña'tan ti a pusic'al chuqui tac leco? 15Ix tilelob jini loq'uemo' bʌ ti Dan yic'ot ti' wits Efraín. Woli' pam pucob t'an cha'an tal jini wocol. 16Subu ti' tojlel ñajt tac bʌ tejclum cha'an talob i jisan Jerusalén jini ñajt bʌ ch'oyolob. Ju'ucña mi' cha'leñob t'an ti' contra jini tejclum tac ti Judá. 17Cha'an ti' caj tsa' ñusʌbeyon c t'an jini cha'an woli' joy mʌctañet che' bajche' xchuc me'ob, che'en lac Yum. 18A jontolil woli' yʌq'uet ti wocol cha'an tsa' wersa ñopo jontolil. Wen ch'ajatax ma' wubin wʌle. Mi' c'ʌlʌl c'otel i ch'ajel ti a pusic'al, che'en lac Yum.
19Obol c bʌ, obol c bʌ, mach cujchix c cha'an ili wocol. Tsiltsilñayon. Wen ch'ijiyem c pusic'al. Tsa' jejq'uiyon yubil. Mach mejlic c ñʌjch'el, come ubibilix c cha'an i t'an tac trompeta yic'ot i t'an winicob. Woliyobix ti guerra. 20Mach lajmix jisaya. Mi' ñumel junchajp, mi' tilel yambʌ. Laj jisʌbil lac lumal. Mi' bʌc' q'uejchel majlel pejtel jini pisil bʌ cotot. Ti jumuc' jach lu' tsijlem jini joc'ol bʌ pisil. 21¿Jala to ba mi caj j q'uelben i bandera jini xguerrajob? ¿Jala to ba mi caj cubiben i t'an tac trompeta? 22Jinto mi' laj jisʌntelob c pi'ʌlob come jontolob. Ma'anic mi' ñich'tañoñob. Che'ʌch añob bajche' alp'eñelob maxto bʌ anic i pusic'al. Ma'anic mi' ch'ʌmbeñob isujm. Wen yujilob jontolil, pero mach yujilobic i melol chuqui uts'at.
23Tsac pam q'uele pañimil. Awilan ma'anic chuqui wen. C'ʌlʌl ba' mi' c'otel c wut laj jisʌbilix, laj jembilix. Ma'anic i sʌclel pañimil. 24Tsaj q'uele tsiltsilña jini wits. Awilan woli ti ejmel jini bujtʌl. 25Tsaj q'uele, ma'anix tsiquil winic. Laj puts'em te'lemut ti panchan. 26Tsaj q'uele tiquinix lum ya' ba'an pʌc'ʌbʌl ti yambʌ ora. Lu' jembilix jini tejclum tac ti' tojlel lac Yum cha'an cabʌl i mich'ajel. 27Come lac Yum tsi' yʌc'ʌ ti jisʌntel jini lum che' bajche' tsi' yʌlʌ: Pero mach jilic i colojbal c winicob x'ixicob, che'en lac Yum. Lamital jach mi caj i cʌytʌl. 28Jini cha'an la' i yuc'tañob i lumal. La' mʌjquic yic'ot i'ic' bʌ pisil yilal jini q'uin, cha'an tsac cha'le t'an. Tsac wʌn ña'ta tic pusic'al bajche' mi caj c mel. Mach quepelic mi caj j cʌy. Ma'anic mij q'uextan c pusic'al, che'en lac Yum.
29Mi caj i laj puts'elob loq'uel ti tejclum che' mi' yubibeñob i t'an jini c'ʌchʌlo' bʌ che' mi' tilelob, chucul bʌ i cha'an jalʌjb. Mi' puts'elob ti mate'el. Mi' letselob majlel ti xajlelol. Jocholix mi' cʌytʌl tejclum tac. Laj majlemix i yum. 30Jixcu jatet sajtemet bʌ, ¿chuqui mi caj a mel? Mach mejlix a chʌn lʌp jini chʌchʌc bʌ pisil. Mach mejlix a chʌn ch'ʌl a bʌ ti oro. Mach mejlix a chʌn bon a wut ti i'ic' bʌ. Lolom jach a t'ojlʌwel. Tsa' sujtiyob ti a contra jini c'uxbibilo' bʌ a cha'an. Ts'a' mi' q'uelet. Yomob i tsʌnsañet. 31Tsa cubibe i t'an Sion, woli ti uq'uel. Woli ti bajq'uel che' bajche' x'ixic woli bʌ i yʌc' ti pañimil jini yʌx alʌl. Ajacña mi' jap ic'. Woli' c'ajtin i coltʌntel. Obol jax c bʌ. C'unix pañimil mi cubin cha'an jini tsʌnsʌbilo' bʌ.
Currently Selected:
JEREMIAS 4: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.