ISAIAS 7
CTUBI
7
I t'an Isaías ti' tojlel Acaz
1Ti jim bʌ ora che' woli' cha'len yumʌl ti Judá jini rey Acaz (i yalobil Jotam, i buts Uzías) tsa' tili i contrajin Jerusalén jini rey Rezín ch'oyol bʌ ti Siria yic'ot Peka jini rey ti Israel, i yalobilʌch Remalías. Pero ma'anic tsa' mejli i ch'ʌmob jini tejclum. 2Ti jim bʌ ora tsa' c'oti t'an ba'an jini rey Acaz (loq'uem bʌ ti' p'olbal David): Jini siriajob tsi' temeyob i t'an yic'ot israelob cha'an mi' contrajiñob Judá, che'en. Che' jini tsa' toj sajti i pusic'al jini rey yic'ot pejtelel i winicob. Tsa' cajiyob ti tsiltsilñʌyel che' bajche' mi' ñijcan i bʌ te'el che' an cabʌl ic' ya' ti wits.
3Lac Yum tsi' sube Isaías: Cucu ti ora ba'an Acaz. Pʌyʌ a wic'ot Searjasub a walobil. Ya'an Acaz ti cojix bʌ ts'ajc ba' c'ʌcʌl i bijlel ja' ya' ti' bijlel jini jamil ba' mi' cha'leñob wuts'oñel. 4Suben: “Tsajilet. Yom ñʌch'ʌlet. Mach yomic ma' cha'len bʌq'uen. Mach mi' toj sajtel a pusic'al cha'an tsʌts bʌ i mich'ajel jini Rezín yic'ot jini siriajob yic'ot Peka. Lajalob bajche' cha'ts'ijt taj yomix bʌ yajpel i c'ʌc'al. 5Jini siriajob yic'ot año' bʌ ti Efraín yic'ot i yalobilob Remalías tsa'ix i temeyob i t'an cha'an mi' contrajiñet. Tsi' yʌlʌyob: 6La' laj contrajin jini año' bʌ ti Judá. La' lac bʌc'tesañob. La' la cotsan ti rey i yalobil Tabeel cha'an mi' yumañob ya' ti Jerusalén, che'ob. 7Pero lac Yum Dios woli' yʌl: ¡Mach i mʌlʌyobic mi junyajlic! 8Come jini colem tejclum ti Siria ba' mi' cha'len yumʌl Rezín jiñʌch Damasco. Ya' jach jaxʌl i yumʌntel. Ma'anic mi caj i ñuc'an. Efraín ja'el mi caj i junyajlel jisʌntel che' ti yambʌ jo'p'ejl i chʌnc'al jab. 9Jini colem tejclum ti Efraín ba' mi' cha'len yumʌl Peka jiñʌch Samaria. Ya' jach jaxʌl i yumʌntel. Ma'anic mi caj i ñuc'an. Mi mach xuc'ulic a pusic'al tic t'an, mach xuc'ulic mi caj a wajñel”. Che'ʌch yom ma' suben Acaz, che'en lac Yum.
Emanuel
10Lac Yum tsi' sube Acaz: 11C'ajtibeñon i yejtal c p'ʌtʌlel cha'an ma' ña'tan ti isujm a Dioson a Yumon. C'ajtin baqui jach a wom mic pʌs, mi ti pañimil mi ti panchan, che'en. 12Pero Acaz tsi' jac'ʌ: Mach comic, c Yum. Ma'anic mi caj quilʌbeñet a pusic'al. Mach comic c'ajtibeñet i yejtal a p'ʌtʌlel, che'en. 13Jini cha'an Isaías tsi' yʌlʌ: Ñich'tan c t'an, Acaz, i p'olbalet bʌ David. Mach jinic jach woli a techbeñon c mich'ajel, pero wola' techben i mich'ajel c Dios ja'el. 14Jini cha'an lac Yum mi caj i wersa pʌsbeñet i yejtal i p'ʌtʌlel. Juntiquil xch'oc mi caj i cʌntan alʌl. Mi caj i yʌc' ti pañimil ch'iton. Mi caj i yotsʌben i c'aba' Emanuel mu' bʌ i yʌl ti lac t'an, “Dios la quic'ot”. 15Che' alʌl to mi caj i jap lech yic'ot chab (jiñʌch i bʌl i ñʌc' reyob) 16jinto mi' julel i pusic'al cha'an mi' yajcan chuqui uts'at, cha'an mi' juch'tec' chuqui jontol. Che' maxto cʌyʌlic i cha'an i chu', awilan jini cha'tiquil reyob woli bʌ a bʌc'ñan mi caj i junyajlel jisʌntelob yic'ot pejtelel i lumal. 17Lac Yum mi caj i chocbeñet tilel cabʌl wocol ti a tojlel yic'ot ti' tojlel a pi'ʌlob yic'ot pejtelel año' bʌ ti a tejclum. Ma'anic ba' ora q'uelel a cha'an wocol che' bajche' iliyi c'ʌlʌl che' bʌ tsi' t'oxo i bʌ Israel yic'ot Judá. Jini rey am bʌ ti Asiria mi caj i tilel yic'ot i soldadojob.
18Ti jim bʌ ora lac Yum mi caj i wets' tilel che' bajche' jaj jini winicob año' bʌ ti Egipto yic'ot año' bʌ ti Asiria. Jomjomña mi caj i tilelob che' bajche' i chʌñil chab. 19Wen bajc'ʌlob mi caj i tilelob. Mi caj i pam pujquelob ti pejtelel a lumal c'ʌlʌl ya' ti colem bʌ i tiquiñal pañimil, yic'ot ya' ba' tocol tac i mal colem xajlel, yic'ot ya' ba' pim wats'an ch'ixol, yic'ot ya' ti wumilel tac ja'el. 20Ti jim bʌ ora lac Yum mi caj i c'ʌn jini rey ti Asiria che' bajche' jump'ejl jay bʌ e'tijibʌl mʌmbil bʌ tilel, yic'ot jini ch'oyolo' bʌ ti junwejl colem ja' i c'aba' Eufrates, cha'an mi' laj chilbeñet winicob x'ixicob yic'ot pejtelel i chubʌ'an yic'ot pejtel tsa' bʌ i pʌc'ʌyob. 21Che' ujtemix jini wocol, tijicña jini winic am bʌ i cha'an juncojt ña' wacax yic'ot cha'cojt ña' tiñʌme'. 22Mi caj i sujtel ti potrero tac pejtelel Judá. Jini mu' bʌ i cʌytʌlob tijicña mi caj i japob lech yic'ot mantequilla. Cha'an i yonlel lech yic'ot chab jasʌl mi caj i japob, mi caj i c'uxob ti pejtelob.
23Ti jim bʌ ora jini wen uts'at bʌ ts'usubil letsem bʌ i tojol mi caj i sujtel ti ch'ixol yic'ot ti stsajatuñol. 24-25Pejtelel jini lum ya' ba' tsi' top'oyob ti azadón mi caj i sujtel ti potrero. Ma'anix majch mi caj i chʌn majlel ya'i cha'an i bʌc'ñʌntel jini ch'ixol yic'ot stsajatuñol. Muc' jach i majlelob winicob ti julbʌl.

© Wycliffe Bible Translators, Inc. All rights reserved.

Learn More about the I T’an Dios