ISAIAS 61
61
I tsictesʌntel i coltʌntel Israel
1An i yEspíritu lac Yum Dios tic pusic'al, come lac Yum tsi' yajcayon cha'an mic subeñob jini wen t'an jini utso' bʌ. Tsi' chocoyon tilel cha'an mic lajmesʌbeñob i ch'ijiyemlel i pusic'al jini ch'ijyemo' bʌ, cha'an mic subeñob loq'uel jini ñup'ulo' bʌ, cha'an mic jambeñob i ti' mʌjquibʌl ba' ñup'ulob, 2cha'an mic subeñob i yorajlelix mi' pʌstʌl i yutslel i pusic'al lac Yum. Tal to jini q'uin che' mi caj i q'uextan mulil lac Dios. Chocbilon tilel cha'an mic ñuq'uesʌbeñob i pusic'al pejtel woliyo' bʌ ti uq'uel. 3Mi caj j coltan jini woli bʌ i tsicob i pusic'al ti Sion. Mi caj cʌq'ueñob i ch'ʌjlil i jol i wenta tʌñil c'ajc. Mi caj cʌq'ueñob i tijicñʌyel i pusic'al i wenta uq'uel. Mi caj c lajmesʌbeñob i wocol cha'an mi' cajelob ti c'ay cha'an ñucon. Toj mi caj i q'uejlelob. P'ʌtʌl mi caj i yajñelob che' bajche' c'olol wen chucul bʌ i wi'. Tsac pʌc'ʌyob cha'an mi' tsictesañob c ñuclel.
4Mi caj i cha' melob jini jejmen bʌ otot tac am bʌ ti wajali. Mi caj i wa'chocoñob. Mi caj i cha' melob jini tejclum tac tsa' bʌ jejmi ti yan tac bʌ ora. 5Jini ñajt bʌ tilemob mi caj i cʌntañob la' tiñʌme'. Mi caj i q'uelob la' chol yic'ot la' ts'usubil. Jini mach bʌ anic tsi' cʌñʌyob Dios ti ñaxan wolix i melbeñetla la' we'tel. 6Jixcu jatetla mi caj la' pejcʌntel ti “motomajob i cha'an lac Yum” yic'ot “x'e'telob i cha'an Dios”. Jini wen chumulo' bʌ ti yan tac bʌ lum mi caj i yʌq'ueñet la' majtan. Mi caj i wen p'ojlel la' chubʌ'an. Wen ñuc mi caj la' q'uejlel. 7Tsa' la' wubi quisin che' bʌ tsa' a'lentiyetla, pero mi caj la' wʌq'uentel cha'yajl i ñumel la' majtan cha'an mi' cha' ñuc'an la' pusic'al. Che' jini mi caj la' wen chumtʌl ti la' lum. Mi caj la' taj la' tijicñʌyel mach bʌ yujilic jilel.
8Come joñon la' Yumon. Mij c'uxbin chuqui tac toj, pero mic ts'a'len xujch' yic'ot tsʌnsa. Mi caj cʌq'ueñetla la' chobejtʌbal. Mi caj c mel xuc'ul bʌ t'an quic'otetla mach bʌ yujilic jejmel ti pejtelel ora. 9Mi caj la' cʌjñel ti' tojlel yan tac bʌ tejclum cha'an mero i p'olbaletla Israel. Majqui jach mi' q'ueletla mi caj i ña'tan c'uxbibiletla c cha'an. Che' tsi' yʌlʌ lac Yum.
10Cabʌl mi' ñuc'an c pusic'al cha'an lac Yum. C'ax tijicña jax mi cubin cha'an c Dios, come tsi' coltayon. Tsi' yʌq'ueyon toj bʌ c pusic'al. Tsi' yʌq'ueyon c lʌp wen uts'atax bʌ pisil yubil, che' bajche' xñujpuñijel mu' bʌ i ch'ʌl i bʌ, che' bajche' xch'oc mu' bʌ caj ti ñujpuñijel mi' ch'ʌl i bʌ ti wen letsem tac bʌ i tojol. 11Lac Yum mi caj i mel ti toj jini colem tejclum tac. Che' bajche' jini lum mi' yʌc' ti colel lac pʌc'bal, che' bajche' mi' pasel pimel yic'ot nichim, che' ja'el lac Yum Dios mi' yʌc' ti pasel chuqui tac toj ti' tojlel i tejclumob. Che' jini mi caj i c'ʌyibeñob i ñuclel Dios pejtelel tejclum tac.
Currently Selected:
ISAIAS 61: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.