ISAIAS 60
60
I ñuclel jini tsiji' bʌ Jerusalén
1Ch'ojyenla c cha'año' bʌ. Pʌsʌla i c'ʌc'al la' coltʌntel cha'an mi' q'uelob pejtelel tejclum tac. Come wolix i pʌs i ñuclel lac Yum ti la' tojlel. 2Wen ic'yoch'an pañimil, come jini chumulo' bʌ ti petol pañimil ma'anic mi' cʌñob Dios, pero lac Yum mi caj i pʌs i sʌclel i ñuclel ti la' tojlel. 3Cabʌl tejclumob mi caj i tilelob ba' añetla ba' sʌc pañimil cha'an mi' coltʌntelob. Yumʌlob mi caj i tajob i tijicñʌyel cha'an la' ñuclel mu' bʌ i yʌq'ueñetla la' Yum.
4Letsan la' wut cha'an mi la' q'uel pañimil, come talob ba' añetla mu' bʌ caj i yochelob ti la' walobil. Talob ti ñajtʌl ba' ma'anic mi' cʌñob Dios. 5Che' mi la' q'uelob, mi caj i ñuc'an la' pusic'al. Mi caj i toj sajtel la' pusic'al cha'an wen tijicñayetla. Mi caj i yʌq'uentel Sion pejtelel i chubʌ'an jini tejclum tac mach bʌ anic tsi' cʌñʌyob Dios. Mi caj i cuchbeñetla tilel cabʌl chubʌ'añʌl tilem bʌ ti ñajtʌl. 6Bajc'ʌl caballo mi caj i c'otelob ba' añetla loq'uemo' bʌ ti Madián yic'ot ti Efa. Mi caj i cuchob tilel oro yic'ot pom. Mi caj i tsictesañob i ñuclel Dios. 7Mi caj la' wʌq'uentel alʌc'ʌl tac am bʌ ti Cedar. Mi caj i pʌyob tilel tat tiñʌme' tac ch'oyol bʌ ti Nebaiot cha'an ma' pulbeñon. Uts'at mi caj j q'uel c majtan ya' ti pulʌntib. Ti jim bʌ q'uin mi caj i q'uejlel ti ñuc jini Templo c cha'an che' mi cʌc' ti tsictiyel c ñuclel.
8¿Majquiyob jini motocñayo' bʌ talo' bʌ ti Israel che' bajche' x'ujcuts mu' bʌ i sujtel ti' ni'? 9Ñaxan mi' c'otelob colem barco tac loq'uemo' bʌ ti Tarsis. Woli' pʌyob tilel la' walobilob loq'uemo' bʌ ti ñajt tac bʌ tejclum. Woli' cuchob tilel i chubʌ'añob yic'otob. Come jini Ch'ujul Bʌ ti Israel tsa'ix i yʌq'ueyetla la' ñuclel ti' wutob jini año' bʌ ti pañimil.
10Jini ñajt bʌ ch'oyolob mi caj i cha' wa'chocobeñetla la' tejclum tac. Jini yumʌlob mi caj i melob la' we'tel. Tsac lowoyetla tic mich'ajel, pero wʌle ti cutslel mi caj c cha' p'untañetla. 11Ma'anic mi caj i ñujp'el i ti' tac la' tejclum mi ti q'uiñil mi ti ac'ʌlel. Jamʌl mi caj i yajñel cha'an mi' yochelob jini ñajt bʌ ch'oyolob woli bʌ i ch'ʌmbeñetla tilel i chubʌ'an tilem bʌ ti' lumal tac. Jini reyob mi caj i p'isetla ti' wenta. 12Jini tejclum mach bʌ anic mi' q'ueletla ti ñuc p'ump'un mi caj i cʌytʌl. Mi caj i lu' jilelob jini mach bʌ anic mi' p'isetla ti wenta. 13Jini año' bʌ ti Líbano mi caj i cuchbeñetla tilel jini c'ax uts'at bʌ te', jini ciprés, yic'ot jini taj, yic'ot olmo, cha'an mi la' cha' mel ti uts'at jini Ch'ujul bʌ Ajñibʌl c cha'an. I t'ojol jax mi caj i q'uejlel jini Templo c cha'an ya' ba' mi cʌc' c ñuclel. 14Jini yumʌlob tsa' bʌ i tic'layetla mi caj i tilel i peq'uesañob i bʌ ti la' tojlel. Mi caj i ñoctʌlob ti la' woc pejtel tsa' bʌ i ts'a'leyetla. Mi' caj ti ajlel Jerusalén, “I Tejclum lac Yum” yic'ot “Jini Ñuc bʌ Wits i Cha'an jini Ch'ujul Bʌ ti Israel”.
15Ma'anix mi caj c chʌn cʌyetla. Ma'anix mi caj la' ts'a'lentel. Mach ti la' bajñelic mi caj la' cʌytʌl. Mi caj c ñuq'uesañetla. Mi caj la' cha'len yumʌl ti pejtelel ora. Mach jilic la' tijicñʌyel ti pejtelel ora. 16Cabʌl reyob yic'ot cabʌl tejclum tac mi caj i yʌq'ueñetla i chubʌ'an cha'an mi la' ñaj'an ti pejtelel chuqui tac la' wom. Che' jini mi caj la' ña'tan Yumʌlon, la' waj Coltayajon tsa' bʌ c mʌñʌyetla. Joñon jach P'ʌtʌlon ti Israel. 17Mi caj cʌq'ueñetla chubʌ'añʌl ñumen letsem bʌ i tojol che' bajche' la' cha'an. Ti' wentajlel bronce mi caj cʌq'ueñetla oro. Ti' wentajlel tsucu taq'uin mi caj cʌq'ueñetla plata. Ti' wentajlel te' mi caj cʌq'ueñetla bronce. Ti' wentajlel xajlel mi caj cʌq'ueñetla tsucu taq'uin. Mi caj la' mel la' we'tel ti' ñʌch'tilel la' pusic'al. Mi caj la' jac' chuqui toj. 18Ma'anix mi caj i chʌn tejchel jontolil ti la' lumal. Ma'anix wocol yic'ot jisaya ba' chumuletla. Coltʌbiletla cha'an la' Yum, i wentajʌch i ts'ajquil la' tejclum. Mi caj la' suben wocolix i yʌlʌ che' mi la' wochel, che' mi la' loq'uel.
19Ma'anix i ye'tel q'uin ti la' tojlel. Ma'anix i ye'tel uw. Come añʌch la' c'ʌc'al ti q'uiñil yic'ot ti ac'ʌlel, jiñʌch la' Yum Dios mu' bʌ caj i chʌn lejmel i wenta c'ajc ti la' tojlel. Jini mi caj i yʌq'ueñetla la' ñuclel ti pejtelel ora. 20Ya' ba' añetla ma'anix mi caj i chʌn bʌjlel q'uin, mi jinic uw. Come la' Yum i wentajʌch c'ajc la' cha'an mach bʌ yujilic yajpel ti pejtelel ora. Mach chʌn talix i ch'ijyemlel la' pusic'al. Tsa'ix ñumi la' wocol. 21Toj mi caj i yajñelob la' pi'ʌlob ti jujuntiquil. Mi caj i yajñelob ti jini lum ti pejtelel ora che' bajche' c'oc' bʌ i buts te' tsa' bʌ c pʌc'ʌ mu' bʌ i wen colel. Jiñʌch c melbal tsa' bʌ c mele. Ñuc mi caj c pʌs c bʌ ti' tojlelob. 22Jini mach bʌ ñuquic mi caj i p'ojlel ti jump'ejl mil. Jini jump'ejl alʌ colonia mi caj i colel ti colem tejclum. Joñon la' Yumon. Mi caj c ts'ʌctesan che' i yorajlelix.
Currently Selected:
ISAIAS 60: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.