ISAIAS 59
59
Castigo cha'an i mul Israel
1Ma'anic woli ti jilel i p'ʌtʌlel lac Yum. Wen yujil i coltañetla. Mi' yubiñetla che' mi la' pejcan. 2Pero jini la' mul tsa'ix i tʌts'ʌyetla ba' ma'anic mi la' q'uel. Ti' caj la' mul lac Yum tsi' mʌyʌ i wut ba' ma'anic mi' yubiñetla. 3Laj pʌjq'uem ti ch'ich' la' c'ʌb. I yal la' c'ʌb laj pʌjq'uem ti jontolil. Mi la' cha'len lot. Mi la' sub chuqui tac jontol. 4Ma'anic majqui yom toj bʌ meloñel. Mi la' mulan lot. Mi la' sub chuqui mach isujmic. Mi' tejchel mulil ti la' pusic'al. Mi' xiq'uet ti jontolil. 5Mi' p'ojlel la' mul che' bajche' i tun lucum. Che' bajche' mi' chajpan i jalbal am, che'ʌch mi la' chajpan la' bʌ cha'an mi la' chuc la' pi'ʌlob. Mi' caj ti chʌmel jini mu' bʌ i ñopetla. 6Mi la' cha'len xujch'. Mi la' chilbeñob i chubʌ'an la' pi'ʌlob. Pero ma'anic mi' coltañetla come jontol la' melbal. Mi la' p'ol wocol ti pejtelel la' melbal. Mi la' c'ʌn la' c'ʌb cha'an jontolil. Bʌxetla ti jontolil. 7Ti ajñel mi la' majlel la' mel jontolil. Mi la' tsʌnsan jini winic mach bʌ anic i mul. Mi la' wʌn ña'tan lotiya yic'ot xujch'. Baqui jach mi la' majlel mi la' cha'len jisaya. 8Mach la' cʌñʌyic i bijlel i ñʌch'tilel la' pusic'al. Mach la' wujilic chuqui toj. Tsa'ix la' xoyo la' bijlel. Majqui jach mi' cha'len xʌmbal ti ili bij mach i tajayic i ñʌch'tʌlel i pusic'al.
9Jini cha'an ñajt añetla ba' añon. Mach la' tajayic chuqui toj. Tsa' la' pijta i sʌclel pañimil, pero tal jach ac'ʌlel. Ic'yoch'an jax pañimil ba' woliyetla ti xʌmbal. Ma'anic mi la' taj la' coltʌntel. 10Mi la' tajtan majlel pajc' che' bajche' xpots'. Sajtemetla ti la' mul che' bajche' jini mach bʌ anic i wut. Mi la' p'ojquin la' woc ti xinq'uiñil che' bajche' ti ac'ʌlel. Lajaletla bajche' xchʌmel ti ic'yoch'an bʌ pañimil. 11Cʌrʌcña la' bic' che' bajche' bajlum che' mi la' lon pijtan chuqui toj, pero mach talic. Jʌñʌcñayetla che' bajche' x'ujcuts, mi la' pijtan la' coltʌntel ti Dios, pero ñajt an ba' añetla. 12Cabʌlix la' mul ti' wut Dios. Mi' tsictesañetla cha'an xmuliletla.
Isujm, la cujil xmulilonla. 13La cujil mach xuc'ulonicla ti lac Yum. Tsa' lac ñusʌbe i t'an. Ma'anic tsa' lac tsʌcle Dios. Tsa'ix laj como lac t'an cha'an mi lac cha'len contra. Tsa' lac wʌn ña'ta lot ti lac pusic'al. Tsa' laj cʌntesa yaño' bʌ. 14Ma'anic majqui mi' mel winicob ti toj. Ma'anic mi' p'isob ti' wenta chuqui tac isujm. Ma'anic mi' jac'ob chuqui tac toj. Mi' mʌctañob.
15Mʌcʌlix jini isujm bʌ. P'ump'un mi' tic'lʌntel jini yom bʌ i cʌy i mul. 16Lac Yum tsi' laj q'uele. Ma'anic tsi' mula come ma'anic toj bʌ meloñel. Tsi' q'uele ma'anic winic yujil bʌ coltaya. Tsa' toj sajti i pusic'al come ma'anic majqui tsi' xin otsa i bʌ. I bajñel tsi' yotsa i bʌ. Tsa' mʌjli i cha'an. Cha'an ti' caj toj bʌ i pusic'al tsa' mejli. 17Lac Yum mi' mʌjlel i cha'an ti' tojlel i contrajob cha'an toj bʌ i pusic'al. Tsi' chajpa i bʌ ti coltaya che' bajche' soldado mi' xoj i bujc cha'an guerra yic'ot i mʌctijib yic'ot i pixol melbil bʌ ti tsucu taq'uin. Tsi' pixi i bʌ ti mich'ajel cha'an mi' q'uextan i mul i contrajob. Bʌx ti' ye'tel cha'an mi' coltan i tejclumob.
18Mi caj i yʌq'ueñob i toj i mul i contrajob. Mi caj i yubiñob i mich'ajel lac Yum. Mi caj i tojob i mul pejtelel mu' bʌ i ts'a'leñob ya' ti ñajt tac bʌ i lumal. 19Mi caj i bʌc'ñañob lac Yum ya' ba' mi' bʌjlel q'uin c'ʌlʌl ti' pasibal q'uin. Che' mi' tilel laj contra che' bajche' but'ja'lel cha'an mi' tic'lan i tejclumob Dios, ya'an i Ch'ujlel lac Yum ti' tojlelob cha'an mi' coltañob.
20Mi caj i c'otel i yaj coltaya jini año' bʌ ti Sion tsa' bʌ i cʌyʌyob i mul, che'en lac Yum. 21Jiñʌch jini t'an mu' bʌ cʌq'ueñob: Jini quEspíritu mu' bʌ cʌq'ueñetla ma'anic mi caj i cʌyetla. Mi caj la' mulan chuqui tac uts'at. Mi caj la' ts'a'len chuqui tac mach uts'atic, jatetla yic'ot la' walobilob ti pejtelel ora. Che' tsi' yʌlʌ lac Yum.
Currently Selected:
ISAIAS 59: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.