ISAIAS 55
55
I yʌc'bal lac Yum
1Yom ma' jal'an jumuc', majqui jach an i tiquin ti'. La' tilic i jap ja' mu' bʌ cʌc'. Jini mach bʌ añobic i taq'uin, la' tilicob i c'ux waj i jap vino yic'ot lech ti' majtan jach. 2¿Chucoch mi la' to'ol jisan la' taq'uin ti' mʌñol jini mach bʌ wajic? Woli ti to'ol jilel la' taq'uin che' wi'ñayetla. Ñich'tanla c t'an. Che' jini mi caj la' c'ux wen bʌ i bʌl la' ñʌc'. Mi caj la' tijicñesan la' pusic'al yic'ot sumuc tac bʌ i bʌl la' ñʌc'. 3La'la ba' añon. Ubinla c t'an. Ñich'tañonla cha'an chʌn cuxul mi la' wajñel. Mi caj c mel xuc'ul bʌ t'an la' wic'ot. Mi caj c p'untañetla. C'ux mi cubiñetla che' bajche' tsaj c'uxbi David. 4Tsac wa'choco David ti testigo ti' tojlel c tejclum. Tsac wa'choco ti yumʌl yic'ot ti xcʌntesaya ti' tojlel cabʌl tejclum tac mach bʌ la' pi'ʌlobic. 5Jatet ja'el mi caj a pʌybeñon tilel yambʌ tejclumob mach bʌ i cʌñʌyoñobic, yic'ot yaño' bʌ winicob mach bʌ a pi'ʌlobic. Ajñel mi caj i tilelob ba' añet cha'an mi' cʌñob a Yum Dios, jini Ch'ujul Bʌ ti Israel, come tsa'ix i ñuq'uesayet.
6Sajcanla lac Yum che' mu' to mejlel ti tajtʌl. Pʌyʌla che' lʌc'ʌl to an. 7La' i cʌy i mul jini xjontolil. Jini mach bʌ tojic la i cʌy i ña'tan jontolil. La' i sutq'uin i bʌ ti lac Yum, come mi caj i p'untan. Mi caj i ñusʌben i mul ti pejtelel i pusic'al. 8Come mach lajalic mi la' ña'tan bajche' wolic ña'tan. Mach lajalic la' bijlel bajche' c bijlel, che'en lac Yum. 9Wen chan jini panchan. Mach la' tajayic i chanlel. Che' ja'el c bijlel ñumen chan bajche' la' bijlel. Mic ts'ʌctesan pejtel mu' bʌ c ña'tan c mel. Mach mejlic la' ch'ʌmben i sujmlel jini mu' bʌ c ña'tan.
10Jini ja'al yic'ot i ña'al tsʌñal mi' yajlel tilel ti panchan. Ma'anix mi' chʌn sujtel. Mi' laj ch'ʌch' jini lum. Che' ach'ix jini lum mi' colel pʌc'ʌbʌl. Mi' yʌc' i wut. Mi' cha'leñob pac' winicob cha'an mi' tajob chuqui mi' c'uxob. 11Che'ʌch ja'el c t'an mu' bʌ c sub. Mach lolomic jach. Mach to'o sujtic. Mi' mel chuqui tac com. Mi' jolontesan i ye'tel tsa' bʌ cʌq'ue i mel.
12Mi caj la' wajñel ti' tijicñʌyel la' pusic'al yic'ot ti la' ñʌch'tʌlel. Jini wits yic'ot bujtʌl tac mi' cajel ti c'ay yubil ti' tojel la' wut. Jini te' tac mi caj i jats'ob i c'ʌb cha'an tijicña pañimil. 13Ya' ba' tsa' coli ch'ix mi caj i colel taj. Ya' ba' tsa' coli ich'ite' mi caj i colel mirto te'. Ti pejtelelob mi caj i subob i ñuclel i c'aba' lac Yum. Mi caj i yʌc'ob ti cʌjñel lac Yum ti pejtelel ora.
Currently Selected:
ISAIAS 55: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.