ISAIAS 52
52
Dios mi caj i yʌc' ti colel Jerusalén
1Ch'ojyen, ch'oyenla añet bʌ la ti Jerusalén. Wen p'ump'un tsa' ajniyetla. P'ʌtesan la' bʌ. Lʌpʌx la' pislel, jini c'ax uts'at bʌ, cha'an mi la' wajñel ti ch'ujul. Mach chʌn talobix jini xmulilob mach bʌ i cʌñʌyobic Dios. 2Ch'ojyenla, tijcanla i lumil la' woc ya' ba cʌchʌletla, Jerusalén. Loq'uenla ti libre. Loc'sanla jini lazo.
3Lac Yum woli' yʌl: Tsa' wersa pʌjyiyetla ba'an yambʌ la' yum pero ti majtan jach. Ma'anic la' tojol. Jini cha'an mach ti taq'uinic mi caj c cha' mʌñetla che' mij coltañetla. 4Ti wajali tsajniyob ti chumtʌl ti Egipto c winicob. Ti wi'il jini asiriajob tsa' caji i to'ol tic'lañob anquese ma'anic i mul. 5Wʌle, ¿chuqui wolij q'uel? Tsa' to'ol pʌjyiyob majlel c cha'año' bʌ. Tsa' tic'lʌntiyob. I yumob tsi' chañ'esayob i bʌ. Mi' p'ajob j c'aba' ti jujump'ejl q'uin. 6Pero che' mic tsictesan c p'ʌtʌlel, wersa mi caj i cʌñon c tejclumob. Mi caj i ña'tañob Joñoñʌch mu' bʌ c pejcañob. Joñoñʌch, che'en.
7Wen uts'atax ya' ti pam wits i yoc jini mu' bʌ i tilel cha'an mi' tsictesan jini Wen T'an, cha'an mi' tajob i ñʌch'tʌlel i pusic'al yic'ot i coltʌntel jini año' bʌ ti Sion, cha'an mi' ña'tañob woli ti yumʌntel lac Dios. 8¡Ñich'tanla! C'am woliyob ti t'an xcʌntayajob la' cha'an. Wen c'am mi' cha'leñob oñel cha'an tijicñayob. Come mi caj i q'uelob lac Yum woli bʌ i cha' lʌc'tiyel tilel ti Sion. 9Cha'lenla c'am bʌ oñel añet bʌ la ti Jerusalén. Yom tijicña la' pusic'al cha'an tsa' mʌjli la' cha'an. Mach chʌn t'uchtʌbiletix come lac Yum tsa'ix i cha' p'unta i cha'año' bʌ. Tsa'ix i cha' mʌñʌ jini año' bʌ ti Jerusalén. 10Lac Yum tsa'ix i pʌsʌ ch'ujul bʌ i c'ʌb ti' wut pejtelel tejclum. Ti pejtelel pañimil mi' caj ti tsictiyel laj coltʌntel tilem bʌ ti lac Dios.
11Loq'uenla ti Babilonia, c pi'ʌlob. Cʌyʌla pejtelel i mul jini año' bʌ ti pañimil. Mach yomic mi la' tʌl chuqui tac bibi'. Sʌq'uesan la' bʌ jatetla mu' bʌ la' cuch majlel i latu tac lac Yum. 12Come ma'anic mi caj la' loq'uel ti ajñel. Ma'anic mi caj la' puts'el loq'uel. Come ñaxan mi' majlel lac Yum ti la' tojlel. Mi' cʌntañetla majlel ti la' pat i Dios Israel.
Isaías tsi' wʌn subu i wocol jini Mesías
13Q'uele c Winic. Uts'at bajche' mi caj i mel ti cabʌl i ña'tʌbal. Mi caj i wa'chocontel ti chan. Mi caj i yajñel ti ñuc. 14Tsa' toj sajtiyob i pusic'al cabʌlob che' bʌ tsi' q'ueleyob. Wen lojwen i wut c'ʌlʌl mach chʌn cʌñʌlix mi winic. Ñumen lojwen i bʌc'tal bajche' yaño' bʌ winicob. 15Che' jini mi caj i mulbeñob ti' ch'ich'el cabʌl winicob x'ixicob ti yan tac bʌ lum. Jini yumʌlob ñʌch'ʌlix mi caj i cʌytʌlob ti' tojlel jini winic. Come ma'anic tsa' subentiyob chucoch tsa' tic'lʌnti, pero che' mi' q'uelob mi caj i ch'ʌmbeñob isujm jini mach bʌ anic tsi' yubiyob.
Currently Selected:
ISAIAS 52: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.