ISAIAS 45
45
Dios tsi' sube Ciro mi caj i mʌjlel i cha'an
1Jiñʌch i t'an lac Yum tsa' bʌ i sube Ciro jini yajcʌbil bʌ i cha'an: Joñon wolij coltañet cha'an ma' jisan cabʌl tejclum tac, cha'an ma' jisʌbeñob i p'ʌtʌlel ñuc bʌ reyob. Mi cʌc' ti jejmel i ti' tac Babilonia. Ma'anic majch mi mejlel i cha' ñup'. 2Joñon ñaxan mic majlel ti' tojel a wut. Mi caj c pamun majlel bij. Mi caj c bic'ti c'ʌs jini puerta tac yic'ot bara tac melbil bʌ ti tsucu taq'uin. 3Mi caj c loc'sʌbeñet ti' sʌclel pañimil jini chubʌ'añʌl letsem tac bʌ i tojol mucbil bʌ ti lum ba' ic'yoch'an bʌ. Che' jini mux caj a ña'tan a Yumon. Tsac pʌyʌyet ti a c'aba', Ciro. I Dioson Israel. 4Cha'an c'ux mi cubin c winic Jacob (jini c winic Israel), jini cha'an tsac wa'chocoyet ti ili e'tel. Tsac pʌyʌyet ti a c'aba'. Tsa cʌq'ueyet a p'ʌtʌlel ti yumʌl anquese mach a cʌñʌyonic. Che' jini mi caj j coltan Israel tsa' bʌ c yajca. 5Joñon jach Yumʌlon. Ma'anic yambʌ. Joñon jach Dioson. Mi caj c p'ʌtesañet anquese mach a cʌñʌyonic, 6cha'an mi' ña'tañob ti pejtelel pañimil c'ʌlʌl ba' mi' pasel q'uin yic'ot ba' mi' bʌjlel q'uin. Ma'anic yambʌ cojach joñon. Joñon jach Yumʌlon. Ma'anic lajal bʌ bajche'on. 7Joñon mic melben i sʌclel q'uin yic'ot ac'ʌlel. Mi cʌq'ueñob i wenlel winicob yic'ot jini bʌbʌq'uen bʌ. Yumʌlon. Mic mel pejtelel iliyi. 8La' tilic toj bʌ a pusic'al che' bajche' ja'lel ti chan. La' wen p'ojlic ti pañimil i coltʌntelob winicob yic'ot toj bʌ i pusic'al. C melbalʌch. Joñon, la' Yum, tsac mele.
Jini xmel pañimil
9Tal cabʌl wocol ti' tojlel jini mu' bʌ i yʌ'len i Yum tsa' bʌ i mele. Lajalonla bajche' p'ejt melbil bʌ ti lum. Jini melbil bʌ ti lum, ¿yom ba mi' suben xmeloñel: “¿Chuqui wola mel?” Jini oc'ol ma'anic mi' suben xmel uc'um: “Mach uts'atic wola' melon”. 10Che' ja'el jini alʌl mach mejlic i suben i tat: “¿Chucoch tsa' p'oloyon?” Mach mejlic i suben i ña': “¿Chucoch tsa' wʌc'ʌyon ti pañimil?” Mach che'ic mi' yʌlob.
11Jini lac Yum, i Dios israelob tsa' bʌ i mele Israel, tsi' yʌlʌ: ¿Yom ba ma' letsan a t'an tij contra? ¿Yom ba ma' cʌntesañon bajche' yom mic mel jini com bʌ c mel? 12Joñon tsac mele pañimil. Tsac mele winic ti pañimil. Tsac lich'choco panchan tij c'ʌb. Tsa cʌc'ʌ jini ec' ti' yajñib tac. Añʌch c p'ʌtʌlel cha'an mic ts'ʌctesan pejtelel tsa' bʌ c subu. 13Joñon tsac yajca Ciro cha'an com cʌc' ti tsictiyel c tojel. Mi caj c toj'esʌben majlel pejtel i bijlel. Ciro mi caj i cha' wa'chocobeñon c tejclum. Mi caj i yʌc' ti colel c cha'año' bʌ tsa' bʌ cʌjchiyob majlel. Ma'anic mi caj i c'ajtibeñob tojoñel, che'en i Yum Panchan yic'ot Pañimil.
14Woli' yʌl lac Yum: Talob jini año' bʌ ti Egipto yic'ot xchoñoñel loq'uemo' bʌ ti Etiopía, yic'ot jini sabeojob, cha'an mi' yochelob ti a wenta ti majtan e'tel. Mi caj i tsʌcleñet majlel. Mi caj i ñocchocoñob i bʌ ti a tojlel cha'an mi' c'ajtiñob i coltʌntel ti wocol t'an, come ya' jach ti a tojlel mi' yajñel Dios, jini jach bʌ Dios. Mi caj i yʌlob: “Isujm, wʌ'an Dios a wic'ot. Ma'anic yambʌ”, che'ob. 15Isujm ma' mujcun a bʌ Dios, i Dioset bʌ Israel. Ma'anic mij q'uel bajche' ma' mel a we'tel, caj Coltaya. 16Mi' cajelob ti quisin jini xmel diosob ti pejtelelob. Mi caj i puts'elob cha'an bʌq'uen. 17Pero Israel mi caj i taj i coltʌntel ti pejtelel ora ti' tojlel lac Yum. Ma'anix mi caj i chʌn cha'len quisin yic'ot bʌq'uen ti pejtelel ora.
18Lac Yum, jiñʌch Dios. Tsi' mele panchan yic'ot pañimil, yic'ot pejtelel chuqui tac an. Mach lolomic tsi' mele pañimil. Tsi' mele cha'an i chumlib winicob. Tsi' yʌlʌ: Joñon Yumʌlon, ma'anic yambʌ. 19Ma'anic mic cha'len t'an ti mucul. Ma'anic mic mujcun c bʌ ti ic'yoch'an bʌ pañimil. Ma'anic tsac subeyob i p'olbalob Jacob cha'an mi' lon tsajcañoñob. Joñoñʌch la' Yumon. Mic sub chuqui tac isujm. Mic sub chuqui tac toj, che'en.
Lac Yum mi' pʌy jini sajtemo' bʌ
20Much'quin la' bʌ ba' añon. Tempan la' bʌ pejteletla mach bʌ anic tsa' jisʌntiyetla cha'an Ciro, cha'an mi la' wubin jini mu' bʌ caj c subeñetla. Ma'anic i ña'tʌbal winicob mu' bʌ i q'uechob ñumel i diosob. Mi' lon c'ajtibeñob i coltʌntel ti' tojlel dioste' tac mach bʌ yujilic coltaya. 21Mi tsi' coltayetla dioste' subula. Teme la' t'an. Tsictesanla i sujmlel. ¿Majqui tsi' wʌn subu jini woli bʌ i yujtel? ¿Mach ba' anic tsac subu ti wajali? Ma'anic yambʌ Dios. Joñon jach Dioson. Tojon, Xcoltayajon. Ma'anic yambʌ. Joñon jach.
22Q'ueleyonla pejtel año' bʌ ti pañimil cha'an mi la' taj la' coltʌntel. Come Dioson, ma'anic yambʌ, joñon jach, che'en lac Yum. 23Tic bajñel jach tsa cʌc'ʌ c t'an. Tilem ti toj bʌ c pusic'al jini t'an tsa' bʌ loq'ui ti quej. Mach chʌn sujtic. Pejtel winicob mi caj i ñocchocoñob i bʌ tic tojlel. Mi caj i lu' melob i bʌ tic tojlel.
24Che' jini mi caj i yʌlob: “Isujm tilem ti lac Yum toj bʌ lac pusic'al yic'ot lac p'ʌtʌlel mu' bʌ i yʌq'ueñonla”, che'ob. Mi caj i tilelob jini tsa' bʌ i ts'a'leyoñob. Ti pejtelob mi' cajelob ti quisin. 25Mi caj j q'uel ti toj pejtel mero isujm bʌ i p'olbal Israel. Mi caj i mʌjlel i cha'añob, che'en lac Yum.
Currently Selected:
ISAIAS 45: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.