ISAIAS 41
41
I Yaj Coltaya Israel
1Lac Yum tsi' yʌlʌ: Ñʌch'i'la. Ñich'tʌbeñon c t'an chumulet bʌ la ti' ti'il ja' mach bʌ anic mi la' cʌn Dios. Yom mi la' bej tilel ba' añon cha'an mi la' pejcañon. La' lac tem mel lac bʌ. 2¿Majqui tsi' ñijca tilel Ciro, jini ñuc bʌ yumʌl ya' ti' pasibal q'uin mu' bʌ i mʌjlel i cha'an baqui jach mi' majlel? Joñon tsa cʌq'ue i ye'tel ti' tojlel pejtel tejclum cha'an mi' yumañob reyob. Ciro mi' puts'tesan soldadojob. Mi' tsʌnsañob ti espada. Mi' julob ti' te'el jalʌjb. 3I c'aba' Ciro jini ñuc bʌ i ye'tel. Mi' yajñesan i contrajob ti bij tac ba' maxto ñumenic. Uts'at mi' q'uel bij che' bajche' jini wen cʌmbil bʌ i cha'an. 4¿Majqui i ye'tel jini? Que'telʌch. Joñon tsac cha'le yumʌl ti' tojlel tejclumob c'ʌlʌl ti' cajibal pañimil. Joñoñʌch jini ñaxan bʌ yic'ot wi'ilix bʌ. Joñon Dioson, che'en.
5Jini año' bʌ ti' ti'il colem ja' tsi' q'ueleyob jini bʌbʌq'uen bʌ. Tsi' wen bʌc'ñayob jini wocol woli bʌ i tilel ti' tojlelob. Jini ñajt bʌ ch'oyolob tsa' toj sajtiyob i pusic'al. 6Ti jujuntiquil tsa' caji i coltan i pi'ʌlob. Tsa' caji i subeñob: “Ch'ejl'esan a bʌ. 7Mele ti uts'at lac dios”, che'en. Jini yujil bʌ i juc'ol te' mi' ñuq'uesʌben i pusic'al jini mu' bʌ i cha'len e'tel ti plata yic'ot oro. Jini mu' bʌ i pʌc' oro ya' ti' yajñib mi' yʌl: “Uts'atix mi' wen chuc che' an chuqui mi lac pʌc'”, che'en. Mi' buchchocon ba' tsʌts mi' cʌytʌl ame yajlic. 8Ubin, Israel, c winiquet. Ubin, Jacob. Tsac yajcayet ti oñiyi. I p'olbalet Abraham, jini wen cʌñʌ bʌ c cha'an. 9Wen ñajt tsac pʌyʌyet tilel. Tsac loc'sayet ti ñajt bʌ pañimil. Tsac subeyet: “C winiquet, c yajcʌbalet. Ma'anic wolic wis cʌyet”, cho'on. 10Mach a cha'len bʌq'uen, come añon quic'otet. Mach yomic ma' lij a bʌ come a Dioson. Mi caj c wen p'ʌtesañet. Mi caj j coltañet. Mi caj j cʌntañet ti p'ʌtʌl bʌ j c'ʌb jini ñoj bʌ.
11Awilan pejtel mu' bʌ i ts'a'leñet mi caj i yubiñob quisin. Mi caj i toj sajtelob i pusic'al. Jini mu' bʌ i contrajiñet mi caj i jilelob. Ma'anix mi caj a chʌn p'isob ti a wenta. 12Mi caj a lon sajcan jini mu' bʌ i ts'a'leñet, pero mach a tajayic. Ma'anix chʌn tsiquilob. Ma'anix la' contrajob. Tsa'ix lajmi guerra. 13Come joñon a Yumon, a Dioson. Mi caj c chuquet ti ñoj bʌ a c'ʌb. Mach a cha'len bʌq'uen, come mi caj j coltañet.
14Mach ma' wis cha'len bʌq'uen Jacob anquese lajal a c'unlel che' bajche' chʌchʌc lucum. Come joñon mi caj j coltañet. Joñon jini wen Ch'ujul Bʌ ti Israel, la' Yumon. Tsac mʌñʌyet. 15Lajalet bajche' tsucul bʌ top'i' lum mach bʌ anic i yej. Mi caj c cha' melet che' bajche' tsiji' bʌ e'tijibʌl jay bʌ i yej. Mi caj a jem majlel wits. Mi caj i yajlelob a contrajob anquese p'ʌtʌlob. 16Ñajt mi caj a chocob majlel. Jini ic' mi caj i cuchob majlel che' bajche' i yopol te'. Jini sutujt ic' mi caj i pam pucob. Pero tijicñayet ti a Yum. Mi caj i ñuc'an a pusic'al cha'an jini Ch'ujul Bʌ i cha'an Israel. 17Che' ma'anix i ya'al jini p'umpuño' bʌ mach bʌ añobic i chubʌ'an, mi caj i sʌclañob ñumel, pero mach i tajayobic. Che' woliyob ti wocol cha'an tiquiñob i ti', joñon mi caj c jac'beñob che' mi' c'ajtibeñoñob. Mi caj c p'untañob. Joñon i Dioson israelob. Ma'anic mi caj j cʌyob. 18Ya' ti pam wits mi caj cʌc' ti wʌjlel loq'uel ja'. Ya' ti joctʌl ba' tiquin lum mi caj cʌc' ti loq'uel cuxul bʌ ja'. Ya' ba' tiquin pañimil mi' caj ti lʌmtʌl ja'. 19Mi caj cʌc' ti colel jini ch'ujte' yic'ot jini acacia yic'ot jini olivote' ya' ti tiquiñal pañimil. Temel mi caj i colel yic'ot jini ciprés yic'ot jini taj. 20Che' jini mi' caj ti cʌjñel c melbal. Mi caj i q'uelob winicob. Mi caj i ña'tañob tsac mele joñon. La' Yumon Ch'ujulon Bʌ ti Israel.
Dios mi' wajlen jini dios tac
21La'la mele la' bʌ ba' añon. Subeñon chuqui i c'ʌjñibal jini dioste' tac la' cha'an, che'en lac Yum Dios, i Rey Israel. 22Pʌyʌla tilel la' dioste tac. La' i sub chuqui mi' caj ti ujtel, yic'ot chuqui tsa' ujti wajali, cha'an mi la' ñop. 23La' i wʌn tsictesan chuqui mi' caj ti ujtel, cha'an mi la' wen ña'tan mi diosʌch. Mi an chuqui yujil i melol, la' i mel mi che' jach wistʌl mi uts'at o mi jontol, cha'an mi' toj sajtel la' pusic'al. 24Pero ma'anic i c'ʌjñibal. Ma'anic chuqui mi' wis mel. To'ol lolom jach. Tonto jax jini mu' bʌ i ñop. 25Ya' ti tojel norte yic'ot ya' ba' mi' pasel q'uin tsac pʌyʌ tilel Ciro yic'ot i soldadojob. Mi caj i pejcañon tij c'aba'. Mi caj i contrajin jini colem tejclum tac. Mi caj i t'uchtañob. Añob ti' p'ʌtʌlel che' bajche' lum ti' c'ʌb xmel uc'um. 26¿Majqui tsi' wʌn tsictesa jini mu' bʌ caj ti ujtel? ¿Majqui tsi' wʌn alʌ cha'an mi la' na'tan isujm i t'an ba' ora mi' ts'ʌctiyel? Ma'anic majqui tsi' wʌn tsictesa. Ma'anic majch tsi' wʌn alʌ. Mach ubibilic i cha'an winicob. 27Pero joñon tsac wʌn subeyob jini año' bʌ ti Sion. Tsa cʌq'ueyob jini wen t'an ya' ti Jerusalén. 28Che' bʌ tsac laj q'uele pañimil, ma'anic tsac taja mi juntiquilic tsa' bʌ i wʌn ña'ta. Ma'anic dioste' yujil bʌ cʌntesa. 29Junlajalob. Ma'anic i c'ʌjñibal. To'ol lolom jach. Ma'anic chuqui mi' wis melob. Ñumen an i c'ʌjñibal jini ic'. Mi' lon melbeñob i yejtal tac jini diosob.
Currently Selected:
ISAIAS 41: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.