YouVersion Logo
Search Icon

ISAIAS 40

40
I ñuclel lac Yum mu' bʌ i ñuq'uesʌbeñonla lac pusic'al
1Dios tsi' sube jini x'alt'añob i cha'an: Ñuq'uesʌbeñob i pusic'al, ñuq'uesʌbeñob i pusic'al c cha'año' bʌ. 2Pejcañob ti uts bʌ t'an jini año' bʌ ti Jerusalén. Subeñob cha'an tsa'ix ñumi i yorajlel i ch'ijiyemlel i pusic'al. Ñusʌbilix i mul. Cha' ñumelix mi caj cʌq'ueñob i yutslel c t'an cha'an tsa'ix i ñusayob wocol cha'an i mul, che'en Dios.
3An majqui woli' yʌl ti c'am bʌ t'an: Chajpʌbenla i bijlel lac Yum ya' ti colem bʌ i tiquiñal pañimil. Pʌtbenla majlel ñuc bʌ bij ya' ti tiquin lum cha'an tal lac Dios. 4Yom mi' bujt'el pejtel joctʌl, yom mi' pamuntel jini lomtʌl cha'an pamal mi' cʌytʌl. La' toj'esʌntic jini bij ya' bʌ xoyolmetel jax. La' mejlic bij ba' bulul bexel, che'en. 5Mi caj i tsictiyel i ñuclel lac Yum. Pejtel año' bʌ ti pañimil mi caj i tem q'uelob, come che'ʌch tsi' yʌlʌ lac Yum. 6Ubiben i t'an jini winic mu' bʌ i yʌl: “Subu”, che'en. “¿Chuqui yom mic sub?” cho'on. Subu ñumel ili t'an: “Lajalonla bajche' pimel mu' bʌ i chʌmel. Pejtelel lac ñuclel lajalʌch bajche' i nich pimel. 7Jini jam mi' tiquin. Mi' yajlel i nich pimel che' mi' wujtan lac Yum ti' yiq'uilel i yej. Lajalonla bajche' jini pimel. 8Mi' tiquin pimel yic'ot i nich. Mi' yajlel. Pero i t'an lac Dios mi' yajñel ti pejtelel ora”, che'en. 9Jatet mu' bʌ a tsictesan wen t'an yom ma' letsel ya' ti chan bʌ wits ti Jerusalén. C'am yom ma' puc majlel jini wen t'an. Mach ma' cha'len bʌq'uen. Subeñob winicob ti Judá: “¡La' q'uelela Dios!” che'etla. 10Come tal lac Yum Dios yic'ot cabʌl i p'ʌtʌlel cha'an mi' cha'len yumʌl. Mi caj i pʌy tilel i cha'año' bʌ tsa' bʌ i mʌñʌ. Jiñʌch i chobejtʌbal cha'an i bajñel e'tel. 11Mi caj i cʌntan i cha'año' bʌ che' bajche' xcʌnta tiñʌme'. Mi caj i tempan tilel jini alʌ to bʌ. Mi caj i mec' majlel ti' tajn. Wen tsajil mi caj i pʌy majlel jini tiñʌme' cʌntʌbilob to bʌ i yal.
I p'ʌtʌlel yic'ot i ña'tʌbal Dios
12¿Majqui tsi' p'isi i tamlel colem ñajb ti' c'ʌb? ¿Majqui tsi' yʌq'ue i ti' panchan ya' ba' jaxʌl? ¿Majqui tsi' tempa lum ba' yom mi' yajñel? ¿Majqui tsi' p'isi i yalel lum yic'ot wits che' bajche' ti balanza? 13¿Majqui tsi' cʌntesa i Ch'ujlel lac Yum? ¿Majqui tsi' yʌq'ue i ña'bʌbal? 14¿Tsa' ba i c'ajtibe yambʌ bajche' yom melol i ye'tel? ¿Majqui tsi' pʌsbe bajche' yom mi' melonla? ¿Majqui tsi' toj'esa ti' bijlel? 15Come lac Yum mi' q'uel pejtel winicob ti' petol pañimil che' bajche' junchʌjc' ja' mu' bʌ i yajlel ti yopom. Lajalob bajche' ts'ita' ts'ubejn ti balanza. Mi' ch'uy letsel jini lum joyol bʌ ti ja' che' bajche' ts'ubejn. 16Mach jastʌyic pejtel jini te' am bʌ ti Líbano cha'an mi lac lʌts ti c'ajc ya' ti' pulʌntib. Mach jastʌyic pejtelel alʌc'ʌl cha'an pulbil bʌ i majtan Dios. 17Anquese motocñayob winicob ¿chuqui i ye'tel ti' tojlel lac Yum? Ma'anic i c'ʌjñibal. Ma'anic i p'ʌtʌlel. Ma'anic chuqui mi mejlel i melbeñob.
18Ma'anic majch lajal bajche' Dios. ¿Mejl ba lac mel i yejtal tac? 19Mach mejlic lac lajin Dios yic'ot dioste' i melbal bʌ winic, tep'bil bʌ ti oro, ch'ʌlbil bʌ ti sʌsʌc taq'uin. 20Jini winic mach bʌ anic i taq'uin cha'an mi' mʌn jump'ejl dios melbil bʌ ti oro mi' sʌclan te' mach bʌ yujilic joch'. Che' jini mi' ch'ʌmben majlel xjuc'te' mu' bʌ i melben i dios mach bʌ yujilic i ñijcan i bʌ.
21¿Mach ba anic a pusic'al? ¿Chucoch ma' mel lolom tac bʌ? ¿Mach ba ubibilic a cha'an i t'an Dios? ¿Mach ba subebiletic? ¿Mach ba wen tsiquilic i sujmlel Dios c'ʌlʌl ti' cajibal pañimil? 22Jiñʌch Dios jini buchul bʌ ya' ti panchan ti' chañelal pañimil. Biq'uit mi' q'uel jini chumulo' bʌ ti pañimil bajche' xc'ajba sajc'. Mi' lich' panchan che' bajche' pisil bʌ otot ba' mi' chumtʌl. 23Mi' chilbeñob i ye'tel jini p'ʌtʌlo' bʌ yic'ot yumʌlob ti pañimil cha'an ma'anix mi laj q'uelob ti ñuc. Ma'añobix i c'ʌjñibal. 24Jumuc' jach an i ye'tel. Mi' bʌc' chilbentelob. Lajalob bajche' pimel mu' bʌ lac pʌc'. Che' cajel jax to woli' chuc lum jini pimel, Dios mi' tiquesan ti' yiq'uilel i yej. Ti ora jach mi' tiquin. Che' mi' tilel sutujt ic' mi' wejlan majlel che' bajche' tiquin bʌ i te'el ixim.
25¿Chucoch ma' lajiñon bajche' te'? ¿Am ba yambʌ lajal bʌ bajche' joñon? che'en jini Ch'ujul Bʌ. 26Letsan a wut cha'an ma' wen q'uel chuqui an. ¿Majqui i melbal jini ec' tac? Dios mi' yʌc'ob ti ajñel ti jujump'ejl. Mi' pejcañob ti' c'aba'. Ma'anic mi' wis cʌy i bʌ mi jump'ejlic ec', come i Yum mi' pʌyob majlel ti cabʌl bʌ i p'ʌtʌlel yic'ot i ñuclel. Mi' laj cʌntan ec'. 27Israelob, i p'olbaletla Jacob, ¿chucoch mi la' lon al ma'anic woli' q'uel a wocol jini lac Yum, cha'an mach tojic lac Yum? 28¿Maxto ba anic tsa' la' ña'ta? Jiñʌch lac Yum Dios tsa' bʌ i mele pejtel pañimil. ¿Mach ba anic ubibil la' cha'an? Ma'anic mi' c'uñ'an. Mach yujilic lujban. Mach lu' cʌmbilic lac cha'an i ña'tʌbal. 29Mi' cha' p'ʌtesan jini c'uño' bʌ. Mi' cha' aq'ueñob i wersa jini mach bʌ p'ʌtʌlobix. 30Jini ch'itoñob mi' lujbañob. Jini ch'iton winicob mi' c'uñ'añob. Mi' jilel i wersa. 31Pero jini mu' bʌ i chʌn pijtañob lac Yum cha'an mi' coltʌntelob mi caj i cha' tajob i p'ʌtʌlel. Mi caj i letselob che' bajche' xiye' yujil bʌ wejlel. Ma'anic mi' caj ti lujb'añob che' mi' cha'leñob ajñel. Ma'anic mi' caj ti c'uñ'an pañimil che' mi' cha'leñob xʌmbal.

Currently Selected:

ISAIAS 40: ctuBI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy