ISAIAS 28
28
T'an ti' contra Samaria
1Obolob i bʌ jini año' bʌ ti Samaria, jini joctʌl bʌ tejclum ya' ba' chumul i yum israelob. Mi' chañ'esañob i bʌ jini xyʌc'ʌjelob. Mi' ch'ʌlob i bʌ yic'ot nichim. Mi' boñob i jol ti perfume. Mi' cha'leñob q'uiñijel. Mi caj i jilel i ñuclel yic'ot i ch'ʌjlil. 2Awilan, lac Yum mi caj i choc tilel p'ʌtʌl bʌ soldadojob loq'uemo' bʌ ti Asiria cha'an mi' contrajiñetla. Talob che' bajche' tuñija' yic'ot cabʌl ic'. 3Mi caj i t'uchtʌntel jini tejclum Samaria ba' mi' chañ'esañob i bʌ jini xyʌc'ajelob israelob. 4Ti ora jach mi caj i jilel i ñuclel yic'ot i t'ojlʌwel jini wen bʌ joctʌl. Lajal mi caj i jilel che' bajche' i pʌn wut higuera che' an majch mi' tuc' cha'an mi' bʌc' c'ux.
5Ti jim bʌ ora i Yum Panchan yic'ot Pañimil mi caj i yʌq'ueñob i ñuclel yic'ot i t'ojlʌwel i cha'año' bʌ mu' bʌ i cʌytʌlob. Lac Yum i wentajʌch i ch'ʌjlil i jol. 6Mi caj i yʌq'uen toj bʌ i pusic'al jini mu' bʌ i cha'len meloñel. Mi caj i yʌq'ueñob i ch'ejlel i pusic'al jini soldadojob mu' bʌ i cʌntañob i ti' tejclum ame ochicob i contrajob.
7Pero wʌle tʌctʌcñayob ti xʌmbal cha'an yʌcob. Jini motomajob yic'ot x'alt'añob wen yujilob lembal. Wo'ob jax ti lembal. Sojquemob i jol. Mach mejlix ti meloñel. 8Jini we'te' i cha'añob pʌjq'uem jax ti xejʌl yic'ot ti' bi'bi'lel. Ma'anic sʌc bʌ. Lu' bibi'.
9Mi' yʌlob: ¿Chucoch mi' lon pejcañonla Isaías che' bajche' jini? ¿Mu' ba i lon ña'tan mi alʌlon to la? Ma'anic mi juntiquilic mu' bʌ mejlel i ch'ʌmben isujm. 10Come c'unte' c'unte' mi' ñojpel mandar. Mach sojlic ti jump'ejl q'uin laj cʌntesʌntel. Ti' tsolom tac mi la cubin, ts'ita' ilayi, yambʌ ts'ita' ixi, che'ob. 11Pero ma'anic mi' p'isob ti' wenta i T'an Dios. Dios mi caj i pʌyob majlel ti yambʌ lum ba' yambʌ i t'an winicob. Mi caj i ju'sʌbeñob i pusic'al che' mi' pejcañob ti' tojlel jini parte bʌ i t'an. 12Diosʌch tsa' bʌ i wʌn subeyob: Ubinla c t'an come jiñʌch i ñʌch'tilel la' pusic'al. Che' jini mux caj la' c'aj la' wo, che'en Dios. Pero mach yomobic. Ma'anic tsi' jac'ʌyob. 13Jini cha'an c'unte' c'unte' mi caj i chʌn subeñob i mandar lac Yum. Ti jujump'ej q'uin mi caj i ts'ita' cʌntesañob. Ti' tsolom tac mi caj i yubiñob ts'ita' ilayi, yambʌ ts'ita' ya'ya'i. Pero anquese wen tsiquil i cʌntesʌbal, mi caj i tʌts'ob i bʌ. Mi caj i jats'ob i yoc. Mi caj i yajlelob. Mi caj i cʌjchelob majlel.
T'an ti' contra Jerusalén
14Jini cha'an winicob chumulet bʌ la ti Jerusalén, ñich'tʌbenla i t'an lac Yum jatetla mu' bʌ la' cha'len wajal. 15Come chan mi la' pʌs la' bʌ. Mi la' wʌl: Tsa'ix c cha'le lojon trato cha'an ma'anic mi lac chʌmel. Tsa'ix c laja lojon c t'an yic'ot jini xiba cha'an mi' tilel i coltañon lojon ti' tojlel asiriajob. Mach mʌjlix i cha'añob. Tijicñayon lojon cha'an tic lot. Mach c tojoyic c mul. Xuc'ulon cha'an sojquem bʌ c t'an, lon che'etla. 16Jini cha'an lac Yum Dios woli' yʌl: Awilan mi caj c choc tilel ti Sion juntiquil winic lajal bʌ bajche' jump'ejl Xajlel, xuc'ul bʌ, yajcʌbil bʌ, i t'ojol jax bʌ. Jini Xajlel i c'ʌclibʌch pejtel wa'chocobil bʌ. Tijicña jini mu' bʌ i ñop come xuc'ul mi' majlel ti wen bʌ bij. 17Pero mi caj c mel jini winicob yujilo' bʌ lot. Toj mi caj c melob. Tsa' wa'choco lot che' bajche' otot cha'an xuc'ul ma' wajñel. Pero tal tuñija' cha'an mi' jisan a wotot ba' lon xuc'ulet. Tal but'ja' i cuch majlel. Che' jini ma'anix ba' ma' mujcun a bʌ, che'en. 18Mi' caj ti jejmel jini trato tsa' bʌ la' mele yic'ot xiba cha'an ma'anic mi la' chʌmel. Che' tal wocol i jisañetla ma'anic la' coltʌntel. Talob la' contrajob che' bajche' but'ja'. Mi caj i tujc'añetla majlel. 19Ti q'uiñil yic'ot ti ac'ʌlel, jayyal jax mi' ñumel, mi caj i wets'etla majlel jinto mi la' ña'tan isujm c t'an woli bʌ c subeñetla. Bʌbʌq'uen jax jini wocol mu' bʌ caj ti ujtel.
20Tsa' la' mele la' wʌyib, pero mach mejlic la' sʌts' la' bʌ. Mach mejlic la' mos la' bʌ ti la' tsuts come ch'och'oc jax i chiquin. 21Lac Yum mi caj i tilel i pʌs i mich'ajel che' bajche' tsi' pʌsʌ ya' ti wits i c'aba' Perazim yic'ot ti joctʌl i c'aba' Gabaón. Mi caj i mel i ye'tel, jini leco bʌ i ye'tel mach bʌ cʌmbilic la' cha'an. Mi caj i jisan i cha'año' bʌ. 22Jini cha'an mach yomix mi la' chʌn cha'len wajleya, ame utsi p'ojlic la' wocol, come tsa'ix i subeyon Dios bajche' mi caj i meletla i Yum Panchan yic'ot Pañimil. Wʌn ña'tʌbil i cha'an bajche' mi caj i jisañetla.
23-24Ñich'tanla c t'an. Yom mi la' wen p'is ti wenta. Jini mu' bʌ i cha'len e'tel ti lum, ¿mu' ba i chʌn pic majlel jini lum ti pejtelel ora? ¿Mach ba muq'uic i cha'len pac' che' mi' yujtel i pic? 25Che' ts'ʌmʌl lum mi' cha'len pac' ti chajp ti chajp che' bajche yom. 26Yujil bajche' yom melol, come Dios tsi' cʌntesa. 27Mach junlajalic mi lac loc'san i bʌc' pejtelel mu' bʌ i colel. Mi laj c'ʌn chojom cha'an mi' lac cha'len ixom. Mi laj quel cajpe' ti máquina. 28Mi laj cuj trigo yic'ot te'. Che' mi' yujtel ti cujtʌl jini trigo, ma'anix mi lac chʌn cuje'. 29Wen uts'at mi' cʌntesañonla i Yum Panchan yic'ot Pañimil. Wen cabʌl i ña'tʌbal. Wen yujil cʌntesa.
Currently Selected:
ISAIAS 28: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.