ISAIAS 26
26
C'ay cha'an i tijicñʌyelob i pusic'al
1Ti jim bʌ q'uin mi caj i c'ʌyiñob ili c'ay ya' ti Judá: Añʌch lac cha'an p'ʌtʌl bʌ tejclum. Joyolonla cha'an lac Yum mu' bʌ i coltañonla, che'ob. 2Jambeñob i ti' tac tejclum cha'an mi' laj ochelob jini tojo' bʌ mu' bʌ i c'uxbiñob lac Yum. 3Jatet c Yum ma' cʌntʌben i pusic'al jini mu' bʌ i ñopet cha'an ñʌch'ʌl mi' yajñel mu' bʌ i chʌn ña'tañet. 4Ñopo lac Yum ti pejtelel ora, come lac Yum Dios a p'ʌtʌlelʌch ti pejtelel ora. 5Lac Yum mi' ju'sʌbeñob i pusic'al jini chan bʌ mi' melob i bʌ ya' ba' chumulob ti chañilel wits. Mi' jisan i p'ʌtʌlel jini tejclum. Mi' yʌc' ti sujtel ti lum. 6Jini p'ump'uño' bʌ yic'ot jini tic'lʌbilo' bʌ mi caj i t'uchtañob.
7Tojʌch i bijlel jini toj bʌ winic. Come tojet Dios mu' bʌ a pʌtbeñob majlel. 8C Yum lojon, com lojon c mel chuqui a wom. Com lojon c tsictesan i ñuclel a c'aba' cha'an ma' ña'tʌntel. 9Ti' ac'ʌlel mic sʌclañet c'ʌlʌl mi' sʌc'an pañimil. Ti pejtelel c pusic'al mic cha'len wersa cha'an mic tajet. Cujil che' ma' tilel ti meloñel mi caj i cʌyob i jontolil jini año' bʌ ti pañimil. Mi caj i ñopob chuqui toj.
10Anquese ma' pʌsbeñob i yutslel a pusic'al jini jontolo' bʌ, mi' chʌn cha'leñob jontolil. Ma'anic mi' p'isob ti' wenta che' tijicñayob i pusic'al. 11Ma'anic mi' jac'ob che' ma' tic'ob. La' i q'uelob bajche' ma' c'uxbin a cha'año' bʌ. La' i yubiñob quisin. Yom ma' choc tilel c'ajc lotol bʌ a cha'an, cha'an mi' pulel a contrajob. 12C Yum, aq'ueñon lojon i ñʌch'tilel lojon c pusic'al, come tilem ti jatet pejtel c melbal lojon. Tsa' jach mejliyon lojon cha'an tsa' coltayon lojon. 13C Yum lojon Dios, ti yambʌ ora tsac yuma lojon yambʌ yumʌlob, pero mach chʌn che'ix wʌle. Jatet jach wolic yumañet lojon. 14Ma'anic mi' ch'ojyelob jini chʌmeñobix bʌ tsa' bʌ c yumayob ti yambʌ ora. Tsa' jisayob. Tsa' wʌc'ʌyob ti ñajiyel. Ma'anix majch mi' chʌn ña'tañob.
15Wolix a q'uejlel ti ñuc, c Yum. Tsa'ix a ñuq'uesa a tejclum. Tsa'ix a tʌts'ʌ majlel i cayajonlel cha'an ñuc mi' majlel. 16C Yum, che' bʌ tsi' yubiyob wocol winicob, tsi' sʌclayetob. Che' bʌ tsa' ju'sʌbeyob i pusic'al, tsi' mucul pejcayetob ti oración. 17Che' tʌts'ʌlon lojon ti a tojlel, tsa cubi lojon wocol che' bajche' x'ixic woli bʌ ti bajq'uel che' lʌc'ʌlix mi' yilan pañimil i yalobil. 18Joñon lojon ja'el tsac cha'le lojon bajq'uel yubil pero lolom jach. Ma'anic majch tsi' taja i coltʌntel. Ma'anic tsa' coltʌnti lac lumal. 19Pero xuc'ul mic ñop lojon iliyi: Jini chʌmeño' bʌ mu' bʌ i ñopetob mi caj i cha' cuxtiyelob. Mi caj i cha' ch'ojyelob. La' ch'ojyicob jini wʌyʌlo' bʌ ti lum. La' i cha'leñob c'ay ti' tijicñʌyel i pusic'al, come mi caj a tilel che' bajche' ye'eb tic tojlel lojon. Mi caj a wʌq'ueñob i cuxtʌlel jini chʌmeño' bʌ a cha'an.
20Sujtenla, c pi'ʌlob. Ñup'benla i ti' tac la' wotot. Yom mi la' poj mujcun la' bʌ jinto mi' lajmel i mich'ajel lac Yum. 21La' wilan, tal lac Yum ti panchan cha'an mi' yʌq'ueñob i toj i mul jini año' bʌ ti pañimil. Ma'anix mi mejlel i mucob i bʌ jini stsʌnsajob. Mux i tsictiyel i mul.
Currently Selected:
ISAIAS 26: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.