ISAIAS 24
24
Dios mi caj i cha'len meloñel ti pañimil
1Awilan lac Yum mi caj i jisan a lumal, Judá. Mi caj i yʌc' ti sujtel ti mate'el. Mi caj i puc majlel winicob ti pejtelel pañimil. 2Junlajal mi caj i yochelob ti meloñel motomajob yic'ot winicob x'ixicob, mozojob yic'ot yumʌlob, criadajob yic'ot i co'ob, xmʌñoñelob yic'ot xchoñoñelob, xbet taq'uiñob yic'ot jini mu' bʌ i c'ajtiñob taq'uin. 3Mi caj i laj jochtiyel a lumal. Ma'anic chuqui mi caj i cʌytʌl. Lac Yum tsa'ix i yʌc'ʌ i t'an. 4-5Pujch'emix pañimil cha'an i mulob winicob x'ixicob. Tiquinix jini pʌc'ʌbʌl tac, ma'anix ja'al. Cabʌl mi' p'ojlel jontolil. Jini ñuco' bʌ tsa'ix i socbeyob i mandar Dios. Tsa'ix i cʌyʌyob jini xuc'ul bʌ i t'an mu' bʌ i yajñel ti pejtelel ora. 6Jini cha'an Dios tsi' jisʌbe i c'ʌjñibal lum. Tsi' yʌc'ʌ ti wocol jini ya' bʌ chumulob. Wen jamʌl jax pañimil. Ma'anix jaytiquil mu' bʌ i cʌytʌlob.
7Ch'ijiyem i pusic'al. Mach yujilobix c'ay yic'ot son, come ma'anix mi' yʌc' i wut jini ts'usubil. Mach jastiyix i ya'lel ts'usub. 8Ma'anix tsiquil i t'an música mu' bʌ i jajts'el, mi i t'an arpa. Ma'anix tijicña bʌ q'uin. 9Ma'anix mi' cha'leñob c'ay. Ma'anix mi' japob vino, come ch'ijiyemob. Mi' c'ajtesañob i tijicñʌyel ti wajali. 10Jisʌbilix jini tejclum. Ñet'bil tac ti candado pejtelel otot ame ochicob xujch'. 11Motocñayob winicob ti calle, woli' wersa c'ajtiñob vino. Ma'añobix i tijicñʌyel i pusic'al. 12Jisʌbilix jini tejclum. Jejmenix i puertajlel tac. 13Lajal mi caj i yujtel ti' tojlel winicob che' bajche' ti olivojil che' ujtemix i tuc'ob. Ts'ita jax mi caj i cʌytʌlob winicob.
14Pero jini mu' bʌ i cʌytʌlob mi' cajelob ti c'ay, tijicñayob i pusic'al. Jini ya' bʌ añob ba' mi' bʌjlel q'uin mi caj i c'ʌyiñob i ñuclel Dios. 15-16Jini año' bʌ ba' mi' pasel q'uin mi caj i subob i ñuclel Dios. C'ʌlʌl ti ñajtʌl tsiquil i t'an i c'ay tac jini woli bʌ i c'ʌyiñob i ñuclel jini Toj Bʌ.
Pero ch'ijiyemon, come anto jontolil yic'ot lot ti petol pañimil. 17Bʌbʌq'uen tac bʌ yic'ot tojmulil woli to i pijtan jini chumulo' bʌ ti pañimil. 18Che' mi la' puts'el cha'an bʌq'uen, mi caj la' yajlel ti ch'en. Mi tsa' loq'uiyetla ti ch'en, mi caj la' yajlel ti yambʌ wocol, come tal wocol ti la' contra chocbil tilel ti panchan. Mi' ñijcʌyel pañimil ba' añet. 19Mi caj i yʌsiyel pañimil. Ma'anix chuqui wen. Ma'anix chuqui xuc'ul. Cʌlʌx jax mi caj i ñijcʌyel lum. 20Ticʌbexel mi caj i yajñel pañimil che' bajche' xyʌc'ʌjel. Mi caj i ñijcʌyel che' bajche' pisil bʌ otot ti p'ʌtʌl bʌ ic'. Mi caj i jejmel. Ma'anix mi caj i cha' tejchel cha'an wen alatax i mul winicob.
21Ti jim bʌ q'uin lac Yum mi caj i yʌq'ueñob i toj i mul jini sajtemo' bʌ ángelob año' bʌ ti chan yic'ot jini yumʌlob año' bʌ ti pañimil. 22Mi caj i much'quiñob tilel che' bajche' xñujp'elob cha'an mi' yotsañob ti ch'en jinto che' i yorajlelix meloñel. 23Lac Yum am bʌ cabʌl i ñuclel mi caj i cha'len yumʌl ti Jerusalén ya' ti Sion wits. Jini ñoxo' bʌ mi caj i q'uelob i ñuclel. Mi caj i yajpel yilal i c'ʌc'al jini q'uin yic'ot jini uw cha'an i sʌclel i ñuclel lac Yum.
Currently Selected:
ISAIAS 24: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.