ISAIAS 23
23
T'an ti' contra Tiro
1Jiñʌch i t'an Dios ti' contra Tiro. Obol jax i bʌ jini barco tac loq'uemo' bʌ ti Tarsis, come jisʌbilix Tiro yic'ot pejtel i yotot. Ma'anix i yajñib barco tac ya' ba' i tilel mi' c'otelob. Isujm jini t'an tsa' bʌ pam subentiyob ti Cipro. 2-3Winicob año' bʌ ti' joytʌlel Tiro yom mi la' ñʌjch'el. Jini xchoñoñelob ti Sidón yic'ot jini yujilo' bʌ xʌmbal ti ñajb mu' bʌ i sʌclañob ñumel chubʌ'añʌl. Tsi' ch'ʌmbeyetla tilel la' chubʌ'an tsa' bʌ la' taja. Ya' ti ñoja' i c'aba' Nilo tsa' la' cha'le mʌñoñel choñoñel ti pejtelel pañimil. 4Mux caj la' wubin quisin winicob añet bʌ la ti Sidón ti' ti' ñajb come tsa' jili Tiro. Meba'etixla yubil che' bajche' ma'anic tsa' la' cosa la' walobilob. 5Jini año' bʌ ti Egipto ch'ijiyem mi caj i yubiñob cha'an tsa' sʌc jili Tiro. 6Cucula, sʌclan la' wotot ti Tarsis, winicob chumulet bʌ la ti' ti' ñajb. Cha'lenla uq'uel cha'an la' lumal. 7Jisʌbilix jini tejclum ba' wen tijicña jax tsi' yubiyob c'ʌlʌl ti wajali. Cabʌlob tsa' loq'uiyob ti Tiro cha'an mi' majlelob ti chumtʌl ti yan tac bʌ tejclum.
8Jiñʌch tejclum tsa' bʌ i yʌq'ueyob i ye'tel reyob ti pañimil. Cabʌl tsa' p'ojliyob rico bʌ xchoñoñelob. ¿Majqui jini tsa' bʌ i ña'ta i jisan jini Tiro? 9I Yum Panchan yic'ot Pañimil tsi' ña'ta i peq'uesan jini año' bʌ ti Tiro yic'ot yumʌlob año' bʌ i ñuclel ti pejtelel pañimil. 10Winicob añet bʌ la ti Tarsis, librejetixla come ma'añobix la' yum ya' ti Tiro. 11Lac Yum tsa'ix i pʌsʌ i p'ʌtʌlel ti colem ñajb. Tsa'ix i chilbeyob i ye'tel yumʌlob. Tsa'ix i yʌc'ʌ i t'an ti' contra Tiro cha'an mi' jisʌbentel i p'ʌtʌlel. 12Lac Yum tsi' ylʌ: Winicob añet bʌ la ti Sidón, ma'anix mi caj la' cha'len yumʌl ti' chanlel la' pusic'al. Yom mi la' puts'el ti Quitim, pero mach la' tajayix ba' mi la' c'aj la' wo. 13Q'uelela bajche' tsa' jili Tiro. Jiñobʌch babiloniajob tsa' bʌ i jisayob, mach jinic asiriajob. Tsi' wa'chocoyob chan bʌ ts'ajc cha'an mi' letselob ochel ti tejclum. Tsi' lu' jochtesʌbeyob i yotot yumʌlob. 14Obol i bʌ jini barco tac loq'uem bʌ ti Tarsis, come jisʌbilix i yajñib ba' mi' c'otel ya' ti Tiro.
15-16Lujump'ejl i chʌnc'al jab, che' bajche' i jabilel winic, mi caj i ñajiyel Tiro. Che' ñumenix lujump'ejl i chʌnc'al (70) jab, mux i cha' tejchel jini tejclum che' bajche' xmoja mu' bʌ i cha'len c'ay ti calle tac. Mi' ch'ʌm música, mi' pam ñumel ti bij cha'an mi' cha' sʌclan i pi'ʌlob tsa' bʌ i cʌñʌyob ti yambʌ ora. 17Che' ñumenix lujump'ejl i chʌnc'al jab, lac Yum mi caj i cha' coltan Tiro. Pero jini año' bʌ ti Tiro lajal mi caj i cha'leñob che' bajche' ti ñaxan. Mi caj i cha' pi'leñob ti jontolil yumʌlob ti pejtelel pañimil. 18Pero tal jini ora che' mi caj i sutq'uiñob i bʌ ba'an lac Yum. Che' jini mi caj i yʌq'ueñob lac Yum i ganar mu' bʌ i tajob ti choñoñel. Ma'anix mi caj i bajñel lotob. Mi caj i yʌq'ueñob i winicob lac Yum cha'an mi' mʌñob wen bʌ i bʌl i ñʌc' yic'ot i t'ojol jax bʌ bujcʌl.
Currently Selected:
ISAIAS 23: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.