ISAIAS 21
21
Medo-Persia tsi' mʌlʌ Babilonia
1Jiñʌch tsa' bʌ pʌsbenti Isaías ti' contra Babilonia: Che' bajche' jini sutujt ic' mi' tilel ti sur, che' ja'el mi caj i loq'uel tilel wocol ti tiquiñal pañimil ba' bʌbʌq'uen jax pañimil. 2C'ax bʌbʌq'uen jax jini tsa' bʌ j q'uele. Jini yujil bʌ i chon i pi'ʌl woli' chijtan. Jini yujil bʌ jisaya woli ti jisaya. Mi caj la' jisʌntel. Talob i contrajiñetla jini elamob yic'ot jini medojob. Mi' caj ti jejmel i p'ʌtʌlel Babilonia. Mi' caj ti lajmel i yajcʌn jini cʌchʌlo' bʌ año' bʌ ti' wenta Babilonia. 3Cabʌl woli cubin wocol che' bajche' x'ixic che' woli ti bajq'uel. Mi' toj sajtel c pusic'al cha'an jini wocol tsa' bʌ cubi tsa' bʌ j q'uele. 4Ma'anix c pusic'al yubil. C'uñatax pañimil. Cabʌl woliyon ti bʌq'uen. Che' ti ic'ajel tsiltsilñayon mach mejlic j c'aj co. 5Chajpʌbeñob i bʌl i ñʌc' jini yumʌlob. La' i cha'leñob we'el uch'el. Ch'ojyenla ti ora. Chajpan la' bʌ ti guerra, come ix tilel la' contraj.
6Lac Yum tsi' subeyon: Cucu wa'chocon xcʌñan cha'an mi' q'uel chuqui woli' yujtel. 7Che' mi' q'uel winicob woliyo' bʌ ti xʌmbal majlel ti carreta yic'ot c'ʌchʌlo' bʌ mu' bʌ i majlelob ti cha'cha'cojt caballo, yic'ot motocña bʌ winicob c'ʌchʌlo' bʌ ti burro yic'ot ti camello, muc'ʌch i ña'tan jiñʌch woli bʌ cʌl, che'en lac Yum. 8Jini cha'an tsac wa'choco xcʌnta tejclum ti chan bʌ q'ueloñib. Tsa' caji ti t'an jini xcʌñan: Cabʌl q'uin yic'ot cabʌl ac'ʌlel wʌ'ix añon ti que'tel. Woli j q'uel pañimil. 9Q'uele ya' tsoltsolña tilel winicob c'ʌchʌlo' bʌ ti caballo ti cha'cha'cojt yic'ot motocña bʌ i pi'ʌlob, che'en. Che' jini juntiquil tsa' caji' yʌl: Xyajli, xyajli Babilonia. Laj c'ʌsquijemix i diosob, pam pujquem tac ti lum, che'en. 10C pi'ʌlob tic'lʌbilo' bʌ, lajal tsa' la' ñusa wocol che' bajche' trigo mu' bʌ i jajts'el. Pero tsa'ix c tsictesʌbeyetla pejtel chuqui tsa cubi ti lac Yum. Jiñʌch i Yum Panchan yic'ot Pañimil, i Dios israelob.
T'an ti' contra Edom
11Jiñʌch i t'an Dios ti' contra Edom. Ya'an winic ti Seir wits woli' chʌn c'ajtibeñon: “Xcʌntaya, ¿jayp'ejl to ora mi' sʌc'an? ¿Jayp'ejl to ora mi' sʌc'an?” che'en. 12Jini xcʌntaya tsi' jac'be: “Talix jini sʌc'ajel (jiñʌch i coltʌntel winicob mu' bʌ i tsajcañob lac Yum). Talix ac'ʌlel ja'el (jiñʌch i jilibal yaño' bʌ). Sʌclan la' Yum. Yom mi la' cha' tilel cha'an mi la' cha' c'ajtin”, che'en.
T'an ti' contra Arabia
13Jiñʌch i t'an Dios ti' contra jini ch'oyolo' bʌ ti Dedán c'ʌchʌlo' bʌ ti camello ya' ti Arabia. Wersa mi caj la' cʌy bij cha'an mi la' mujcun la' bʌ ti' tiquiñal pañimil ya' ti Arabia. 14La'la, winicob chumulet bʌ la ti Tema. Ch'ʌmbeñob tilel waj yic'ot ja' jini woliyo' bʌ ti puts'el. 15Come woli' puts'tañob jini espada yic'ot jini sʌts'bil bʌ jalʌjb, yic'ot jini bʌbʌq'uen bʌ guerra. 16Tsi' yʌlʌ lac Yum: Jump'ejl jab mi caj la' wubin wocol ti' c'ʌb la' contra. Che' jini mi caj i jilel i p'ʌtʌlel Cedar yic'ot pejtel i ñuclel, che'en. 17Che' jini ma'anix jaytiquil mi' cʌytʌl ti Cedar yujilo' bʌ julbʌl ti jalʌjb. Mux i cʌytʌl cha'tiquil uxtiquil jach. Che' tsi' yʌlʌ lac Yum i Dios Israel.
Currently Selected:
ISAIAS 21: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.