YouVersion Logo
Search Icon

ISAIAS 17

17
T'an ti' contra Damasco
1Jiñʌch i t'an Dios ti' contra Damasco jini colem tejclum ti Siria: Awilan, wolix ti pujch'el Damasco. Pucu jejmenix jini tejclum. Mux i sujtel ti mate'el. 2Cʌybilix i tejclum tac Aroer. Tsa' sujti ti jamil ba' mi' cha'len buc'bal tiñʌme'. Ma'anix majch mi' bʌc'tesañob che' mi' ñoltʌlob ti wʌyel. 3Mi caj i sʌc jilel i p'ʌtʌlel Israel yic'ot i yumʌntel Damasco yic'ot i colojbal winicob ti Siria. Che' bajche' mi caj i jilel i ñuclel Israel, che' ja'el mi caj i jilel i ñuclel Siria, che'en i Yum Panchan yic'ot Pañimil.
T'an ti' contra Israel
4Ti jim bʌ q'uin mi' cajelob ti wi'ñal israelob. Mi' caj ti jilel i ñuclel. 5Mi caj i cʌytʌl Israel che' bajche' cholel che' lotbilix i wut, che' bajche' juntejc cha'tejc ixim ya' ti joctʌl i c'aba' Refaim che' ujtemix c'ajbal. 6Ts'i'ta jax mi caj i cʌytʌlob winicob che' bajche' ts'i'ta jax mi' cʌytʌl i wut olivote' che' ujtemix ti tujq'uel, wʌjʌl p'ʌcʌl jax, che'en lac Yum i Dios Israel.
7Ti jim bʌ ora mi caj i ña'tañob i Dios tsa' bʌ i meleyob. Mi caj i q'uelob ti ñuc jini Ch'ujul Bʌ ti Israel. 8Ti jim bʌ ora mach chʌn cʌyʌlix i pusic'al ti pulʌntib tac tsa' bʌ i wa'chocoyob mi ti jini diosob tsa' bʌ i meleyob. Mach chʌn c'uxix mi caj i yubiñob i yejtal tac Asera mi i yejtalic q'uin.
9Jochocña mi caj i cʌytʌl jini ts'ajquibil bʌ tejclum tac, che' bajche' xchumtʌl tac ya' ti wits che' puts'emix i yum. Che'ʌch tsa' cʌle i tejclum tac amorreojob che' bʌ tsi' puts'tayob jini israelob tsa' bʌ tiliyob ti' contra. Jini israelob ja'el mi' caj i jisʌntelob. 10Israelob, tsa' ñajʌyi ti la' pusic'al jini Dios tsa' bʌ i coltayetla. Jini cha'an mi' caj ti ujtel pejtel iliyi. Tsa' la' cʌyʌ jini xajlel yilal mu' bʌ i joy mʌctañetla. Tsa' la' mele parque cha'an dioste' che' bajche' mi la' mulan. Tsa' la' pʌc'ʌ jini pac' ñajt bʌ ch'oyol. 11Ti' yorajlel pac' mi la' wen cʌntan. Seb to mi' caj ti pasel. Mi' cajel ti ñich ti jini jach bʌ q'uin, pero ma'anic mi caj la' tuc'ben i wut. Ma'anic mi caj la' taj jini tsa' bʌ la' lon ña'ta. Mi caj la' taj cabʌl la' tsic pusic'al yic'ot la' c'uxel mach bʌ i ñopoyic ts'ac.
12Ubinla i t'an cabʌl soldadojob. Ju'ucñayob ti xʌmbal. Talob ti ajñel cha'an mi' yochelob ti' lumal Israel. 13Anquese ju'ucñayob che' bajche' colem ñajb, Dios mi caj i tic'ob. Mi caj i puts'elob majlel che' bajche' ts'ubejn mu' bʌ i wejlan ic' ya' ti pam wits. 14Che' ti ic'an cabʌlix i bʌq'uen jini israelob, pero che' ti sʌc'an ma'añobix i contrajob. Che'ʌch mi caj i jisʌntelob jini mu' bʌ i tic'lañonla yic'ot jini mu' bʌ i xujch'ibeñonla lac chubʌ'an.

Currently Selected:

ISAIAS 17: ctuBI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy