ISAIAS 10
10
1Obolob i bʌ jini winicob mach bʌ tojic mi' cha'leñob meloñel yic'ot jini mu' bʌ i ts'ijbañob ley tac mach bʌ tojic. 2Mi' tic'lañob jini p'ump'uño' bʌ yic'ot meba' x'ixicob yic'ot meba' alobob. Mi' xujch'ibeñob chuqui an i cha'an. 3¿Chuqui mi caj la' mel ti' q'uiñilel wocol che' mic choc tilel wocol tilem bʌ ti ñajtʌl? ¿Majqui mi caj la' pejcan cha'an mi' coltañetla? ¿Baqui mi mejlel la' cʌntan la' chubʌ'an? 4Ma'anic mi caj j coltañetla. Mi caj la' mucul wutstʌl yic'ot xñujp'elob. Mi caj la' yajlel yic'ot jini tsʌnsʌbilo' bʌ. Anquese cabʌl la' wocol mach lajmic i mich'ajel lac Yum. Sʌts'ʌl to i c'ʌb cha'an mi' chʌn tic'lañetla.
Dios mi caj i jisan Asiria
5-6Jini Asiria i wentajʌch asiyal tij c'ʌb cha'an mic jats' Judá tic mich'ajel. I wentajʌch barate' tij c'ʌb. Tsa'ix c choco majlel ti contra Judá ti' caj i mul cha'an tsi' cʌyʌ i Dios. Tsa'ix c sube asiriajob cha'an mi' yʌc'ob ti to'ol e'tel yic'ot wocol. Mi caj i chilbeñob i chubʌ'an. Mi caj i juch'tec'ob che' bajche' oc'ol ti bij. 7Pero mach che'ic woli' ña'tan jini rey am bʌ ti Asiria. Mach yujilic mi chocbil majlel c cha'an, cha'an mi' jac' c mandar. Mi' lon ña'tan woli' bajñel tech guerra cha'an mi' mʌjlel i cha'an ti' tojlel cabʌl tejclum tac ti' petol pañimil. 8Mi' lon al: Mux caj cotsan ti rey calobilob cha'an mi' cha'leñob yumʌl ti colem tejclum tac. 9Mi caj c jisan Calno che' bajche' Carquemis. Lajal mi caj i jilel Hamat che' bajche' Arfad. Mi caj c jisan Samaria che' bajche' Damasco. 10Tsa' mʌjli c cha'an ti cabʌl colem tejclum tac ba' mi' c'uxbiñob dioste' tac ñumen ñuc bʌ bajche' i diosob Jerusalén yic'ot Samaria. 11Che' bajche' tsac melbe Samaria yic'ot i dioste' tac mi caj c melben Jerusalén yic'ot i dioste' tac, lon che'en.
12Pero lac Yum woli' c'ʌn Asiria cha'an mi' mel i ye'tel ya' ti Sion wits yic'ot ti Jerusalén. Ti jim bʌ ora che' ujtemix i ye'tel mi caj i yʌq'ueñob castigo jini asiriajob, come chan mi' melob i bʌ. Mi' bajñel sub i ñuclel jini rey. 13Come tsi' yʌlʌ: Pejtelel chuqui tac tsac mele tsa' mejli c mel cha'an c bajñel p'ʌtʌlel yic'ot c ña'tʌbal. Jini cha'an tsac jisa winicob ti cabʌl tejclum tac. Tsac chilbeyob i chubʌ'an. Che' bajche' tat wacax mi' ñijcan loq'uel pejtel chuqui mi' mʌctan ti majlel, tsac tʌts'esa jini año' bʌ i ye'tel. 14Tic p'ʌtʌlel tsa'ix c chilbeyob i chubʌ'an ya' ba' lotol. Che' bajche' winicob mi' ch'ʌmob tumut am bʌ ti c'u', joñon tsac ch'ʌmʌ tejclum tac ti pejtelel pañimil. Ma'anic majch tsa' mejli i mʌctañon. Mi' jats' i wich' jini mut che' mi' lon cʌntan i yal, che' ja'el ma'anic majch tsa' mejli ti t'an yic'ot uq'uel. Che' mi' lon al jini rey ti Asiria.
15Lac Yum woli' yʌl: ¿Mu' ba mejlel i sub i ñuclel jini jacha che' woli' c'ʌjñel ti' c'ʌb i yum? ¿Mejl ba i sub i bʌ ti ñuc jini sierra che' woli' p'el te' i yum? Jini te' ¿mejl ba i cha' sujtel i jats' jini woli bʌ i chuc majlel? Asiria jiñʌch te' am bʌ i c'ʌñol tij c'ʌb, che'en. 16Cha'an cabʌl tsi' chañ'esa i bʌ jini rey ti Asiria, i Yum Panchan yic'ot Pañimil mi caj i yʌq'ueñob i c'amʌjel pejtel soldadojob. Jini ch'ejlo' bʌ mi caj i c'uñ'añob ti c'ajc. 17Jini Ch'ujul Bʌ ti Israel mu' bʌ i yʌq'ueñob i sʌclel israelob jiñʌch i nich c'ajc mu' bʌ caj i pul jini asiriajob. Ti jump'ejl jach q'uin mi caj i pulob che' bajche' ch'ixol yic'ot stsajatuñol. 18Lajalob jini soldadojob asiriajob bajche' colem te'el, pero pejtelel jini te'el tac mi caj i laj jilel ti c'ajc. Lac Yum mi caj i jisan asiriajob. 19Ma'anix jaytiquil i soldadojob Asiria che' mi' yujtel. Juntiquil alob mi mejlel i tsicob.
20Ti jim bʌ ora jini mu' bʌ i cʌytʌlob ti Israel yic'ot ti Judá mi caj i ñopob lac Yum, jini Ch'ujul Bʌ ti Israel. Ma'anix mi caj i c'ajtiñob i coltʌntel ti' tojlel asiriajob. 21Lamital mu' bʌ i cʌytʌlob mi caj i sutq'uiñob i bʌ ba'an jini p'ʌtʌl bʌ Dios. 22Anquese cabʌlob jini israelob che' bajche' i ji'il ñajb, cojach lamital mi caj i sujtelob. Come Dios tsi' wʌn ña'ta i jisan i cha'año' bʌ, come toj i pusic'al, toj pejtel i melbal. 23Jini cha'an tsa'ix i yʌc'ʌ i t'an lac Yum, i Yum Panchan yic'ot Pañimil. Mux caj i jisañob.
24Jini cha'an ubinla i t'an lac Yum, i Yum Panchan yic'ot Pañimil: C winicob chumulet bʌ la ti Sion, mach la' bʌc'ñan jini asiriajob che' mi' tilelob i jats'etla che' bajche' jini egiptojob ti wajali. 25Jumuc' jax mi caj la' wubin wocol cha'an c mich'ajel. Ti ora mi caj i jilel i p'ʌtʌlel. Che' jini mi caj c mich'len jini asiriajob, che'en. 26I Yum Panchan yic'ot Pañimil mi caj i choc tilel i yángel cha'an mi' jisan jini asiriajob che' bajche' Gedeón tsi' jisa Madián ya' ti t'ejl xajlel i c'aba' Oreb, che' bajche' lac Yum tsi' jisa egiptojob ya' ti Chʌchʌc bʌ Ñajb. 27Ti jim bʌ ora Dios mi caj i loc'sañetla ti to'ol jach bʌ e'tel. Mi caj i ch'ʌmbeñetla la' cuch che' mi' coltañetla jini yajcʌbil bʌ i cha'an.
28-29Awilan wʌ'ix añob jini soldadojob ch'oyolo' bʌ ti Asiria. Tsa'ix ñumiyob ti Ajat. C'otemobix ti Migrón. Woli' cʌyob lamital i ye'tijib ti Micmas. Woli' c'axalob ti wits cha'an mi' jijlelob ti Geba. Woli' toj sajtelob i pusic'al ti bʌq'uen jini año' bʌ ti Rama. Jini año' bʌ ti Gabaa (i tejclum Saúl) woliyob ti puts'el. 30Jini cha'an woliyetla ti c'am bʌ oñel añet bʌ la ti Galim. C'am yom mi la' tsictesan c'ʌlʌl ti Laisa. P'ump'uñetla ya' ti Anatot. 31Tsa' puts'iyob jini año' bʌ ti Madmena. Jini año' bʌ ti Gebim mi caj i puts'elob ja'el. 32Wʌle to mi caj i c'ʌlʌl c'otelob asiriajob ti Nob ba' mi caj i jijlelob. Chan mi' melob i bʌ ti' tojlel Jerusalén ya' ti Sion wits.
33Awilan lac Yum, i Yum Panchan yic'ot Pañimil, woli' laj jisan jini soldadojob yic'ot yumʌlob ti cabʌl i p'ʌtʌlel che' bajche' mi lac sec' jubel chan bʌ te' yic'ot pejtelel i c'ʌb. Mi' jultesʌbeñob i pusic'al jini chaño' bʌ. 34Mi caj i laj jisan laj contrajob che' bajche' mi lac sec' colem te' an tac bʌ ti Líbano. Asiria mi' caj ti yajlel ti' p'ʌtʌlel jini Ñuc bʌ Yumʌl.
Currently Selected:
ISAIAS 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.