GENESIS 34
34
Dina tsa' ajq'ui ti quisin
1Tsa' majli ti jula' Dina, jini xch'oc bʌ i yalobil Jacob tsa' bʌ i yʌq'ue Lea. Yom i jula'tan jini xch'ocob ya' bʌ chumulob. 2Jini Siquem i yalobil Hamor, jini heveo, i yum jini lum, tsi' q'uele jini xch'oc. Tsi' pʌyʌ, tsa' ajni yic'ot, tsi' yʌc'ʌ ti quisin. 3Tsi' ña'ta i pʌy Dina i yalobil Jacob come c'ux tsi' yubi. Ti uts bʌ t'an tsi' pejca. 4Siquem tsi' pejca Hamor i tat. Tsi' yʌlʌ: C'ajtibeñon ili xch'oc cha'an quijñam, che'en. 5Jacob tsi' yubi bajche' Siquem tsi' yʌc'ʌ ti quisin Dina i yalobil. Ya' to añob i yalobilob Jacob ti jamil yic'ot i yʌlac'. Ma'anic chuqui tsi' yʌlʌ Jacob jinto tsa' sujtiyob. 6Hamor, i tat Siquem, tsa' tili i pejcan Jacob. 7Che' bʌ tsi' yubiyob i yalobilob Jacob, tsa' sujtiyob tilel ti' yotot. Tsi' meleyob i pusic'al. Tsi' wen cha'leyob mich'ajel cha'an tsi' mele Hamor chuqui jisil ti' tojlel Israel che' bʌ tsa' ñole yic'ot xch'oc bʌ i yalobil Jacob. Mach che'ic yom melol.
8Hamor tsi' pejcayob: C'uxatax i pusic'al Siquem cha'an a walobil. Awocolic mij c'ajtibeñet sijinix jini xch'oc cha'an i yijñam. 9La' i cha'leñob ñujpuñel la calobilob. Sijibeñon lojon xch'oc bʌ la' walobilob. Pʌyʌla xch'oc bʌ calobil lojon cha'an la' wijñam. 10Che' jini mux la' chumtʌl quic'ot lojon, come jochol jini lum ti lac tojlel. Yom mi la' chumtʌl ilayi. Cha'lenla e'tel ilayi ti lum. Taja la' chubʌ'an ilayi, che'en. 11Siquem tsi' sube i tat xch'oc yic'ot i yʌscuñob: Yom mi la' q'uelon ti uts'at. Mi caj cʌq'ueñetla chuqui tac jach mi la' c'ajtibeñon. 12Chuqui tac jach la' wom la' c'ajtin cha'an i tojol jini xch'oc yic'ot i majtan, mu'to cʌq'ueñetla che' bajche' c'amel mi la' c'ajtibeñon. Yom mi la' sijin jini xch'oc cha'an quijñam, che'en.
13I yalobilob Jacob tsi' lotiyob Siquem yic'ot Hamor, come Siquem tsa'ix i yʌc'ʌ ti quisin Dina i yijts'in. 14Tsi' subeyob: Mach mejlic c mel lojon iliyi. Mach mejlic c sijin lojon quijts'in lojon ba'an winic mach bʌ tsepbilic i pʌchʌlel, come mach uts'atic tic wut lojon. 15Cojach mic sijin lojon mi tsa' ajniyetla bajche' joñon lojon, mi tsa' tsepbenti i pʌchʌlel pejtelel winicob ti a lumal. 16Che' jini mi mejlel c sijin lojon jini xch'oc bʌ calobilob. Mi caj c pʌy lojon jini xch'oc bʌ la' walobilob ja'el. Mux caj c chumtʌl lojon la' wic'ot. Mux la cajñel ti junmojt. 17Mi ma'anic tsa' la jac'ʌ, mi ma'anic tsa' la' wʌc'ʌ ti tsepol la' pʌchʌlel, mic pʌy lojon majlel jini xch'oc. Mic majlel lojon, che'ob.
18Uts'at tsi' yubiyob ili t'an Hamor yic'ot Siquem, i yalobil Hamor. 19Jini ch'iton tsi' bʌc' mele iliyi, come tsi' mula i yalobil Jacob. Ñumen ñuc tsa' q'uejli jini ch'iton ti' yotot i tat bajche' i pi'ʌlob. 20Hamor yic'ot Siquem i yalobil tsa' tiliyob ba'an i ti' tejclum. Tsi' subeyob jini winicob loq'uemo' bʌ ti tejclum: 21Uts'at woli' pejcañonla ili winicob. La' chumlecob ti ili lum. La' i cha'leñob choñoñel ilayi, come jasʌl jini lum cha'an mi lac tem ajñel. Yom mi lac pʌy xch'oc bʌ i yalobilob cha'an la quijñam. Yom mi lac sijibeñob jini xch'oc bʌ la calobilob. 22Yom jach mi' tsejpel lac pʌchʌlel ti jujuntiquilonla che' bajche' tsepbilob i pʌchʌlel ajñel. Che' jini mux i jac'ob lac t'an jini winicob, mux i chumtʌlob la quic'ot. Junmojt jach mi lac tem ajñel la quic'otob. 23¿Mach ba muq'uic i yochel i yʌlac' ba'an lac cha'an yic'ot i chubʌ'an yic'ot pejtel i yʌlac' yujil bʌ cuchijel? Cojach yom mi lac jac'ben i t'an. Che' jini mux i chumtʌlob la quic'ot, che'ob. 24Pejtel año' bʌ i ye'tel tsi' jac'beyob i t'an Hamor yic'ot i t'an Siquem i yalobil. Tsa' tsepbenti i pʌchʌlel pejtel winicob yic'ot ch'itoñob.
25Che' ti' yuxp'ejlel q'uin che' wen c'ux i pʌchʌlel ba' tsepilob, tsi' ch'ʌmʌyob espada cha'tiquil i yalobilob Jacob, Simeón yic'ot Leví, i yʌscuñob Dina. Tsa' ochiyob che' mach tsajibilic jini tejclum. Tsi' tsʌnsayob pejtel winicob yic'ot ch'itoñob. 26Tsi' tsʌnsayob Hamor yic'ot Siquem i yalobil Hamor ti espada. Tsi' pʌyʌyob loq'uel Dina ti' yotot Siquem. Tsa' majliyob. 27I yalobilob Jacob tsa' c'otiyob ba'an tsʌnsʌbilo' bʌ. Tsi' cha'leyob xujch' ti jini tejclum ba' tsa' ajq'ui ti quisin i yijts'in. 28Tsi' pʌyʌyob majlel i tiñʌme' yic'ot i wacax yic'ot i burro yic'ot chuqui an ti tejclum yic'ot chuqui an ti jamil. 29Tsi' ch'ʌmbeyob majlel pejtelel i chubʌ'an yic'ot pejtel i yalobilob yic'ot i yijñamob. Tsi' xujch'ibeyob pejtelel chuqui an ti' yotot tac. 30Jacob tsi' sube Simeón yic'ot Leví: Cabʌlʌch c wocol cha'añetla. Tsa'ix la' wʌc'ʌyon ti ts'a'lentel ti' tojlel pejtel jini chumulo' bʌ ti ili lum, jini cananeojob yic'ot ferezeojob. Ma'anic jaytiquilonla. Wʌle mux caj i tempañob i bʌ tij contra cha'an mi' tsʌnsañonla. Mi caj i jats'onla. Che' jini mux caj lac jisʌntel, joñon quic'ot c pi'ʌlob, che'en. 31Tsi' yʌlʌyob: ¿Chucoch tsi' lon tic'la la quijts'in che' bajche' xmoja? che'ob.
Currently Selected:
GENESIS 34: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.