GENESIS 33
33
Tsi' yuts'esayob i bʌ Jacob yic'ot Esaú
1Jacob tsi' can q'uele pañimil. Tsi' q'uele woli' tilel Esaú yic'ot jumbajc' winicob. Jini cha'an tsi' t'oxbeyob alp'eñelob Lea yic'ot Raquel yic'ot jini cha'tiquil x'ixic bʌ x'e'telob. 2Ñaxan tsi' choco majlel jini x'ixic bʌ x'e'telob yic'ot i yalobilob. Ti wi'il tsi' choco majlel Lea yic'ot i yalobilob. Ti wi'il pat tsa' majliyob Raquel yic'ot José. 3Ñaxanix tsa' majli Jacob. Wucyajl ñuquiña tsi' mele i bʌ che' bʌ tsi' ñochta Esaú.
4Ti ajñel tsa' tili Esaú i taj. Tsi' meq'ue. Tsa' licle ti' quejlab. Tsi' ts'ujts'u. Tsi' cha'leyob uq'uel. 5Esaú tsi' can q'uele pañimil. Tsi' q'uele x'ixicob yic'ot i yalobilob. Tsi' yʌlʌ: ¿Majquiyob? ¿A cha'año' ba? che'en. Jacob tsi' yʌlʌ: A winicon. Jiñobʌch calobilob tsa' bʌ i yʌq'ueyon Dios ti' yutslel i pusic'al, che'en. 6Jini x'ixic bʌ x'e'telob yic'ot i yalobilob tsi' ñochtayob Esaú. Tsi' ñocchocoyob i bʌ. 7Lea ja'el yic'ot i yalobilob tsi' ñochtayob. Tsi' ñocchocoyob i bʌ. Ti wi'ilix José yic'ot Raquel tsi' ñochtayob. Tsi' ñocchocoyob i bʌ. 8Esaú tsi' yʌlʌ: ¿Chucoch tsa' chocbeyon tilel pejtel ili alʌc'ʌl tac ti ñaxan? che'en. Jacob tsi' yʌlʌ: Cha'an com ma' q'uelon ti uts'at, c yum, che'en. 9Esaú tsi' yʌlʌ: Añʌch cabʌl c cha'an, quijts'in. Ch'ʌmʌ a cha'an bʌ, che'en. 10Jacob tsi' yʌlʌ: Awocolic, mi uts'at ma' q'uelon, ch'ʌmʌ a majtan, come lajal tsaj q'uele a wut che' bajche' i wut Dios. Come tsa' q'ueleyon ti' yutslel a pusic'al. 11Awocolic, ch'ʌmʌ a majtan i wenta cortesía mu' bʌ cʌq'ueñet, come Dios tsi' pʌsbeyon i yutslel i pusic'al. Anto cabʌl c cha'an, che'en. Che' jini Jacob tsi' wersa sube Esaú jinto tsi' ch'ʌmʌ i majtan.
12Esaú tsi' yʌlʌ: Conla. Mux c majlel ti' tojel a wut, che'en. 13Jacob tsi' yʌlʌ: A wujil c yum, ch'o'ch'ocob to jini alobob. An tic wenta ja'el i ña'al cʌlac' woli bʌ i tsu'san i yal. Mi ti jump'ejl jach q'uin mi cajñesan majlel, che' jini mux i laj chʌmel jini tiñʌme'. 14C yum, yom ñaxañet ti' tojel a winic. Mi caj j c'unte' xʌntesan majlel jini alʌc'ʌl yic'ot calobilob ja'el cha'an uts'at mi' c'otelob ya' ba'añet ti Seir, che'en.
15Esaú tsi' yʌlʌ: La' j cʌybeñet lamital winicob año' bʌ quic'ot cha'an a cʌntʌntel, che'en. Jacob tsi' yʌlʌ: Mach wersajic. Cojach yom ma' q'uelon ti uts'at, c yum, che'en. 16Jini cha'an Esaú tsa' caji ti sujtel ti' bijlel Seir ti ili q'uin. 17Jacob tsa' caji ti majlel ti Sucot. Tsi' mele i yotot. Tsi' mele i yotlel tac alʌc'ʌl. Jini cha'an tsa' otsʌbenti i c'aba' jini lum Sucot.
18Uts'at tsa' c'oti Jacob ti tejclum i c'aba' Siquem ya' ti Canaán. Che' jini tsa' cha' juli tilel ti' lumal che' loq'uem ti Padanaram. Tsi' wa'choco pisil bʌ i yotot ya' ti' junwejl jini tejclum. 19Tsi' mʌñʌ lamital jini jamil ya' ba' tsi' wa'choco pisil bʌ i yotot. Tsi' chombeyob lum i yalobilob Hamor (i tat Siquem) ti jo'c'al plata taq'uin. 20Tsi' wa'choco i pulʌntib i majtan Dios ya'i. Tsi' yotsʌbe i c'aba' El Elohé Israel, “Dios i Diosʌch Israel”.
Currently Selected:
GENESIS 33: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.