GENESIS 31
31
1Jacob tsi' yubibeyob i t'an ch'iton bʌ i yalobilob Labán. Tsi' yʌlʌyob: Jini Jacob tsa'ix i chilbe pejtel i yʌlac' lac tat. Cha'an ti' caj i chubʌ'an lac tat tsa'ix i taja pejtel i ñuclel, che'ob. 2Jacob tsi' q'uele Labán. Awilan, mach chʌn utsix i wut che' bajche' ti ñaxan. 3Lac Yum tsi' sube Jacob: Sujten ti' lumal a tat ba'an a pi'ʌlob. Mi caj c pi'leñet majlel, che'en.
4Jacob tsi' choco majlel t'an ti' yotot. Tsi' pʌyʌ tilel Raquel yic'ot Lea ya' ti jamil ba'an tiñʌme'. 5Jacob tsi' subeyob: Cujil ma'anix mi' chʌn q'uelon ti uts'at la' tat che' bajche' ti ñaxan. Pero i Dios c tat woli' coltañon. Anto quic'ot. 6La' wujil tsac melbe i ye'tel la' tat ti pejtelel c pusic'al. 7La' tat tsi' lotiyon. Lujunyajl tsi' q'uextʌbeyon i tojol que'tel. Machic tsi' tiq'ui Dios tsi' yʌc'ʌyon ti wocol. 8Tsi' yʌlʌ: “Jini pinto tac bʌ jiñʌch i tojol a we'tel”, che'en. Che' jini tsa' tojp'i pinto tac bʌ i yal pejtelel i tiñʌme'. Ti wi'il tsi' yʌlʌ: “Jini barsintic tac bʌ jiñʌch i tojol a we'tel”, che'en. Che' jini tsa' tojp'i sʌpʌl tac bʌ i yal ti pejtelel i tiñʌme'. 9Che' jini Dios tsi' chilbe i tiñʌme' la' tat. Tsi' yʌq'ueyon. 10Che' bʌ tsi chucuyob i bʌ jini tiñʌme', tsaj can q'uele pañimil tic ñajal. Awilan, japal yic'ot pintotic yic'ot barsintic bʌ tat chivo woli' chucob i bʌ.
11I yángel Dios tsi' subeyon tic ñajal: “Jacob”, che'en. Tsa cʌlʌ: “Wʌ' añon”, cho'on. 12Tsi' yʌlʌ: “Can q'uele pañimil. Q'uele barsintic yic'ot pintotic yic'ot motol pejtel jini tat chivo mu' bʌ i chuc i ña'al bʌ chivo, come tsa'ix j q'uele pejtel tsa' bʌ i melbeyet Labán. 13Dioson. Tsa' cʌñʌyon ya' ti Betel ba' tsa' mulu jini wa'al bʌ xajlel ya' ba' tsac pʌsbeyet i yutslel c pusic'al. Ya' tsa' wʌc'ʌ a t'an tic tojlel. Cʌyʌx jini lum. Sujten ti a lumal baqui tsa' wila pañimil”. Che'ʌch tsi' subeyon Dios, che'en Jacob. 14Raquel yic'ot Lea tsi' jac'ʌyob: ¿Anto ba c chubʌ'an lojon ti' yotot lac tat mu' bʌ caj i yʌq'ueñon lojon? Ma'anix. 15Lajal mi' q'uelonla bajche' jini ñajt bʌ ch'oyolob, come tsi' choñoyonla. Tsi' laj jisa lac chubʌ'an. 16Lac cha'añʌch come Dios tsi' chilbe cha'an mi' yʌq'ueñonla yic'ot la calobilob pejtel i chubʌ'an lac tat tsa' bʌ i yʌq'ueyonla Dios. Jini cha'an yomix ma' mel ti pejtelel che' bajche' tsi' subeyet Dios, che'ob.
Jacob tsi' puts'ta Labán
17Jini cha'an Jacob tsa' caji' c'ʌchchocoñob i yalobilob yic'ot i yijñamob ti' pat camello. 18Tsi' choco majlel pejtel i wacax yic'ot pejtel i chubʌ'an tsa' bʌ i tempa ya' ti Padanaram. Tsa' caji ti majlel ba'an Isaac i tat, ya' ti' lumal Canaán. 19Labán tsa' majli i tsepben i tsutsel i tiñʌme'. Raquel tsi' xujch'ibe majlel jini dioste' tac i cha'an i tat. 20Mucul jach tsa' majli Jacob. Ma'anic tsi' ña'ta Labán jini arameo, come ma'anic tsi' subu i bʌ Jacob che' bʌ tsa' puts'i majlel. 21Tsa' puts'i yic'ot pejtel i cha'año' bʌ. Tsa' caji ti majlel. Tsa' ñumi ti colem ja'. Tsa' majli ti' tojel wits i c'aba' Galaad.
22Che' ti yuxp'ejlel q'uin tsa' caji yubin Labán puts'emix Jacob. 23Tsi' pʌyʌ majlel i pi'ʌlob. Tsi' tsajca majlel Jacob wucp'ejl q'uin jinto tsi' taja ya' ti wits i c'aba' Galaad. 24Dios tsi' sube Labán jini arameo che' woli ti ñajal ti ac'ʌlel: Chʌcʌ q'uele a bʌ cha'an ma'anic ma' pejcan Jacob ti tsʌts bʌ t'an, che'en.
25Labán tsi' taja Jacob. Wa'chocobilix pisil bʌ i yotot ti wits. Labán yic'ot i pi'ʌlob tsi' wa'chocoyob pisil bʌ otot ja'el ti wits i c'aba' Galaad. 26Labán tsi' sube Jacob: ¿Chucoch ma'anic tsa' subeyon che' bʌ tsa' loq'uiyet? ¿Chucoch tsa' puts'iyet yic'ot calobilob che' bajche' woli la' bʌc'ñan espada? 27¿Chucoch mucul jach tsa' loq'uiyet che' mach ña'tʌbilic c cha'an? Tsa'ic c ña'ta tsac chocoyetla loq'uel ti' tijicñʌyel la' pusic'al, yic'ot c'ay, yic'ot tamborín, yic'ot arpa. 28Ma'anic tsa' wʌq'ueyon c ts'ujts'un calobilob. Tonto tsa' mele. 29An c p'ʌtʌlel cha'an mi cʌq'uet ti wocol, pero sajmʌl ti ac'ʌlʌl tsi' pejcayon i Dios a tat. Tsi' yʌlʌ: “Chʌcʌ q'uele a bʌ cha'an ma'anic ma' pejcan Jacob ti tsʌts bʌ t'an”. Che' tsi' yʌlʌ. 30Cujil woliyet ti puts'el, come wersa a wom sujtel ti' yotot a tat. Wʌle subeñon, ¿chucoch tsa' xujch'ibeyon c dioste' tac? che'en Labán. 31Jacob tsi' sube Labán: Tsac puts'tayet come tsac bʌc'ñayet. Tsa cʌlʌ mux a wersa chilbeñon jini a wixic'alob. 32Mi an majch tsi' ch'ʌmʌ a dioste' tac, la' chʌmic. Wʌ' ti' tojlel lac pi'ʌlob yom ma' q'uel mi an a chubʌ'an quic'ot lojon. Ch'ʌmʌ a cha'an bʌ, che'en. Ma'anic tsi' ña'ta Jacob mi tsi' xujch'i Raquel.
33Labán tsa' ochi ti pisil bʌ otot tac i cha'an Jacob yic'ot i cha'an Lea. Tsa' ochi ja'el ti pisil bʌ i yotot jini cha'tiquil criadajob. Ma'anic chuqui tsi' taja. Tsa' loq'ui ti' yotot Lea, tsa' ochi ti' yotot Raquel. 34Ch'ʌmbil i cha'an Raquel jini i dioste' tac. Tsi' yotsa ti' monturajlel camello. Tsi' buchta. Labán tsi' laj tsaji ñumel jini pisil bʌ otot. Ma'anic tsi' taja. 35Raquel tsi' sube i tat: Mach yomic ma' mich'leñon, c yum, cha'an buchulon ti a tojlel. Mach mejlic c tejchel, come wolij q'uel j c'amʌjel che' bajche' i tilel x'ixicob, che'en. Labán tsi' sʌcla dioste' tac, pero ma'anic tsi' taja.
36Jacob tsa' mich'a. Ti tsʌts bʌ t'an tsi' pejca Labán: ¿Chuqui tsac cha'le? ¿Chuqui c mul? che'en. ¿Chucoch tsa' tiliyet ti ajñel cha'an ma' tajon? 37Come tsa' laj tsajibeyon pejtel c chubʌ'an. ¿Tsa' ba a taja a chubʌ'an loq'uem bʌ ti a wotot? Ac'ʌ ila tic tojel yic'ot ti' tojel a pi'ʌlob. La' i q'uelob majqui an i mul. 38Junc'al jab añon a wic'ot. Jini i ña'al bʌ tiñʌme' yic'ot i ña'al bʌ chivo ma'anic tsi' ñusa i yal. Ma'anic tsaj c'uxu i tat tiñʌme'. 39Ma'anic tsac pʌyʌ ba' añet jini lojwem tac bʌ tsa' bʌ i c'uxu bʌte'el. Joñon tsa cʌq'ueyet i q'uexol. Tsac wersa q'uextʌbeyet jini tsa' bʌ i chucu xujch' ti q'uiñil yic'ot ti ac'ʌlel. 40Tsa' puliyon ti ticwal che' ti q'uiñil. Tsa cubi tsʌñal cha'an ña'al tsʌñal che' ti ac'ʌlel. Ma'anic tsa' mejliyon ti wʌyel. 41Junc'alix jab tsac cha'le e'tel ti a wotot. Tsac cha'lebeyet a we'tel chʌnlujump'ejl (14) jab cha'an quijñamob yic'ot wʌcp'ejl jab cha'an a wʌlac'. Lujunyajl tsa' yʌñʌ a t'an cha'an ma' chilbeñon i tojol que'tel. 42Machic tsi' coltayon i Dios c tat, i Dios Abraham tsa' bʌ i bʌc'ña Isaac, p'ump'un tsa' loq'uiyon ti a wotot. Dios tsi' q'uele jini wocol tsa' bʌ cubi ti a tojlel yic'ot jini wocol e'tel tsa' bʌ c cha'le. Dios tsi' tiq'uiyet sajmʌl ti ac'ʌlel, che'en Jacob.
43Labán tsi' sube: Jiñobʌch calobilob jini a wijñamob yic'ot i yalobilob. C cha'añʌch jini alʌc'ʌl yic'ot pejtel jini am bʌ a cha'an. Mach mejlic c tic'lan calobilob. Mach mejlic c tic'lan i yalobilob tsa' bʌ i yʌc'ʌyob ti pañimil. 44La' lac tem lac t'an, jatet quic'ot. La' i melonla Dios mi tsa' lac ñusa jini t'an, che'en. 45Jacob tsi' ch'ʌmʌ xajlel. Tsi' wa'choco cha'an mi' yʌc' ti ña'tʌntel chuqui tsa' ujti ti' tojlelob. 46Jacob tsi' sube i pi'ʌlob: Tempanla xajlel, che'en. Tsi' much'quiyob xajlel. Tsi' c'uxuyob waj ti pam much'ul bʌ xajlel. 47-48Tsi' yotsʌbeyob i c'aba' jini much'quibil bʌ xajlel Galaad cha'an mi' chʌn ña'tʌntel i t'an. Labán tsi' yʌlʌ: Xinlʌpʌlix ti lac tojlel ili much'ul bʌ xajlel i wenta testigo, che'en. Jini cha'an tsa' otsʌbenti i c'aba' Galaad ti' t'an Jacob. 49Tsi' yotsʌbe ja'el i c'aba' Mizpa am bʌ i sujmlel, “Ya' ba' mi laj q'uejlel”. Labán tsi' yʌlʌ: La' i q'uelonla Dios che' ñajtix añonla. 50Mi mach wenic bajche' ma' melbeñob quixic'alob, mi tsa' pʌyʌ yaño' bʌ x'ixicob cha'an a wijñam che' cuxulob to calobilob, anquese ma'anic winic mu' bʌ i q'uelonla, woli' q'uelonla Dios, che'en.
51Labán tsi' cha' sube Jacob: Q'uele jini much'ul bʌ xajlel yic'ot jini wa'al bʌ xajlel tsa' bʌ c xin wa'choco ti lac tojlel. 52Jiñʌch mojon jini much'quibil bʌ xajlel yic'ot jini wa'chocobil bʌ, i wenta testigo. Mach muq'uic c ñusan jini much'ul bʌ xajlel cha'an mic tic'lañet. Jatet ja'el mach muq'uic a ñusan jini much'ul bʌ xajlel cha'an ma' tic'lañon, come woli' q'uelonla Dios. 53La' i melonla i Dios Abraham, i Dios c tat Nacor, i Dios lac ñojte'el, che'en Labán. Jacob tsi' wersa ac'ʌ i t'an ti' tojlel jini Dios tsa' bʌ i bʌc'ña i tat Isaac. 54Jacob tsi' tsʌnsʌbe i majtan Dios ya' ti wits. Tsi' pʌyʌ i pi'ʌlob ti we'el. Tsi' c'uxuyob waj. Jump'ejl ac'ʌlel tsa' jaleyob ti wits. 55Che' ti wen sʌc'ajel Labán tsa' ch'ojyi. Tsi' ts'ujts'u i buts yic'ot i yixic'alob. Tsi' yʌq'ueyob i yutslel i t'an. Tsa' majli. Tsa' sujti ti' lumal.
Currently Selected:
GENESIS 31: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.