Parallel
1
I cajibal pañimil
1Che' ti' cajibal tsi' mele Dios jini panchan yic'ot pañimil. 2Mach chajpʌbilic pañimil. Ma'anic i c'ʌjñibal ja'el. Ic'yoch'an jini pañimil ti' pam jini colem bʌ ñajb. Jini i yEspíritu Dios tsa' ñumi ti' pam jini ja' che' bajche' ic'.
3Dios tsi' yʌlʌ: La' tsictiyic i sʌclel pañimil, che'en. Tsa' tsictiyi i sʌclel pañimil. 4Dios tsi' q'uele uts'at i sʌclel pañimil. Dios tsi' yʌc'ʌ i sʌclel yic'ot i yi'ic'lel pañimil. 5Dios tsi' yotsʌbe i c'aba' i sʌclel jiñʌch q'uiñil. Tsi' yotsʌbe i c'aba' i yi'ic'lel pañimil jiñʌch ac'ʌlel. Tsa' ic'a, tsa' sʌc'a. Jiñʌch jini ñaxan bʌ q'uin.
6Dios tsi' yʌlʌ: La' tsictiyic panchan xinlʌpʌl ti ja'. La' ajnic tocal ti pam yic'ot ja' ti yebal jini panchan, che'en. 7Dios tsi' mele jini panchan. Tsi' t'oxo tac jini ja'. Tsa' ajni ja' ti yebal jini panchan yic'ot ti pam. Che'ʌch tsa' ujti. 8Dios tsi' yotsʌbe i c'aba' jini tsa' bʌ i mele jiñʌch panchan. Tsa' ic'a, tsa' sʌc'a. Jiñʌch i cha'p'ejlel q'uin.
9Dios tsi' yʌlʌ: La' tempʌyic jini ja' am bʌ ti yebal panchan ti colem ñajb tac. La' tsictiyic jini tiquin bʌ lum, che'en. Che'ʌch tsa' ujti. 10Dios tsi' yotsʌbe i c'aba' jini tiquin bʌ jiñʌch lum. Tsi' yotsʌbe i c'aba' tempʌbil bʌ ja' jiñʌch colem ñajb tac. Dios tsi' q'uele uts'atʌch. 11Dios tsi' yʌlʌ: La' pasic ti lum jam yic'ot pimel mu' bʌ i yʌc' i wut. La' colic te' ti chajp ti chajp yujil bʌ wut cha'an pac', che'en. Che'ʌch tsa' ujti. 12Tsa' pasi ti lum jam yic'ot pimel mu' bʌ i yʌc' i wut ti jujunchajp yic'ot te' ti chajp ti chajp yujil bʌ wut cha'an pac'. Dios tsi' q'uele uts'atʌch. 13Tsa' ic'a, tsa' sʌc'a. Jiñʌch i yuxp'ejlel q'uin.
14Dios tsi' yʌlʌ: La' tsictiyic q'uin yic'ot uw yic'ot ec' tac ti panchan cha'an mi' pʌs q'uiñil yic'ot ac'ʌlel. La' i pʌs ja'el i yorajlel jajmel yic'ot ja'lel yic'ot q'uiñil yic'ot jabil tac. 15La' i yʌc' i c'ʌc'al ti panchan cha'an mi' yʌc' i sʌclel ti pañimil, che'en. Che'ʌch tsa' ujti. 16Dios tsi' mele q'uin yic'ot uw, jini ñuc bʌ cha'an mi' pʌs i p'ʌtʌlel ti q'uiñil, jini ch'o'ch'oc bʌ cha'an mi' pʌs i p'ʌtʌlel ti ac'ʌlel. Tsi' mele ec' tac ja'el. 17Dios tsi' yʌc'ʌ ti panchan cha'an mi' yʌc' i c'ʌc'al tac ti pañimil, 18cha'an mi' pʌs i p'ʌtʌlel ti q'uiñil yic'ot ti ac'ʌlel. Che' jini mi' q'uexob i bʌ i sʌclel pañimil yic'ot ic'ch'ipan bʌ pañimil. Dios tsi' q'uele uts'atʌch. 19Tsa' ochi ic'ajel. Tsa' sʌc'a. Jiñʌch i chʌmp'ejlel q'uin.
20Dios tsi' yʌlʌ: La' ajnic i chʌnil ja'. La' wejlic te'lemut ti pañimil ti yebal panchan, che'en. 21Che' jini Dios tsi' mele ñuc bʌ i bʌl jini ñajb yic'ot pejtel i chʌñil ja' ti jujunchajp. Cabʌl tsa' p'ojli. Dios tsi' mele pejtel mut tac ti chajp ti chajp am bʌ i wich'. Dios tsi' q'uele ut'satʌch. 22Tsi' yʌc'ʌ i yutslel i t'an. Tsi' yʌlʌ: La' tilic la' p'olbal. La' p'ojliquetla. La' bujt'ic ti i chʌñil jini ja' am bʌ ti ñajb tac. La' p'ojlic te'lemut ti pañimil, che'en. 23Tsa' ochi ic'ajel. Tsa' sʌc'a. Jiñʌch i jo'p'ejlel q'uin.
24Dios tsi' yʌlʌ: La' ajnic i chʌnil pañimil ti jujunchajp. La' ajnic alʌc'ʌl yic'ot lucum yic'ot bʌte'el ti chajp ti chajp, che'en. Che'ʌch tsa' ujti. 25Che' jini Dios tsi' mele bʌte'el yic'ot alʌc'ʌl yic'ot pejtelel jini jʌlʌcña bʌ mi' majlel ti lum ti chajp ti chajp. Dios tsi' q'uele uts'atʌch.
26Dios tsi' yʌlʌ: La' lac mel winic ti la quejtal, lajal bajche' joñonla. La' aq'uentic i p'ʌtʌlel jini winic cha'an mi' yum'an jini chʌy am bʌ ti ñajb, yic'ot jini mut mu' bʌ ti wejlel ñumel, yic'ot jini alʌc'ʌl ti pejtelel pañimil, yic'ot pejtelel jini jʌlʌcña bʌ mi' majlel ti lum, che'en. 27Che' jini Dios tsi' mele winic ti' yejtal. Ti' yejtal Dios tsi' mele winic. Tsi' mele winic yic'ot x'ixic. 28Dios tsi' yʌq'ueyob i yutslel i t'an. Dios tsi' subeyob: La' p'ojliquetla. But'ula jini pañimil. C'ʌñʌla. La' i yumañetla jini chʌy yic'ot jini mut yic'ot pejtel cuxul tac bʌ mu' bʌ ti xʌmbal ti pañimil, che'en. 29Dios tsi' yʌlʌ: Awilan, tsa cʌq'ueyetla pejtel pʌc'bil bʌ yujil bʌ wut am bʌ ti pejtelel pañimil, yic'ot pejtel te' am bʌ i wut yic'ot i bʌc'. La' cha'añʌch cha'an i bʌl la' ñʌc'. 30Pejtel bʌte'el yic'ot pejtel mut mu' bʌ ti wejlel ñumel yic'ot pejtel jʌlʌcña bʌ ti lum am bʌ i cuxtʌlel tsa cʌq'ue cuxul bʌ pimel cha'an mi' c'ux, che'en Dios. Che'ʌch tsa' ujti. 31Dios tsi' q'uele pejtel i melbal. Awilan, wen uts'at. Tsa' ochi ic'ajel. Tsa' sʌc'a. Jiñʌch i wʌcp'ejlel q'uin.