EZEQUIEL 36
36
Mi caj i cha' wa'chocontel Israel
1I yalobil winic, yom ma' subeñob jini t'an jini año' bʌ ti wits ti Israel: “Jatetla chumulet bʌ la ti wits, ñich'tanla i t'an lac Yum: 2Lac Yum Dios woli' yʌl: Woli' chañ'esañob i bʌ la' contrajob ti la' tojlel. Woli' lon alob: Awilan lac cha'anix jini wits ba' chumuletla c'ʌlʌl ti oniyi, che'ob. 3Tsi' tsʌnsayetla baqui jach tsa' majliyetla. Tsi' chocoyetla majlel ti mozojintel. Tsi' wajleyetla. Tsi' p'ajayetla. 4Jini cha'an Israel, ñich'tanla i t'an lac Yum Dios ya' ba' chumuletla ti wits. Woli' suben jini wits tac, jini joctʌl tac, jini pa' tac, yic'ot pejtel i jajp tac wits, yic'ot pejtel jini jejmen tac bʌ tejclum, yic'ot jini cʌybilix bʌ tejclum tsa' bʌ ochi ti' wenta jini sajtemo' bʌ ch'oyolo' bʌ ti yan tac bʌ lum: 5Wen mich'on ti' contra Edom yic'ot i pi'ʌlob ti yan tac bʌ tejclum tsa' bʌ i lon tijicñesayob i pusic'al che' bʌ tsi' ch'ʌmʌyob c lum. Ti pejtelel i pusic'al yic'ot i ch'ejlel tsi' ña'tayob i jisan bajche' i colojm. 6Jini cha'an yom ma' suben jini winicob ti Israel año' bʌ ti wits, yic'ot ti joctʌl, yic'ot ti bujtʌl, yic'ot ti' jajp wits: Lac Yum Dios woli' yʌl: Tic mich'lel wolic cha'len t'an cha'an tsi' tic'layetob. Tsi' wajleyet la' contrajob ti cabʌl tejclum. 7Jini cha'an lac Yum Dios woli' yʌl: Tsa'ix c letsa j c'ʌb cha'an mi cʌc' c t'an: Mi caj i yubiñob quisin jini colem tejclum tac.
8Pero jatetla israelet bʌ la, mi caj la' cha' taj la' wenlel. Mi caj i cha' ac' cabʌl i cuch la' chol. 9Come joñon mi caj j coltañetla che' mi la' mel la' chol yic'ot che' mi la' cha'len pac'. 10Mi caj c p'ojlesan la' walobilob ti mojt ti mojt ti la' lumal. Mi caj i cha' p'ojlelob winicob ti tejclum tac. Mi caj i cha' wa'chocontel jini otot ba' jejmen tac. 11Mux c cha' p'ojlesan winicob yic'ot i yʌlac' ti Israel. Che' p'ojlemobix mi caj i colelob. Mi caj cʌc' ti chumtʌl ya' ti wits che' bajche' ti yambʌ ora. Mi caj c cha' aq'ueñob i wenlel ñumen bajche' ti ñaxan. Che' jini mi caj la' ña'tan la' Yumon. 12Mi' cajelob ti xʌmbal winicob ti la' bijlel. Mi caj i cha' sujtel jini lum ti' wenta c tejclumob. Ma'anix mi caj i chʌn pulob i yalobilob ti pulʌntib tac.
13Lac Yum Dios woli' yʌl: Jini winicob ti yan tac bʌ tejclum mi' tse'tañetla. Mi' lon alob: Jini israelob mi' c'uxob i winicob, lon che'ob. 14Pero ma'anix mi caj i chʌn alob, come cabʌl mi caj la' p'ojlel. Ma'anix mi caj i chʌmelob jini alp'eñelob ti la' tejclum tac. 15Ma'anix mi caj i chʌn tse'tañetla la' contrajob ti yan tac bʌ tejclum. Ma'anix mi caj la' chʌn a'lentel, come ma'anix mi caj la' chʌn cha'len jontolil”, che'en lac Yum Dios.
16-17Lac Yum tsi' cha' subeyon: I yalobil winic, che' chumulob jini israelob ya' ti' lumob, tsa' jach i bib'esayob yic'ot jontol bʌ i melbalob. Leco tsaj q'ueleyob che' bajche' tsucul pisil am bʌ i bibi'lel. Che'ʌch tsa' ajniyob tic tojlel. 18Tsac mich'leyob, come tsi' bib'esayob jini lum tic wut. Tsi' cha'leyob tsʌnsa. Tsi' ch'ujutesayob dioste' tac. 19Jini cha'an tsac pam pucuyob ti cabʌl lum cha'an mi' tojob i mul. 20Che' bʌ tsa' c'otiyob ti yambʌ tejclum tac, tsi' yʌc'ʌyob ti p'ajtʌl jini ch'ujul bʌ j c'aba', come tsi' yʌlʌyob jini sajtemo' bʌ: “Jiñobʌch i winicob Dios, pero Dios ma'anic tsa' mejli i coltañob”, lon che'ob. 21Wolic ña'tan bajche' mi caj c tsictesan i ñuclel j c'aba' come c winicob tsi' yʌc'ʌyob ti ts'a'lentel ti pejtelel pañimil, che'en.
22Jini cha'an subeñob jini israelob: “Lac Yum Dios woli' yʌl: Mi caj c cha' pʌyetla tilel, anquese mach wenic la' melbal, pero c'ux mi cubin jini ch'ujul bʌ j c'aba' tsa' bʌ a wʌc'ʌ ti ts'a'lentel ti pejtelel pañimil, come ma'anic tsa' la' p'isiyon ti wenta ti' tojlel yan tac bʌ tejclum ba' pujquemetla. 23Muq'uix c cha' ac' ti cʌjñel j c'aba' mach bʌ anic tsa' la' p'isi ti wenta ti' tojlel winicob ti pañimil. Che' mic pʌyetla loq'uel cha'an ch'ujul mi la' wajñel tic tojlel, mi caj i ña'tañob ch'ujulon, Dioson. 24Mi caj c cha' loc'sañetla ti pejtelel tejclum tac cha'an mic cha' pʌyetla tilel ti Israel.
25Mi caj c muletla yic'ot yʌx bʌ ja' cha'an mic sʌq'uesañetla ti pejtelel la' bibi'lel. Che' sʌquetla ma'anix mi caj la' chʌn ch'ujutesan dioste' tac. 26Mi caj cʌq'ueñetla tsiji' bʌ la' pusic'al yic'ot tsiji' bʌ la' ch'ujlel. Mi caj c loc'san i tsʌtslel la' pusic'al lajal bʌ bajche' xajlel cha'an mi cʌq'ueñetla c'un bʌ la' pusic'al yujil bʌ c'uxbiya. 27Mi caj cotsan ti la' tojlel jini quEspíritu cha'an mi la' jac' c subal yic'ot c t'an.
28Mi caj la' chumtʌl ya' ti lum tsa' bʌ cʌq'ue la' ñojte'elob. Mi caj la' wochel tic tejclum. Mi caj cochel ti la' Dios. 29Mi caj c sʌq'uesañetla ti la' bibi'lel. Mi caj c p'ojlesan la' pʌc'ʌb. Ma'anix mi caj la' chʌn ubin wi'ñal. 30Mi caj cʌc' ti wen colel la' pʌc'ʌb cha'an mi' yʌc' cabʌl i wut, cha'an ma'anix mi la' chʌn ubin wi'ñal. 31Che' jini quisintic mi caj la' wubin che' mi la' cha' ña'tan jontol bʌ la' melbal yic'ot jini mach bʌ uts'atic tsa' bʌ la' mele. 32Mach cha'anic jatetla mi caj c mel iliyi, pero cha'an i ñuq'uesʌntel j c'aba', che'en lac Yum Dios. Che'ʌch yom mi la' ña'tan. Cha'lenla quisin, ña'tanla jini leco jax bʌ la' melbal, israelob.
33Lac Yum Dios woli' yʌl: Mi caj c sʌq'uesañetla. Ti jim bʌ q'uin mi caj c cha' pʌyetla tilel ti Israel. Mi caj la' cha' wa'chocon jini tejclum tac. 34Mi caj i p'ojlelob winicob x'ixicob. Pejtel jini jochol bʌ lum mi caj i cha' cholontel ti' wut jini xñumelob. 35Mi caj i yʌlob: Ili chocbil bʌ lum lajalix bajche' jini pʌc'ʌbʌl ti Edén. Ili jochol bʌ tejclum tac ba' jejmen pejtel otot, cha' melbilix. Laj ts'ajquibilix. Cha' anix i yum, che'ob. 36Pejtel jini chumulo' bʌ ti la' joytʌlel mi caj i ña'tañob joñon tsac cha' wa'choco. Tsac cha' wen'esa jini lum tsa' bʌ cʌn sujti ti jochol. Joñon tsa cʌc'ʌ c t'an. Che'ʌch mi caj i yujtel, che'en lac Yum.
37-38Lac Yum Dios woli' yʌl: Wolic pijtan i yoración jini israelob mu' bʌ caj i c'ajtibeñoñob i wenlel i lumal. Chajpʌbilon cha'an mi cʌq'ueñob chuqui yomob. Mi caj c p'ojl'esañob che' bajche' i yonlel tiñʌme' ti' bijlel tac Jerusalén ba' ora mi yʌq'ueñob Dios tsʌnsʌbil bʌ i majtan. Che'ʌch mi caj i p'ojlelob winicob ti' tejclum tac Israel ba' jejmen wʌle. Ti jim bʌ ora mi caj i ña'tañob Yumʌlon”. Che' tsi' yʌlʌ lac Yum.
Currently Selected:
EZEQUIEL 36: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.