EZEQUIEL 35
35
T'an ti' contra Seir
1-2Lac Yum tsi' cha' subeyon: I yalobil winic, sutq'uin a wut ti' tojel jini wits i c'aba' Seir cha'an ma' tsictesʌbeñob jini wocol mu' bʌ caj i yubiñob. 3Che'ʌch yom ma' subeñob: “Lac Yum Dios woli' yʌl: Wʌle wolix j contrajiñetla añet bʌ la ti wits i c'aba' Seir. Mux caj c jats'etla tij c'ʌb. Jochocña mi caj i cʌytʌl la' lumal. 4-5Jochocña mi caj j cʌy la' tejclum tac. Ch'ijiyem mi caj la' cʌytʌl. Ti jim bʌ ora mi caj la' ña'tan Dioson. Come woli la' chʌn ts'a'len c tejclum Israel. Tsa' la' wʌc'ʌ ti tsʌnsʌntel jini israelob che' ti' yorajlel i wocol che' bʌ tsa cʌq'ueyob i toj i mul.
6Jini cha'an isujm mic subeñetla, mi caj c jisañetla ti la' pejtelel. Baqui jach mi la' majlel mi caj la' tsʌnsʌntel, come stsʌnsajetla. Jini cha'an mi caj la' tsʌnsʌntel, che'en lac Yum Dios. 7Mi caj c sutq'uin ti jochol bʌ lum jini wits i c'aba' Seir. Pejtel mu' bʌ i loq'uelob yic'ot mu' bʌ i yochelob ya'i mi caj i laj jilelob. 8Mi caj c bujt'esan yic'ot xchʌmelob pejtel jini wits tac yic'ot jini joctʌl tac, yic'ot i jajp tac lum, yic'ot colem ja'. Laj tsʌnsʌbilob ti espada. 9Mi caj c junyajlel cʌyetla. Ma'anix mi caj la' chʌn wa'chocon la' tejclum. Ti jim bʌ ora mi caj la' ña'tan Yumʌlon.
10Tsa' la' lon alʌ: Jini cha'p'ejl tejclum yic'ot jini cha'pejt lum mi caj i yochel tic wenta lojon. Mi caj c ch'ʌm lojon tic wenta, lon che'etla, anquese ya'an Dios yic'otob. 11Jini cha'an, isujm mic subeñetla, mi caj cʌq'ueñetla wocol cha'an la' mich'ajel, cha'an tsʌytsʌyña la' pusic'al. Mi caj cʌc' ti c'uxbintel j c'aba' ti Israel che' mi cʌq'ueñetla la' toj la' mul, che'en lac Yum Dios. 12Che' jini mi caj la' ña'tan joñon Yumʌlon. Tsa cubi che' bʌ tsa' la' cha'le wulwul t'an tij contra. Tsa'ix la' lon alʌ: Tsa'ix laj jiliyob. An ti lac wenta cha'an mi lac jisañob, lon che'etla. 13Tsa la' lon chañ'esa la' bʌ tij contra yic'ot la' t'an. Joñon tsac laj ubi. 14Mi caj i yubiñob i tijicñʌyel i pusic'al pejtel año' bʌ ti pañimil che' mic jisañetla. 15Tijicña tsa' la' wubi che' bʌ tsa' chilbentiyob i lum jini israelob. Che' ja'el tijicña mi caj cubin che' mic jisañetla. Jochocña mi caj i cʌytʌl jini wits i c'aba' Seir yic'ot pejtel jini lum ti Edom. Che' jini mi caj la' ña'tan Yumʌlon”, che'en.
Currently Selected:
EZEQUIEL 35: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.