EZEQUIEL 22
22
I mul jini año' bʌ ti Jerusalén
1-2Tsa' tili i t'an lac Yum ba' añon: I yalobil winic, subeñob i mul jini año' bʌ ti Jerusalén, come puru stsʌnsajob. Tsictesʌbeñob jontol bʌ i melbal. 3Subeñob: “Lac Yum woli' yʌl: Stsʌnsajetla, mi caj la' toj la' mul. Mi la' mel la' dios tac cha'an mi la' ch'ujutesan. Bibi'etla, jontoletla. 4Tsa'ix la' cha'le tsʌnsa. Tsa'ix la' ch'ujutesa dioste' tac. Tsa'ix la' bajñel pʌyʌ tilel la' wocol. I yorajlelix mi caj cʌq'uetla ti ts'a'lentel yic'ot ti wajlentel ti pejtelel pañimil. 5Mi caj i tse'tañetla jini lʌc'ʌl bʌ añob yic'ot jini ñajt bʌ añob che' mi la' toj la' mul, come cabʌl tsa' la' tic'la yaño' bʌ.
6Pejtelel jini ñuco' bʌ i ye'tel ti Israel woli' c'ʌñob i p'ʌtʌlel cha'an mi' jisañob i pi'ʌlob. 7Jini ch'itoñob yic'ot xch'ocob mi' ts'a'leñob i tatob yic'ot i ña'ob. Mi la' tic'lan jini ñajt bʌ ch'oyolob yic'ot jini meba' alʌlob yic'ot meba' x'ixicob. 8Mi la' ts'a'len jini ch'ujul bʌ ajñibʌl. Mi la' cha'len e'tel ti' yorajlel c'aj o. 9An mu' bʌ i cha'leñob jop't'an cha'an mi' yʌc'ob ti chʌmel i pi'ʌlob. An mu' bʌ i c'uxbiñob dioste' tac ti bujbujtʌl. Leco i melbalob ti pejtelel la' lumal. 10An mu' bʌ i cha'leñob ts'i'lel yic'ot i yijñam i tat. Mi' pi'leñob x'ixicob woli bʌ i q'uelob i c'amʌjel. 11Cabʌletla mi la' pi'leben i yijñam yambʌ winic. Mi la' pi'len la' wʌ'lib yic'ot la' majan ijti'an. 12Mi la' ch'ʌm la' tojol cha'an mi la' cha'len tsʌnsa. Mi la' tic'lan la' pi'ʌlob. Tsa'ix ñajʌyiyon la' cha'an, che'en lac Yum Dios.
13Jini cha'an tsa'ix c letsa j c'ʌb tic mich'lel. Mi caj c meletla cha'an la' xujch' yic'ot la' tsʌnsa. 14¿Ch'ejl ba la' pusic'al ti jim bʌ ora che' mic tilel c meletla? Joñon la' Yumon tsac subeyetla. Mi caj c ts'ʌctesan, che'en lac Yum. 15Mi caj c pam puquetla ti pañimil. Mi caj c sʌq'uesañetla ti pejtelel la' jontolil. 16Mi caj la' ts'a'lentel ti pejtelel pañimil. Che' jini mi caj la' ña'tan la' Yumon”. Che' yom ma' subeñob, che'en lac Yum.
17Tsa' tili i t'an lac Yum ba' añon: 18I yalobil winic, tsa'ix sujtiyob jini israelob che' bajche' misujelʌl tic wut. Ti pejtelelob lajalob bajche' i bibi'lel tsucu taq'uin yic'ot c'ʌnc'ʌn taq'uin, che'en. 19Jini cha'an lac Yum Dios woli' yʌl: Cha'an ti' caj tsa' wen p'ojli la' jontolil, jini cha'an mi caj c much'quiñetla ya' ti Jerusalén. 20Che' bajche' winicob mi' yotsañob ti c'ajc jini tsucu taq'uin yic'ot c'ʌnc'ʌn taq'uin cha'an mi' yulmesañob, che' ja'el joñon mi caj c tempañetla cha'an mic meletla tic mich'ajel. 21Mi caj c tempañetla. Mi caj c wujtañetla yic'ot i c'ʌc'al c mich'ajel. Che' jini mi caj la' sʌq'uesʌntel yic'ot c'ajc yilal. 22Che' bajche' mi' sʌq'uesʌntel tsucu taq'uin ti c'ajc, che'ʌch mi caj la' sʌq'uesʌntel ja'el. Che' jini mi caj la' ña'tan la' Yumon mu' bʌ cʌq'uetla ti wocol tic mich'ajel, che'en lac Yum.
23Tsa' tili i t'an lac Yum ba' añon: 24I yalobil winic, subeñob jini israelob: “Ti' yorajlel c mich'ajel ma'anic mi caj i sʌq'uesʌntel la' lumal. Lajal mi caj i sujtel che' bajche' colem bʌ i tiquiñal pañimil. 25Come mi' temob i t'an jini x'alt'añob la' cha'an. Che' bajche' bajlum mi' chuc i we'el, woli' tsʌnsañob winicob cha'an mi' chilbeñob i chubʌ'an yic'ot i lum. Jini cha'an cabʌlobix jini meba' x'ixicob ti la' lumal. 26Jini motomajob mi' ñusañob c mandar. Mi' bib'esañob c Templo yic'ot jini ch'ujul bʌ j c'aba'. Junlajal jach mi' q'uelob jini sʌsʌc bʌ yic'ot jini bibi' bʌ. Ma'anic mi' p'isob ti wenta i q'uiñilel c'aj o. Ti pejtelelob mi' ts'a'leñob j c'aba'. 27Lajalob la' yumob bajche' bʌte'el ts'i' mu' bʌ i chuc i we'el. Mi' tsʌnsañob winicob cha'an mi' xujch'ibeñob i chubʌ'an. 28Lajalob jini x'alt'añob la' cha'an bajche' jini mu' bʌ i bomben i pat otot che' tsuculix. Mi' lon subob chuqui mach isujmic. Mi' lon alob: Che'ʌch woli' yʌl lac Yum Dios, lon che'ob, anquese ma'anic chuqui woli' yʌl lac Yum. 29Ti pejtelel pañimil an tic'laya yic'ot xujch'. Jini p'ump'uño' bʌ mi' tic'lañob i bʌ. Mi' chilbeñob i chubʌ'an jini ñajt bʌ ch'oyolob. 30Tsac lon sajca juntiquil toj bʌ i pusic'al yujil bʌ coltaya i wentajlel i ts'ajquil jini tejclum cha'an mi' mʌctan c mich'ajel cha'an la' mul, pero mi juntiquilic tsac taja. 31Jini cha'an ts'ʌcʌl mi caj la' toj la' mul. Wersa mi caj la' wubin wocol. Mi caj c jisañetla tic mich'ajel”. Che' yom ma' subeñob, che'en.
Currently Selected:
EZEQUIEL 22: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.