EXODO 6
6
1Lac Yum tsi' sube Moisés: Wʌle mi caj a q'uel chuqui mi caj c mel ti' tojlel Faraón. Wersa mi caj i chocob loq'uel. Mi caj i wets'ob loq'uel ti' lumal, che'en.
2Dios tsi' sube ja'el: Joñon a Yumon. 3Tsac pʌsʌ c bʌ ti' tojlelob Abraham, yic'ot Isaac yic'ot Jacob. Tsac tsictesʌbeyob j C'aba' cha'an Dioson Mach bʌ anic i P'isol c P'ʌtʌlel. Ma'anic tsac tsictesʌbeyob mi i Yumon. Jiñʌch yambʌ j C'aba', Yumʌlon. 4Tsa cʌq'ueyob xuc'ul bʌ c t'an cha'an mi caj cʌq'ueñob i lumal Canaán ba' tsa' poj ajniyob yic'ot Jacob. 5Tsa cubibeyob i yajcʌn israelob cha'an woliyob ti wocol e'tel ti' tojlel egiptojob. Tsa'ix c ña'ta jini xuc'ul bʌ t'an tsa' bʌ cʌq'ueyob. 6Subeñob jini israelob: “La' Yumon. Mi caj c ju'sʌbeñetla la' cuch tsa' bʌ i yʌq'ueyetla jini egiptojob. Mi caj c loc'sañetla ti majtan e'tel ti' tojlelob. Mi caj j coltañetla ti cabʌl c p'ʌtʌlel yic'ot bʌbʌq'uen tac bʌ c melbal. 7Mi caj cotsañetla tic cha'año' bʌ. Mi caj cochel ti la' Dios. Mi caj la' ña'tan la' Yumon la' Dioson tsa' bʌ c pʌyʌyetla loq'uel ti wocol e'tel ti' tojlel egiptojob. 8Mi caj c pʌyetla ochel ti jini lum tsa' bʌ cʌq'ueyob Abraham yic'ot Isaac yic'ot Jacob che' bajche' tsac subeyob. Mi caj cʌq'ueñetla come la' Yumon”. Che' yom ma' subeñob, che'en lac Yum.
9Moisés tsi' laj subeyob israelob, pero ma'anic tsi' jac'ʌyob come wen wocol jax woli yubiñob jini tsʌts bʌ e'tel. 10-11Lac Yum tsi' sube Moisés: Cucu ba'an Faraón, jini rey ti Egipto. Suben wersa yom mi' yʌc' i t'an cha'an mi' loq'uelob ti Egipto jini israelob, che'en. 12Pero Moisés tsi' sube lac Yum: Ma'anic tsi' jac'beyoñob jini israelob. ¿Bajche' mi' caj i jac'on Faraón? Mach wen cujilic t'an, che'en. 13Lac Yum tsi' pejca Moisés yic'ot Aarón. Tsi' subeyob bajche' yom mi' cha' subeñob israelob yic'ot Faraón jini rey ti Egipto cha'an mi' yʌc'ob ti loq'uel israelob ya' ti Egipto.
I ñojte'elob yic'ot i p'olbal Moisés yic'ot Aarón
14Jiñobʌch yumʌlob ti jujump'ejl otot: Jini winic bʌ i yalobilob Rubén, jini ascuñʌl bʌ i yalobil Israel: Hanoc, Falú, Hezrón yic'ot Carmi. Jiñobʌch i p'olbal Rubén ti jujump'ejl i yotot tac. 15Jiñobʌch i yalobilob Simeón: Jemuel, Jamín, Ohad, Jaquín, Zohar yic'ot Saúl i yalobil x'ixic ch'oyol bʌ ti Canaán. Jiñobʌch i p'olbal Simeón ti jujump'ejl i yotot tac.
16Jiñobʌch i c'aba' ch'iton bʌ i yalobilob Leví ti jujump'ejl i yotot tac: Gersón, Coat, Merari. Tsa' jal'a ti pañimil Leví jo'c'al yic'ot wuclujump'ejl i cha'c'al jab. 17I yalobilob Gersón ti jujump'ejl i yotot: Libni yic'ot Simei. 18I yalobilob Coat: Amram, Izhar, Hebrón, Uziel. Tsa' jal'a ti pañimil Coat jo'c'al yic'ot uxlujump'ejl i cha'c'al jab. 19I yalobilob Merari: Mahli yic'ot Musi. Jiñobʌch i p'olbal Leví ti jujump'ejl i yotot.
20Amram tsi' pʌyʌ Jocabed. Tsi' yʌc'ʌ ti pañimil Aarón yic'ot Moisés. Tsa' jal'a ti pañimil Amram jo'c'al yic'ot wuclujump'ejl i cha'c'al (137) jab. 21-22I yalobilob Izhar: Coré, Nefeg yic'ot Zicri. I yalobilob Iziel: Misael, Elzafán yic'ot Sitri. 23Aarón tsi' pʌyʌ Elisabet i yalobil Aminadab, i yijts'in Naasón. Tsi' yʌc'ʌ ti pañimil Nadab, Abiú, Eleazar yic'ot Itamar. 24I yalobilob Coré: Asir, Elcana yic'ot Abiasaf. Jiñobʌch i p'olbal Coré ti jujump'ejl i yotot tac. 25Eleazar i yalobil Aarón tsi' pʌyʌ ti' yijnam i yalobil Futiel. Tsi' yʌc'ʌ ti pañimil Finees. Jiñobʌch yumʌlob ti jujump'ejl otot tac cha'an levíjob. 26Jiñobʌch Aarón yic'ot Moisés tsa' bʌ subentiyob cha'an lac Yum: Pʌyʌla loq'uel israelob ti Egipto, che'en. 27Jiñobʌch tsa' bʌ i pejcayob Faraón, rey bʌ ti Egipto, cha'an mi' choc loq'uel israelob ti Egipto. Jiñʌch Aarón yic'ot Moisés.
Lac Yum tsi' yʌq'ue i ye'tel Moisés yic'ot Aarón
28Che' bʌ tsi' pejca Moisés lac Yum ya' ti' lumal Egipto, 29tsi' yʌlʌ: Joñon a Yumon. Suben Faraón, rey bʌ ti Egipto, pejtel mu' bʌ c subeñet, che'en. 30Moisés tsi' jac'ʌ lac Yum: Mach wen cujilic t'an. ¿Bajche' mi' caj i ñich'tañon Faraón? che'en.
Currently Selected:
EXODO 6: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.