DEUTERONOMIO 7
7
Tsa' subentiyob cha'an ma'anic mi' ch'ujutesañob dios tac ya' ti Canaán
(Éx. 34.11-17)
1Lac Yum Dios mi caj i pʌyetla ochel ti la' lum mu' bʌ caj i yʌq'ueñetla. Che' ja'el mi caj i choc loq'uel cabʌl tejclumob ti la' tojlel, jiñobʌch: heteojob, gergeseojob, amorreojob, cananeojob, ferezeojob, heveojob, jebuseojob. Jiñobʌch wucp'ejl tejclum ñumen ñuc bʌ bajche' jatetla, ñumen p'ʌtʌlob ja'el. 2Lac Yum Dios mi caj i yʌc'ob ti a p'ʌtʌlel cha'an mi la' jisañob. Che' mʌlbilix la' cha'an, yom mi' la' junyajlel jisañob ti pejtelob. Mach yomic mi la' laj la' t'an yic'otob. Mach yomic mi la' p'untañob. 3Mach yomic mi la' ñujpuñijel yic'otob. Mach yomic mi la' sijibeñob xch'oc bʌ la' walobilob. Mach yomic mi la' c'ajtiben xch'oc bʌ i yalobilob cha'an la' walobilob, 4ame muq'uic la' wʌc' ti sajtel la' walobilob ti' tojlel lac Yum cha'an mi' chujutesañob jini dioste' tac. Che' jini mi caj i mich' q'ueletla lac Yum. Mi caj i bʌc' jisañetla. 5Pero yom mi la' mel che' bajche' jini: Jembenla jini wa'chocobil bʌ baqui mi' pulbeñob i majtan i diosob. Xulbenla jini ch'ujul bʌ oy i cha'añob. Yom mi la' laj jisʌbeñob i dios Asera. Yom mi la' pul ti pejtelel.
Ch'ujul bʌ tejclum i cha'an lac Yum
6Jatetla ch'ujul bʌ tejclumetla i cha'an lac Yum Dios. Come lac Yum Dios tsa'ix i yajcayetla ti' tojlel pejtel winicob ti pejtelel lum cha'an mi' yotsañetla ti' cha'an bʌ c'uxbibil bʌ i cha'an. 7Come mach cha'anic ñumen cabʌletla tsi' cʌntayetla yic'ot tsi' yajcayetla. Come mero ts'ita'etla ti' tojlel yambʌ tejclumob. 8Pero cha'an jach tsi' c'uxbiyetla lac Yum tsi' yajcayetla cha'an mi' ts'ʌctesan i t'an tsa' bʌ i wʌn subeyob la' ñojte'el. Jini cha'an lac Yum tsi' c'ʌñʌ i p'ʌtʌlel cha'an mi' loc'sañetla baqui woliyetla ti majtan e'tel ti yambʌ ora ti' tojlel jini rey Faraón ti Egipto. 9Ña'tanla che' jini Diosʌch lac Yum, jini jach bʌ Dios, xuc'ul bʌ ti pejtelel ora. Mi' chʌn ña'tan jini xuc'ul bʌ t'an tsa' tʌ i yʌc'ʌ ti lac tojlel. Mi' pʌsbeñob i yutslel i pusic'al jini mu' bʌ i jac'beñob i mandar c'ʌlʌl ti jump'ejl mil i lajm la' p'olbal. 10Mi' q'uextʌbeñob i mul pejtelob mu' bʌ i ts'a'leñob, mu' bʌ i ñusʌbeñob i t'an. Mi caj i jisañob. Ma'anic mi' jalʌtesan i bʌ cha'an mi' yʌq'ueñob i toj i mul. Muq'uix i yʌq'ueñob i toj. 11Jini cha'an mic subeñetla yom mi la' jac'ben i t'an yic'ot pejtelel i mandar mu' bʌ c subeñetla wʌle.
Lac wenlel che' mi lac jac'
(Lv. 26.3-13; Dt. 28.1-14)
12Mi muq'uix la' wubin pejtelel jini t'an, mi muq'uix la' wen jac' lac Yum Dios, mi cajel i chʌn ña'tan jini xuc'ul bʌ i t'an yic'ot i yutslel i pusic'al che' bajche' tsi' wʌn subeyob la' ñojte'elob. 13Lac Yum mi caj i c'uxbiñetla. Mi caj i yʌq'ueñetla i yutslel i t'an. Mi caj i yʌq'uetla ti p'ojlel. Uts'at mi caj i colel chuqui tac mi la' pʌc' ti la' lum. Mi caj i p'ojlesʌbeñetla trigo, yic'ot i ya'lel la' ts'usubil, yic'ot aceite, yic'ot i yal tac la' wacax, yic'ot la' tiñʌme' ti jini lum mu' bʌ caj i yʌq'ueñetla che' bajche' tsi' wʌn subeyob la' ñojte'elob. 14Ñumen tijicñayetla bajche' pejtelel yan tac bʌ tejclum, come ma'anic ti' la' tojlel ch'iton mi xch'oc mach bʌ anic mi caj i yʌc' i yalobil. La' wʌlac' ja'el mi caj i yʌc' i yal. 15Lac Yum mi caj i loc'sʌbeñetla pejtelel la' c'amʌjel. Mi caj i cʌntañetla cha'an ma'anic mi la' taj jini c'amʌjel mu' bʌ la' bʌc'ñan am bʌ ti Egipto. Pero muq'uix i yʌq'ueñob i c'amʌjel pejtelob mu' bʌ i ts'a'leñetla. 16Yom mi la' laj jisan jini tejclum tac mu' bʌ caj i yʌq'ueñetla lac Yum Dios. Mach yomic mi la' p'untañob. Mach yomic mi la' yuman i diosob, ame chujquiquetla che' bajche' ti yac.
17Mi tsa' caji la' wʌl ti la' pusic'al: “Ñumen cabʌlob che' bajche' joñonla. ¿Bajche' mi mejlel lac choc loq'uel?” mi che'etla, 18mach yomic mi la' bʌc'ñañob. Ña'tanla chuqui tsi' mele lac Yum ti' tojlel Faraón yic'ot ti' tojlelob pejtelel jini año' bʌ ti Egipto. 19Q'uelelix lac cha'an jini bʌbʌq'uen tac bʌ i yejtal tac bʌ i p'ʌtʌlel Dios, yic'ot jini ñuc tac bʌ i p'ʌtʌlel tsa' bʌ i c'ʌñʌ che' bʌ tsi' loc'sayonla ti Egipto. Che'ʌch mi caj i melbeñetla lac Yum ti' tojlel jini tejclum tac mu' bʌ la' bʌc'ñan. 20Lac Yum Dios mi caj i bʌc'tesañob jinto mi' laj jilelob yic'ot jini tsa' bʌ puts'iyob majlel. 21Mach la' bʌc'ñañob, come lac Yum Dios an la' wic'ot. Wen ñuc ajñel, wen bʌc'ñʌbil. 22Lac Yum Dios mi cajel i c'unte' jisan la' contrajob ti pejtelelob. Mach mejlic la' jisanob ti ora ti' pejtelob, ame p'ojlic jini jontol bʌ bʌte'el cha'an mi' tic'lañetla. 23Pero lac Yum Dios mi caj i yʌc' ti jilel la' contrajob ti mojt ti mojt ti' la' tojlel cha'an mi la' jisañob ti pejtelob. 24Dios mi caj i yʌc' ti la' c'ʌb i reyob. Jatetla mi caj la' jisʌbeñob i c'aba' ila ti pañimil. Ma'anic majqui mi caj i coltan i bʌ ti la' tojlel. 25Yom mi la' laj pulbeñob i diosob. Mach mi la' mulʌbeñob i plata, mi oro cha'an mi la' ch'ʌmben, ame chujquiquetla che' bajche' ti yac. Ts'a'lebil cha'an lac Yum Dios jini melbil tac bʌ dios. 26Mach yomic mi la' wis ch'ʌm tilel ti la' wotot jini ts'a'lebil bʌ ti Dios, ame chojquiquetla. Yom mi la' ts'a'len. Yom mi la' choc, come tic'biletla ti lac Yum.
Currently Selected:
DEUTERONOMIO 7: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.