DEUTERONOMIO 32
32
1Ñich'tanla añet bʌ la ti panchan yic'ot ti pañimil.
Ñich'tʌbeñon c t'an:
2Lajalʌch j cʌntesa che' bajche' ja'al
Mu' bʌ i yajlel ti' pam jini ch'oc to bʌ jam,
Che' bajche' ja'al ya' ti wits.
3Mi caj c sub i ñuclel lac Yum.
Wen an i ñuclel ti chan.
4Jiñʌch xajlel. Ts'ʌcʌl i ye'tel.
Tojʌch pejtelel mu' bʌ i mel.
Xuc'ulʌch, ma'anic i mul.
5Pero jini israelob tsa'ix i socoyob i bʌ.
Tsa'ix i cha'leyob mulil.
Mach yic'otobix lac Yum.
Wen tsʌtsob i pusic'al.
6¿Che' ba yom melol ti' wut lac Yum?
Tontojetla.
¿Mach ba la' tatic jini Dios?
¿Mach ba jinic tsi' meleyetla?
¿Mach ba jinic tsi' yʌq'ueyetla la' p'ʌtʌlel?
7Ña'tanla bajche' añetla ti wajali.
C'ajtiben la' tat yic'ot jini xñoxob
Cha'an mi' tsictesʌbeñetla.
8Dios tsi' t'oxbeyob i lum pejtelel tejclum tac,
Tsi' pucuyob pejtelel winicob x'ixicob,
Tsi' yʌq'ueyob i cayajonlel tac ba' jaxʌl i lum i yalobilob Israel,
9Come c'uxbibil Israel i cha'an lac Yum.
Jacob i yajcʌbalʌch lac Yum.
10Lac Yum tsi' cʌntayob ti colem bʌ i tiquiñal pañimil.
Ya' ti jochol bʌ lum ba' bʌbʌq'uen.
Tsi' wen cʌntayob che' bajche' mi laj cʌntan lac wut,
11Che' bajche' mi' luts' i yal jini xiye'.
Mi' cuch majlel i yal ti' wich'.
Che'ʌch tsi' mele lac Yum.
12Ti' bajñelil lac Yum tsi' toj'esayob majlel.
Ma'anic yambʌ dios ti' tojlel.
13Dios tsi' yʌq'ueyob israelob uts'at bʌ lum ya' ti' pam jini bujtʌl tac.
Tsi' yʌq'ueyob i c'uxben i wut.
Tsi' yʌq'ueyob i mʌc' chab luchbil bʌ loq'uel ti xajlel,
Yic'ot olivo aceite ti xajlelol.
14Tsi' yʌq'ueyob lech yic'ot we'elʌl,
Uts'at bʌ tat tiñʌme' tac am bʌ ti Basán,
Yic'ot wen uts'at bʌ trigo.
Tsi' japʌyob i ya'lel ts'usub.
15Jini israelob tsa' ñaj'ayob,
Tsa' wen jujp'iyob.
Che' jini tsi' cʌyʌyob i Dios anquese i melbalob.
Tsi' ts'a'leyob jini Xajlel tsa' bʌ i coltayob.
16Tsa' caji i tsajcañob yambʌ dioste' tac,
Lac Yum tsi' mich'leyob,
Tsʌytsʌyña i pusic'al tsi' q'ueleyob.
17Tsi' tsʌnsʌbeyob i majtan tac xibajob mach bʌ diosobic.
Tsi' tsajcayob tsiji' bʌ dioste' mach bʌ anic tsi' ch'ujutesayob i ñojte'elob.
18Tsi' cʌyʌyob jini Xajlel tsa' bʌ i meleyob.
Tsa' ñajʌyiyob i cha'an jini Dios tsa' bʌ i yʌc'ʌyob ti pañimil.
19Lac Yum tsi' q'uele chuqui woli' melob.
Lac Yum tsi' ts'a'leyob,
Tsa' caji i mich'len i yalobilob.
20Lac Yum tsi' yʌlʌ: Mi caj j cʌyob.
Ya'to tsiquil bajche' mi caj i jilelob,
Come wen tsʌtsob jax i pusic'al, mach xuc'ulobic.
21Tsa'ix i techbeyon i tsʌytsʌñʌyel c pusic'al cha'an i dioste' mach bʌ Diosic.
Joñon mi caj cotsʌbeñob i tsʌytsʌyñʌyel i pusic'al
Che' mij c'uxbin yambʌ tejclumob año' bʌ ti pañimil, jini cʌybilix bʌ.
22Jini c mich'lel mi' lejmesan c'ajc
Woli bʌ ti lejmel c'ʌlʌl ti' yajñib chʌmeño' bʌ.
Mi' yʌc' ti pulel pañimil yic'ot pejtelel cholel tac.
Mi' yʌc' ti pulel i te'el tac.
23Mi caj c p'ojlesʌbeñob wocol.
24Mi caj cʌq'ueñob wi'ñal yic'ot c'ajc,
Yic'ot c'amʌjel mu' bʌ caj i tsʌnsañob.
Mi caj c choc tilel jontol bʌ bʌte'el
Cha'an mi' c'uxob ti jay bʌ i yej.
Mi caj c jisañob yic'ot i venenojlel jontol bʌ lucum, cotcotña bʌ ti lum.
25Ti pat i yotot an i contrajob mu' bʌ caj i tsʌnsañob ti espada.
Ti mal i yotot an leco bʌ c'amʌjel.
Mi caj i yubiñob bʌq'uen winicob yic'ot xch'ocob,
Yic'ot alʌlob yic'ot xñoxob.
26Tsac ña'ta c junyajlel pucob majlel ti ñajt bʌ pañimil
Cha'an ma'anix mi' chʌn ña'tʌntelob.
27Pero mach che'ic tsac mele ame i lon chañ'esañob i bʌ i contrajob che' mi' jisʌntelob jini israelob,
Ame mi' lon alob: “Tsa' mʌjli lac cha'an ti lac bajñel p'ʌtʌlel. Mach jinic i ye'tel lac Yum”, ame lon che'icob.
28Tontojob jini israelob,
Ma'añobic i ña'tʌbal.
29Wen uts'at añobic i ña'tʌbal.
Uts'at muq'uic i ch'ʌmbeñob isujm
Cha'an mi' ña'tañob bajche' mi caj i jilelob.
30Juntiquil jach i contra mi caj i yajñesan jump'ejl mil israelob.
Cha'tiquil jach mi caj i puts'tesan lujump'ejl mil,
Come jini Xajlel i cha'an israelob tsi' cʌyʌyob.
Lac Yum tsi' yʌc'ʌyob ti jisʌntel.
31Come ma'anic i xajlel yambʌ tejclum tac
Che' bajche' lac Xajlel.
Lolom jach mi' pejcañob i dioste' tac.
32Lajal i mul israelob che' bajche' año' bʌ ti Sodoma yic'ot Gomorra.
Ch'aj i melbal tac che' bajche' veneno.
33Mi' japob i venenojlel lucum yubil.
34Pero tsa'ix c yajcayob, tsa'ix c loto jini israelob che' bajche' letsem bʌ i tojol ujʌl.
35Joñon mi caj j q'uextʌbeñob i mul i contrajob.
Mi caj cʌq'ueñob castigo. Mach jalix mi caj i yajlelob, che'en.
36Lac Yum mi caj i coltan jini israelob ti' tojlel i contrajob.
Mi caj i p'untan i winicob che' ma'añobix i p'ʌtʌlel,
Che' ma'anix mi' cʌytʌl, mi libre bʌ, mi mozo bʌ.
37Che' jini lac Yum mi caj i c'ajtibeñob: ¿Bac'an la' dioste'? ¿Bac'an la' xajlel cha'an mi la' majlel ti puts'el?
38¿Bac'an la' dios xajlel? Tsa' la' wʌq'ueyob i majtan tac, lew yic'ot vino.
La' i coltañetla, la' i yotsañetla ti' wenta.
39Q'uelela. Joñon la' Dioson. Joñon jach, ma'anic yambʌ.
Joñon mi cʌq'uetla ti chʌmel. Joñon mi cʌq'ueñetla la' cuxtʌlel.
Mic lowetla, mic cha' lajmesañetla.
Ma'anic majqui mi mejlel i loc'sañetla tic p'ʌtʌlel.
40Mic letsan j c'ʌb ti panchan cha'an mi cʌc' c t'an,
Wersa mi' caj ti ts'ʌctiyel come cuxulon ti pejtelel ora.
41Mi caj c juc' quespada, mi caj c chajpan c bʌ cha'an meloñel.
Mi caj cʌq'ueñob i castigo j contrajob.
Mi caj i tojob i mul jini mu' bʌ i ts'a'leñoñob.
42Mi caj c julob ti jalʌjb. On mi caj c bec'beñob i ch'ich'el.
Mi caj c tsepbeñob i bʌc'tal j contrajob ti espada.
Chʌctilan i ch'ich'el i jol j contrajob, che'en lac Yum.
43Ti pejtelel tejclum tac
Subula i ñuclel i winicob Dios,
Come lac Yum mi caj i q'uextʌbeñob i ch'ich'el i cha'año' bʌ.
Mi caj i yʌq'ueñob castigo i contrajob.
Mi caj i sʌq'uesan i winicob x'ixicob yic'ot i lumal.
44Tsa' caji i c'ʌyiñob jini t'an Moisés yic'ot Josué (i yalobil Nun) ti' tojlel pejtel israelob. Tsi' cʌntesayob. 45-46Che' bʌ tsa' ujti i cʌntesañob, tsi' yʌlʌ Moisés: Ac'ʌla ti la' pusic'al pejtelel ili t'an tsa' bʌ j cʌntesayetla ti ili q'uin. Cʌntesan la' walobilob cha'an mi' chʌcʌ q'uelob i bʌ cha'an ts'ʌcʌl mi' jac'ob pejtel ili mandar. 47Come ili mandar tac mach to'ol t'anic jach. La' cuxtʌlelʌch. Mi xuc'ul mi la' jac', mi caj la' wen jalijel ti jini lum ya' ti junwejl Jordán ja' baqui mi la' majlel ti chumtʌl. Che' tsi' yʌlʌ Moisés.
Moisés tsi' ñajti q'uele i lumal Canaán
48-49Ti jini jach bʌ q'uin lac Yum tsi' sube Moisés: Cucu ti letsel ti' jol jini wits i c'aba' Nebo am bʌ ti wits i c'aba' Abiram. Wʌ'an ti' lumal Moab am bʌ ti' tojel Jericó. Yom ma' ñajtʌ q'uel jini Canaán woli bʌ cʌq'ueñob jini israelob ba' mi caj i chumtʌlob. 50Mi caj a chʌmel ti jini wits. Mi caj a pʌjyel ba'an a ñojte'elob. Mi caj a chʌmel che' bajche' tsa' chʌmi Aarón ya' ti wits i c'aba' Hor. Tsa' pʌjyi majlel ba'an i ñojte'elob. 51Ti la' cha'ticlel tsa' la' chañ'esa la' bʌ ya' ti ja' i c'aba' Meriba am bʌ ti Cades ya' ti colem bʌ i tiquiñal pañimil i c'aba' Zin. Ma'anic tsa' la' q'ueleyon ti ñuc ti' tojlel israelob. 52Mi caj a q'uel jini lum ti ñajtʌl, pero mach mejlic a wochel ti jini lum woli bʌ cʌq'ueñob israelob. Che' tsi' yʌlʌ lac Yum.
Currently Selected:
DEUTERONOMIO 32: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.