DEUTERONOMIO 28
28
Jini bendición
(Lv. 26.3-13; Dt. 7.12-24)
1Mi uts'at ma' wubiben i t'an lac Yum Dios, mi ts'ʌcʌl ma' mel pejtel jini mandar woli bʌ c subeñetla wʌle, lac Yum Dios mi caj i ñumen aq'uet ti ñuc ti' tojlel pejtel yan tac bʌ tejclum ti pañimil. 2-6Mi caj a taj pejtel ili bendición, mi xuc'ul ma' ch'ujbiben i t'an lac Yum Dios: Uts'at mi caj a wajñel ila ti tejclum, yic'ot ti a lum. Uts'at mi caj i p'ojlelob a walobilob, yic'ot i wut a pʌc'ʌb, yic'ot i yal pejtelel a wʌlac', wacax yic'ot tiñʌme'. Uts'at pejtel mu' bʌ a wʌc' ti a chiquib, yic'ot jini mu' bʌ a juch' cha'an ma' c'ux. Uts'at chuqui mi caj a taj che' ma' loq'uel ti a we'tel yic'ot che' ma' cha' ochel. 7Lac Yum mi caj i yʌc' ti jilel a contrajob. Jump'ejl bij mi caj i tilelob i contrajiñet, wucp'ejl bij mi caj i pujquelob majlel che' mi' puts'tañetob. 8Lac Yum mi caj i yʌq'ueñet i bendición ti' yotlel a trigo. Ti pejtelel chuqui tac ma' mel ti a c'ʌb mi caj i wen aq'ueñet i bendición lac Yum Dios ya' ti a lum woli bʌ i yʌq'ueñet. 9Lac Yum mi caj i wa'chocoñet ti ch'ujul bʌ i tejclumet che' bajche' tsi' wʌn alʌ, mi ts'ʌcʌl ma' jac'ben i mandar lac Yum Dios cha'an ma' cha'len xʌmbal ti' bijlel. 10Che' jini pejtel jini yambʌ tejclum tac mi caj i q'uelob ñucʌch i p'ʌtʌlel lac Yum ti la' tojlel. Jini cha'an mi caj i bʌc'ñañet come i cha'añetla lac Yum. 11Lac Yum mi caj i wen p'ojlesan a walobilob, yic'ot a wʌlac' tac, yic'ot i wut a pʌc'ʌb ya' ti a lum mu' bʌ caj i yʌq'ueñet che' bajche' tsi' wʌn subeyob a ñojte'elob. 12Lac Yum mi caj i loc'sʌbeñet jini uts'at bʌ lotol bʌ ti panchan cha'an mi' coltañet. Mi caj i choc jubel ja'al ya' ti a lum che' ti yorajlel, cha'an mi' colel pejtelel jini tsa' bʌ a pʌc'ʌ. Mi caj a wʌq'uen ti majan yan tac bʌ tejclum, pero jatet ma'anic ma' cajel ti majan. 13Lac Yum mi caj i yʌq'uetla ti ñaxan ti' tojlel a pi'ʌlob, mach ti wi'ilic. Mi caj a wajñel ti' pam, mach ti yebalic, mi xuc'ul ma' chʌn jac'ben i mandar lac Yum Dios woli bʌ c subeñetla wʌle. 14Mach yomic ma' wis cʌy ili t'an woli bʌ c subeñet wʌle ame sajtiquet ti yambʌ bij, ame muq'uic a ch'ujutesan jini dioste' tac am bʌ ti pañimil.
Mi caj i toj i mul jini xnusa mandar
(Lv. 26.14-46)
15-19Mi mach a womic a wubiben i t'an lac Yum Dios, mi tsa' ñusʌbe i t'an yic'ot i mandar woli bʌ c subeñetla wʌle, mi caj i c'otel ti a tojlel pejtel ili wocol tac: Wocol jax mi caj a ñusan q'uin ya' ti a lum yic'ot ya' ti tejclum. Ma'anix mi caj i chʌn bujt'el a chiquib. Mach jasʌlic chuqui ma' juch' cha'an ma' c'ux. Ma'anix mi' cajelob ti wen colel a walobilob. Ma'anix mi' caj ti colel a pac' ti lum. Ma'anix mi' caj ti p'ojlel a wacax yic'ot a tiñʌme'. Bʌbʌq'uen jax baqui ma' majlel, yic'ot che' ma' cha' sujtel.
20Lac Yum mi caj i chocbeñet tilel wocol yic'ot wi'ñal. Wocol jax mi caj a wubin c'ʌlʌl jinto ma' jisʌntel, cha'an ti' caj jontol bʌ a melbal cha'an tsa' cʌyʌ lac Yum. 21Lac Yum mi caj i choc tilel cabʌl chʌmel ti a tojlel c'ʌlʌl jinto ma' sʌc jilel ya' ti lum baqui ma' majlel ti chumtʌl. 22Mi caj i yʌq'ueñet lac Yum jini leco bʌ ojbal i c'aba' labi ojbal, yic'ot jontol bʌ c'ajc, yic'ot sijt'el tac, yic'ot yujil bʌ lejmel ti a bʌc'tal, yic'ot i yuchlel a pʌc'ʌb, yic'ot jajmel, c'ʌlʌl jinto ma' laj jilel. 23Jini panchan am bʌ ti chan lajal mi caj a q'uel che' bajche' lamina, yic'ot jini lum baqui añetla lajal mi caj a q'uel bajche' fierro. 24Lac Yum mi caj i choc jubel ts'ubejn i wenta ja'al c'ʌlʌl jinto ma' laj jilel.
25Lac Yum mi caj i yʌq'uet ti puts'el ti' wutob a contrajob. Junts'ijt bij mi caj a loq'uel a taj a contra. Wucp'ejl bij mi caj a majlel ti puts'el ti' tojlel. P'ump'un jax mi caj a tic'lʌntel ti jujump'ejl a lumal. 26Che' ma' chʌmel, jini xta'jol yic'ot bajlum mi caj i c'ux a bʌc'tal. Ma'anix majqui mi caj i nijcan loq'uel che' woli' c'ux. 27Lac Yum mi caj i yʌq'ueñet jini leco bʌ tsoy am bʌ ti Egipto, yic'ot jini chʌcajl tac, yic'ol sal, yic'ot leco tac bʌ tsoy mach bʌ anix i ts'ʌcal. 28Lac Yum mi caj i soc a jol. Mi caj i yʌp a wut. Ma'anix mi caj a ña'tan baqui ma' majlel. 29Ti xinq'uiñil lajlaña mi caj a tʌl pañimil che' bajche' mi' mel jini xpots' ti ac'ʌlel. Ma'anic mi caj a seb c'otel baqui a wom majlel. P'ump'un mi caj a tic'lʌntel ti pejtelel ora. Mi caj i jilel a chubʌ'an ti xujch'. Ma'anic majqui mi caj i coltañet. 30Mi caj a lon c'ajtin a wijñam. Yambʌ winic mi caj i ñoltʌl yic'ot. Mi caj a lon wa'chocon a wotot. Ma'anic mi caj a c'ʌn. Mi caj a lon pʌc' a ts'usub. Ma'anic mi caj a mʌc'ben i wut. 31Ti' tojel a wut mi caj i tsʌnsʌntel a wacax. Ma'anic mi caj a wʌq'uentel mi ts'ita'ic chuqui ma' c'ux. Jini a burro muq'uix i pʌjyel majlel che' woli a q'uel. Ma'anix mi caj a chʌn sutq'uibentel. Jini a contrajob mi caj i ch'ʌmob a tinʌme'. Ma'anix majch mi caj i coltañet. 32Jini ch'iton yic'ot xch'oc bʌ a walobilob mi caj i pʌjyelob majlel ti yambʌ tejclum che' wola' q'uel. Ma'anix mi caj a chʌn q'uelob. C'ux mi caj a wubin. Ma'anix a p'ʌtʌlel cha'an ma' coltañob. 33Pejtelel i wut a pʌc'ʌb mi caj i c'uxob yambʌ tejclumob mach bʌ a cʌñʌyic. P'ump'un jax mi caj a tic'lʌntel ti pejtelel ora. 34Tonto jax mi caj a majlel cha'an pejtelel jini mu' bʌ a q'uel. 35Lac Yum mi caj i yʌq'ueñet tsoy an tac bʌ i pujwil ti a woc c'ʌlʌl ti a xinjol. Mach i ñopoyic ts'ac.
36Lac Yum mi caj i pʌyet majlel temel yic'ot a rey wa'chocobil bʌ a cha'an. Mi caj i yʌq'uet ti' wenta yambʌ tejclum ba' ma'anic a cʌñʌ bʌ, ba' ma'anic tsi' cʌñʌ a ñojte'elob. Ya'i mi caj a ch'ujutesan yan tac bʌ dios melbil bʌ ti te' yic'ot ti xajlel. 37Bʌbʌq'uen mi caj a wubin. Mi caj i wajleñetob. Mi caj i ts'a'leñetob jini winicob x'ixicob ti yan tac bʌ tejclum, ya' ba' mi caj i pʌyet majlel lac Yum. 38Che' ti yorajlel pac' wen on mi caj a cuch majlel la' pac', pero ts'ita' jach mi caj a c'aj, come jini sajc' mi caj i jisan. 39Mi caj a pʌc' a ts'usubil. Mi caj a wen q'uel, pero ma'anic mi caj a wis jap. Ma'anic mi caj a tuc', come jini motso' mi caj i laj c'ux. 40Cabʌl la' cha'an olivote', pero ma'anic mi caj a c'ʌmben i yetsel cha'an ma' bon a bʌ, come i wut mi' caj ti laj yajlel. 41Mi caj a cosan ch'iton yic'ot xch'oc bʌ a walobilob, pero ma'anic mi caj i yajñelob a wic'ot, come mi caj i cʌjchelob majlel. 42Jini xc'ajba sajc' mi caj i laj jisan pejtelel a te' tac yic'ot a pʌc'ʌb. 43Jini ñajt bʌ ch'oyolob ya' bʌ chumulob ti a lum wen chan mi caj i melob i bʌ ti a tojlel, pero jatet pec'atax mi caj a wajñel. 44Mi caj i yʌq'ueñetob ti majan, pero ma'anic chuqui mi caj a wʌq'uen ti majan. Yambʌ mi caj i yajñel ti ñaxan. Jatet mi caj a wajñel ti wi'ipat. 45Mi caj i tilel ti a tojlel pejtelel ili wocol. Mi caj a ts'a'lentel, c'ʌlʌl jinto ma' jisʌntel cha'an ti' caj ma'anic tsa' jac'be i t'an lac Yum Dios. Ma'anic tsa' lotbe pejtel i mandar yic'ot pejtelel i t'an tsa' bʌ i subeyet. 46Jini cha'an mi caj a taj pejtel ili wocol jatet yic'ot a p'olbal cha'an ma' cʌntesʌntel, cha'an ma' cha'len bʌq'uen ti pejtelel ora.
47Cha'an ti' caj ma'anic tsa' melbe chuqui yom lac Yum Dios, mach tijicñayic a pusic'al anquese wen chumulet cha'an tsa' wen p'ojli a chubʌ'an. 48Jini cha'an mi caj a yuman a contrajob mu' bʌ caj i choc tilel lac Yum. Mi caj a wubin tiquin ti' yic'ot wi'ñal yic'ot tsʌñal che' ma'anix a pislel. An cʌbʌl chuqui mi' cajel ti falta a cha'an. Jini a contra mi caj i yʌq'ueñet al bʌ a cuch jinto mi' jisañetla. 49Lac Yum mi caj i pʌy tilel yambʌ tejclum wen ñajt bʌ chumul ti yambʌ lum. Lajal bajche' xiye' mi caj i tilel i xujch'iñet majlel. Yañʌch bʌ i t'an jini winicob. 50Wen jontolob. Lajal i wutob bajche' bʌte'el ts'i'. Ma'anic mi caj i p'isob ti wenta jini xñoxob. Ma'anic mi caj i p'untañob alʌlob. 51Mi caj i c'uxob i yal a wʌlac', yic'ot pejtel yujil bʌ colel ti a lum jinto ma' sʌc jisʌntel. Ma'anic mi caj i wis cʌybeñet a trigo yic'ot i ya'lel ts'usub, yic'ot aceite, yic'ot i yal wacax, yic'ot tiñʌme'. Che' jini mi caj i jisañet. 52Mi caj i joy mʌctañet ti jujump'ejl tejclum, c'ʌlʌl jinto mi' jejmel jini ts'ajc am bʌ ti a joytʌlel anquese tsa' lon ña'ta muq'uix i coltañet jini chan bʌ ts'ajc ya' ba' chumuletla ti jini lum tsa' bʌ i yʌq'ueyetla lac Yum Dios. 53Che' wi'ñayet mi caj a c'uxben i bʌc'tal jini ch'iton bʌ yic'ot xch'oc bʌ a walobilob tsa' bʌ i yʌq'ueyetla lac Yum Dios, come wen wocol mi caj a wubin che' mi' c'otelob a contrajob ti' caj a mul. 54Jini wen uts bʌ winic ma'anic mi caj i p'untan i yeran yic'ot i yijñam, yic'ot jini cha'tiquil uxtiquil i yalobilob am bʌ yic'ot. 55Che' mi' c'uxben i bʌc'tal i yalobil, ma'anic mi caj i t'oxbeñob i pi'ʌlob anquese wi'ñayob jax cha'an ma'anobix i bʌl i ñʌc'. Lajal mi caj i yubiñob wocol ti jujump'ejl tejclum cha'an i contrajintelob. 56Jini wen uts bʌ x'ixic tsa' bʌ i cʌnta i bʌ ti yambʌ ora mach bʌ wis anic t'uchtʌbil i cha'an lum i mal i yoc, ma'anix mi' p'untan i ñoxi'al yic'ot i yalobilob. 57Ma'anic mi caj i wis t'oxbeñob i bʌl i ñʌc'. Ti mucul jach mi caj i c'ux i yalobil, yic'ot ja'el i chujyil i yalobil che' ujtel to i yʌc' ti pañimil. Ma'anix chuqui mi' taj i c'ux, cha'an cabʌl a tic'lʌntel yic'ot a wocol ti' tojlel a contrajob.
58Mi ma'anic ma' wen tsajin a bʌ cha'an ma' jac' pejtel ili mandar ts'ijbubil bʌ ti ili jun, mi ma'anic ma' bʌc'ñan jini ñuc bʌ lac Yum Dios wen bʌc'ñʌbil bʌ, 59lac Yum mi caj i choc tilel ba' añetla yic'ot ba' añob la' walobilob bʌbʌq'uen tac bʌ c'amʌjel, jini c'amʌjel mach bʌ anix i yujtibal, yic'ot jini jontol tac bʌ c'amʌjel mach bʌ yujilic lajmel ti ora. 60Mi caj i choc tilel pejtel jini jontol tac bʌ c'amʌjel lajal bajche' tsi' yubiyob ti Egipto, jini tsa' bʌ a bʌc'ña ti yambʌ ora. Ma'anix mi caj i chʌn cʌyet. 61Lac Yum mi caj i choc tilel ti a tojlel ja'el pejtel jini jontol bʌ c'amʌjel mach bʌ ts'ijbubilic ti ili jun, i juñilel mandar. Mi caj i jisañet. 62Che' jini mach chʌn lajaletix la bajche' jini ec' am bʌ ti panchan, come ma'anix jaytiquil mu' bʌ caj i cʌytʌlob cha'an ti caj ma'anic tsa' la' jac'be i mandar lac Yum Dios. 63Ti yambʌ ora tijicña jax i pusic'al lac Yum tsi' wen coltayetla. Tsi' p'ojlesayetla, pero mach che'ic ti jim bʌ ora. Mi caj i yubin i tijicñʌyel i pusic'al ba' ora mi' junyajlel jisañetla. Mi caj la' chojquel loq'uel ti lum. 64Mi caj i pam puquetla ti yan tac bʌ tejclum, ti junwejl pañimil. Ya' mi caj la' ch'ujutesan jini dios tac mach bʌ cʌmbilic la' cha'an, mach bʌ cʌmbilic i cha'an la' ñojte'elob, jini dios tac melbil bʌ ti te' yic'ot ti xajlel. 65Ma'anic mi caj a taj c'aj o baqui jach ma' majlel ti yan tac bʌ tejclum. Ma'anic mi caj a wubin a tijicñʌyel. Lac Yum mi caj i wen aq'ueñet bʌq'uen. Mi caj i toj sajtel a pusic'al. Wen ch'ijiyem jax a pusic'al mi caj a wubin. 66Ti jujump'ejl q'uin bʌbʌq'uen mi caj a tsʌnsʌntel. Ma' caj ti bʌq'uen ti q'uiñil yic'ot ti ac'ʌlel. Mach wen tijicñayic mi caj a wubin come mach a wujilic chuqui tal. 67Che' ti sʌc'ajel mi caj a wʌl: “I t'ojol ic'ajeliquix wʌle”, che'et. Che' ti ic'ajel mi caj a wʌl: “I t'ojol sʌc'ajelicax wʌle”, che'et. Come tsiltsilña a pusic'al cha'an cabʌl a bʌq'uen cha'an chuqui tac mi caj a q'uel. 68Lac Yum mi caj i cha' pʌyetla majlel ya' ti Egipto ti jucub. Mi caj la' sujtel ti bij baqui tsac subeyetla. Ma'anix mi caj la' chʌn q'uel jini bij, cho'on. Ya'i mi caj la' wʌc' la' bʌ ti chojñel, winicob yic'ot x'ixicob, pero ma'anic majqui mi caj i mulan i mʌñetla.
Currently Selected:
DEUTERONOMIO 28: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.