DEUTERONOMIO 24
24
Che' mi' cʌyob i bʌ jini ñujpuñijemo' bʌ
1Che' an winic tsa' bʌ i pʌyʌ i yijñam, mi ma'anic tsa' caji i mulan cha'an ti caj an chuqui leco tsi' q'uele ti' tojlel, mi mach yomix i q'uel, wersa mi yʌc' ti melol i juñilel cha'an mi' cʌyob i bʌ. Che' jini muq'uix i choc loq'uel ti yotot. 2Che' loq'uemix jini x'ixic ti' tojlel jini winic, mi mejlel ti ñujpuñel yic'ot yambʌ winic. 3Mi tsi' cha' choco loq'uel jini wi'ilix bʌ i ñoxi'al, mi tsi' cha' aq'ue i juñilel cha'an mi' cʌyob i bʌ, mi tsi' choco loq'uel ti' yotot, o mi tic'ʌl tsa' chʌmi jini winic che' anto yic'ot jini x'ixic, 4mach mejlix i chʌn pʌy jini x'ixic jini ñaxan bʌ i ñoxi'al cha'an mi' chʌn ñoxi'alin, come tsa'ix ajni yic'ot yambʌ winic. Bibi'ix ti' wut lac Yum. Ts'a' mi' q'uel lac Yum. Mach ma' mel chuqui leco ti jini lum woli bʌ i yʌq'ueñetla lac Yum Dios.
5Che' ujtel jax to ti ñujpuñijel juntiquil winic, mach mejlic ti loq'uel majlel ti guerra. Mach yomic ma' wa'chocon ti e'tel, pero yom jump'ejl jab mi' yajñel ya' ti' yotot cha'an mi' tijicñesan i pusic'al yic'ot jini xch'oc tsa' bʌ i pʌyʌ.
Yan tac bʌ mandar
6Mach yomic ma' ch'ʌmben i yej molino cha'an i q'uexol chuqui ma' wʌc' ti majan, come lajalʌch bajche' woli a ch'ʌmben i ch'ujlel i yum.
7Mi tsa' taja juntiquil am bʌ i mul cha'an tsi' xujch'i yambʌ, mi ch'iton mi xch'oc ti' tojlel israelob, mi tsi' yʌc'ʌ ti majtan e'tel, yic'ot mi tsi' choño, wersa yom mi' chʌmel jini xujch'. La' jilic ti la' tojlel jini yujil bʌ melol che' bajche' jini.
8Tsajin a bʌ che' an juntiquil am bʌ leco bʌ i tsoy. Yom ma' jac'ben i t'an motomajob levíjob, cha'an ts'ʌcʌl ma' mel bajche' mi' subeñetob. Come tsa'ix cʌq'ueyob mandar bajche' yom melol. 9Ña'tan chuqui tsi' mele lac Yum Dios ti' tojlel Miriam che' bʌ loq'uemetix la ti Egipto.
10Che' an i bet a pi'ʌl mach yomic ma' wochel ti' yotot cha'an ma' ch'ʌm loq'uel i chubʌ'an cha'an i q'uexol i bet. 11Yom jach ma' wa'tʌl ti' ti' i yotot jini winic jinto mi' yʌq'ueñet i q'uexol. 12Mi wen p'ump'un jini winic, mi tsi' yʌq'ueyet i bujc cha'an ti' caj i bet, mach ma' c'ʌn ti wʌyel. 13Che' maxto bʌjlemic q'uin, yom ma' cha' sutq'uiben i pislel cha'an mi' c'ʌn ti wʌyel. Che' jini uts'at mi caj i q'uelet. Uts'at mi caj i q'uelet ja'el lac Yum Dios.
14Mach yomic ma' p'ump'un tic'lan a winic cha'an p'ump'un, mi a pi'ʌlʌch o mi ñajt bʌ ch'oyol tsa' bʌ tili ti chumtʌl ti a tejclum. 15Ti jujump'ejl q'uin che' ts'ʌctiyemix i ye'tel, yom ma' wʌq'uen i tojol che' maxto bʌjlemic q'uin, come p'ump'uñʌch. Tsa'ix i ña'ta ti' pusic'al cha'an mux caj i taj. Machic ma' wʌq'uen, mux caj i pejcan lac Yum cha'an jontolet. Che' jini mi caj a taj a mul.
16Mach ma' wʌc' ti chʌmel jini tatʌlob cha'an ti caj i mul i yalobilob, mi jini alobob cha'an i mul i tat, come jujuntiquil i bajñel mi' caj ti chʌmel cha'an i bajñel mul. 17Mach yomic ma' tic'lan jini mach bʌ mero anic i lumal ti la' tojlel yic'ot jini meba'o' bʌ. Mach yomic ma' ch'ʌmben i pislel jini meba' x'ixic cha'an i q'uexol i bet. 18Yom ma' chʌn ña'tan bajche' añet ti yambʌ ora che' mozojet ya' ti' lumal Egipto. Lac Yum Dios tsi' loc'sayet ya'i. Jini cha'an che'ʌch yom ma' mel bajche' mic subeñet.
19Che' ma' tuc a trigo ya' ti' yajñib, mi tsa' cʌyʌ junsejm jini a trigo, mach chʌn majliquet a ch'ʌm tilel. La'ix cʌlec cha'an mi' ch'ʌm jini ñajt bʌ ch'oyolob, yic'ot jini meba'ob, yic'ot jini meba' x'ixicob. Che' jini lac Yum Dios mi caj i coltañet ti pejtelel a we'tel mu' bʌ a mel. 20Che' ma' tujc'an majlel jini te' i c'aba' olivo, mach yomic ma' cha' sʌclʌben i wut tsa' bʌ cʌle. La' cʌlec cha'an jini ñajt bʌ ch'oyolob, yic'ot jini meba'ob, yic'ot meba' x'ixicob. 21Che' ma' tuc' a ts'usub, mach yomic ma' laj tuc' ti pejtelel. Yom ma' cʌybeñob jini ñajt bʌ ch'oyolob, yic'ot jini meba' alʌlob, yic'ot meba' x'ixicob. 22Ña'tan bajche' añet ti yambʌ ora che' mozojet ti' lumal Egipto. Jini cha'an che'ʌch yom ma' mel bajche' mic subeñet.
Currently Selected:
DEUTERONOMIO 24: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.